ئەم هەواڵە بڵاوبكەوە
FaceBook  Twitter  

پاش خەیانەتی مێژوویی ١٦-١٠-٢٠١٧و داگیرکردنەوەی دووبارەی سەتا پەنجا و یەکی خاکی کوردستان لە لایەن حشدی شیعی ئێران و عێراقەوە، هەر چرکەساتێک کە تێدەپەڕی بە زیانی بزاڤێ کورد بە گشتێ و باشور بە تایبەتی تەواو دەبێ. بە تێپەڕینی هەر چرکەیەک دوژمن جێگیرتر دەبێ و کورد لاوازتر. بەغداش بە پشتگریی ئێران و تورکیە و ئەمریکا، بەو رەوتەی زانیوە و بە شێنەیی وێڕای دەسدرێژی بەردەوام بۆ سەر خاکی کوردستان، دەسەڵاتدارەکانی هەریمی کوردستان لە چاوەڕوانیدا ڕادەگرێ. 

چەند دیاردەی بەرچاو کە ئەم رەوتە ، لەم چەند رۆژەدا بە ئاشکرا بینراون کە بریتین لە :

1- داوای وتووێژی بێ مەرجی دەسەڵاتی هەریم و وەڵام نەدانەوە و بیانوو هێنانەوەی بەغدا و هەرەشە و گوڕەشە،

2- سەفەری عەبادی بۆ سەعودی بە دەڵالی ئەمریکا بۆ دامرکاندنەوەی کێشەکانی بەغدا و ریاز کە پشت ئەستور کردنی دەسەڵاتی شیعەیە لە بەغدا،

3- پەلهاویشتنی تورکیە بۆ ناو خاکی ڕۆژئاوا، پڵانی تورکیە بۆ هێرش کردنەسەر ئەفرین،

4- تێکۆشانی حەشدی شەعبی بۆ گرتنەوەی سنووری ڕۆژائاوا و باشور،

5- وەڵامی توندی دەفتەری عەبادی بە داوای کرچ و کاڵی وەزیری دەرەوەی ئەمریکا بۆ دەرکردنی دارودەستەی پاسدارەکانی ئێران لە عێراق،

6- فەرمانی عەبادی بۆ زیاد کردنی پینج هیز بۆ حەشدی شەعبی، 

7- لە هەموویان گرینگتر دەستڕۆێشتوویی و سەرکردایەتیی سپای تیرۆریستی پاسداران لە ناوچەی سەوز هەم لەرووی سیاسی و هەم مێدیایی و هەم سەربازیەوە.

لاوازی گەورەی ناوکورد، دژایەتی و دووبەرەکانی چەندلایەنەی ناوخۆییە. سەرەڕای روشەن بوونەوەی بەرەی خەیانەتکار و بەرەی کورد، هێشتا سەرکردایەتیە سیاسیەکان بەڕاشکاوی لەگەڵ خەڵک لەسەر ئەو ڕووداوانە نادوێن. هێشتا سەرکردە سیاسیەکان بۆیان روون نییە کە لەگەڵ کام لایەن و هێزی کورد یەکبگرن. ئایا دەکرێ هەمدیسان لەگەڵ ئەوکەسانەی حەشدیان بردە سەر گیان و ماڵی کورد باس لە یەکریزی بکەی؟ ئایا کاتی وەی نەهاتووە کە بە چاوێکی وردبینانە، خۆیی و بیانی و جاشی بیانی تەماشا بکەین و لەباتی هەوڵدان بۆ یەکریزیەکی بێ بنەما و پر لە شۆڤار، بەرەو یەکریزیەکی وشیارانە هەنگاو هەڵێنین؟ بە ڕای من هەر ئێستا کاتی ئەو بەخۆداهاتنەوەیە و تەنانەت لە چەند رۆژی داهاتووشدا درەنگ دەبێ. بەڕاشکاوی لەو خاکفرۆشتنەدا خەتەکان کێشران. دارودەستەی قاسم سولەیمانی لەناو یەکێتیدا، سەلماندیان کە دوژمنی نەتەوەی کورد و خود یەکێتین. گۆڕان و کۆمەڵ، بە ڕاگەیاندنی تێکۆشان بۆ ڕووخاندنی دەسەڵاتی هەرێم کە ڕووبەڕووی پیلانی دوژمن بۆتەوە، سەلماندیان کە هەڵگری پلانی دووهەمی ئێرانن. ئایا دیسان سەرۆکایەتی هەریم دەیهەوی بە هیوای یەکریزی لەگەڵ ئەمانە لەسەر بانگهێشتنی بەغدا ڕاوەستێ؟

داگیرکەرانی کوردستان بەباشی لەم بارەی ناوخۆییەی کورد ئاگادارن و سالەهایە کەڵکی لێوەردەگرن و لەبەر سێبەری ئەو خۆخۆریەدا بە ئاسودەیی دەسەڵاتیان بەسەر کوردداسەپاندوە. هەربۆیەش کات یارمەتیدەریانە هەتا کورد بەلاوازی پترەوە لەبەرانبەریان دابنیشێ. ئەوان بەڕوونی لەو دەستانەی کە لەباشوردا، بوکە دارینەکان وەسەما دەخەن، ئاگادارن. بۆیەش دەزانن کە هەرچی کات تێپەرێ، کورد پەرش و بڵاوتر دەبێ. 

لاوازێکی تر کە لەم ڕووداوەدا دەرکەوت، نارێک و پێکیی ڕیکخستنەکانی پێشمەرگە و چەند ناوەندێتی بڕیاردان بۆیان بوو. فەرماندەی پێشمەرگە لە کەرکوک هێز دەکشێنێتەوە و بە پێی وتوێژی خۆی فەرماندەی گشتیی هێزی پێشمەرگە و تەنانەت سەرکردەی حیزبەکەی خۆشی ئاگادار ناکاتەوە. (مەبەست بەڕیزان بارزانی و کۆسرەت رەسولن).هەروەک لە گرتەکانی ویدیۆیش ڕا دەردەکەوێ، تەنانەت لە بەرەی شەریشدا چەشنێک بەربلاوی و بێ سەرەوبەرەیی دیارە. هەڵبەت من پسپۆری سەربازی نیم، بەڵام بەبەرئاوەردی ئەو فیلمانە و فیلمەکانی شەڕی گریلاکان لە ڕۆژئاوا دەتوانم بە ئاشکرا بڵێم کە ئەو ڕێک و پێکی کە لە ناو پێشمەرگەی ڕۆژئاوا دەبینرێ لەناو گرتە ویدیوییەکانی بەرەی پردێ و مەخمور دانییە. 

لەلایەکی دیکەوە، لایەنە بە هێزەکانی بزاڤی کورد بەرچاون و مەسەلەی کورد لەچۆارچێوەی ناوچەیی تێپەڕاوە و دەوری کورد لەبەربەرەکانیی داعەشدا لە ڕۆژئاوا و باشور، دەوری کورد لە باکوردا بۆ چەسپاندنی دیمۆکراسی لەبەرانبەر ئەردۆغانی ئیسلامچیدا، ڕاپەرینە بەرفراوانەکانی ڕۆژهەڵات بۆ پشتگری لە باکور و باشور،دەنگهێنانەوەی ٩٢ لە سەت بۆ سەربەخۆیی ڕەنگدانەوەی نێونەتەوییان هەبووە. هەروەها ئامادەیی هەزاران گەنجی باشور بۆ خۆبەخشی، پشتگریی زۆربەی کوردەکانی پەرەوازەی هەندەران ، بەدەستەوە بوونی بەشێک لە نیشتمان لە باشور و ڕۆژئاوا، خاڵی بەهێزن کە دەبێ لەبەرچاو بگیرێن. 

سەرکردایەتی هێزە سیاسیەکانی کوردستانی و بەشی کوردستانیی یەکێتی نیشتمانی دەبی لەسەر ئەو خالە بەهێزانە و بەلەبەرچاوگرتنی خالە لاوازەکان، لە کاتی ئێستادا ستراتێژی نوێ خۆیان داڕێژنەوە. ستراتێژیەک لەسەر بنەمای یەکریزی هێزە کوردستانیەکان بە گشتی نەک هەر باشور، هەم لەباری سیاسیەوە و هەم لەباری سەربازیەوە. هەم لەناوخۆ و هەم لە دەرەوەی کوردستان. ئەو ستراتێژیە نابێ کات لەبەرچاو نەگرێ. بەڵکو بە هەنگاوی بەکردەوە وا لەدوژمن بکا کە وەک جاران بۆ دانیشتن بپاڕێتەوە. خاڵی سەرەکی ئەو ستراتێژییانە دەبێ ئازاد کردنەوەی ناوچەداگیرکراوەکانی چەند رۆژی ڕابردوو بێ. بیانووی مەحکەمەپەسەندیش بۆ کورد ئەو تاوانەن کە حەشدی شەعبی کردوونی و لە جیهان لەقاودراون و هەروەها هێێرشە پەیتا پەیتاکانی بەغدایە سەرەڕای ڕاگەیاندنی ئامادە بوون بۆ وتووێژلەلایەن سەرۆکایەتی هەریمەوە. داکۆکی کردنی تەنیا بۆ بەرگریی پێشرەویی سپای عێراق لەچاوی بەغداوە تەنیا پەلەقاژەی خۆپاراستنە. بەڵام ڕاوەدوونانیان و پاشەکشە پێکردنیان دەبێتە گوشار لەسەر بەغدا. ئەو ستراتێژییە دەبێ مێدیاکانی ئەولایەنانەش بگرێتەوە کە واز لە ئاکاری دووبەرەکی خستنە ناو ماڵی کورد و بنیاتنانی هەواڵ لەسەر درۆ و دەلەسە بێنن و بە فرت و فراوانی پرۆگرامەکانیان بخەنە خزمەت گەشەپێدانی بەرخۆدان و یەکگرتن. 

ئەگەر وا تێبفکرین کە مەبەستی دوژمن هەر باشورە ئەوە هەڵەیەکی گەورەیە کە دوچاری دەبین. مەبەستی دوژمن پاراستنی سنورەکانە کە بە مانای مانەوەی کوردە لە بندەستیدا. ئەوەش باکور و رۆژئاوا و ڕۆژهەڵاتیش دەگرێتەوە. لە وتوێژەکانی هاوبەشی کۆماری پەت و سێدارە و تورکیەدا هەمووی باسکراوە و پڵانی بۆ دانراوە. هەربۆیەش پارتی و بەشی نیشتمانپەروەری یەکێتی و پ.ک.ک ئەگەر یەکنەگرنەوە و یەکریزێکی کوردستانی پێک نەهێنن، شکستی کەرکوک بە کشانەوە بۆ سنورەوکانی ٢٠٠٣ کۆتایی نایەت و هەم باشور تێدادەچێ و هەم ڕۆژئاوا و قەندیل. 

دەیان ساڵە کورد لەکاتی تەنگانەدا، لەبەشەکانی جیاواز پەنا دەباتە بەر بەشێکی دیکەی کوردستان. بۆ وێنە پاش شکانی کۆمار و لە شۆڕشی ئەیلول و لەپاش گوشاری داگیرکەران لە باکور، ئەوەمان بە چاوی خۆمان دیوە. هەر ئێستا کوردی باکور لە قەندیل و کوردی ڕۆژهەڵات لە باشوروێنەی زیندووی ئەو دڵبەستنەن بە بەشێکی دیکەی نیشتمان. مەبەستێکی سەرەکی داگیرکەران نەهێشتنەوەی ئەو مەودایەشە. بە دڵنیاییەوە پاش دەسەڵاتی داعەشی شیعە بەسەر باشوردا ئەو دەرفەتەش لە دەستی کوردی بەشەکانیتر دەردەهێننەوە. 

لە هەل و مەرجی ئێستادا، بڕوبیانوو هێنانەوە بۆ لێک دوور بوونەوە کەمتر لە خەیانەت نییە. هەرچەشنە ئیمتیاز دانێکی لایەنێکی کوردی بەلایەنەکەی دیکەی کورد وەک ئەوەیە پاروو لە دەم را بکەوێتە ناو کۆش. نەتەنیا رازی کردنی لایەنێک بۆ یەکریزی بە مەرجی چاوپۆشین لە بەرژەوەندیی حیزبی شەرم نییە، بەڵکو دلسۆزی و پاکیی هەستی ئەولایەنە دەخاتەبەرچاوی گەلانی کوردستانەوە و نیشانەی وڵاتپارێزیە. ئایا باشتر نییە کە باکور و باشور ئیمتیاز بەیەکتر بدەن تا بەداگیرکەران و بیانیەکان؟

ئەوەیەکە هاتۆتە گۆرێ، دیارە بەروبۆی هەڵە و گەندەلکاری و دەیان و سەتان کەم و کۆڕیی ترە. ئەم کەم و کۆڕیانە یارمەتیدەری پڵانەکانی داگیرکەران بوون. بەڵام ئێستا کە کات بەزیانی بزاڤی کوردە، پێچەقاندن لەسەر هۆ و هۆکارەکان و دۆزینەوەی کەسانی کەمتەر خەم و ئاڵوگۆڕی کوتوپڕ زیانهێنەرن. با ئەو خاڵانە ڕابگیرێن بۆ پاش دەرکردنی داگیرکەران لەو پارچەی کە بە خۆین ئازاد کرابوو. بەتایبەت کەرکوک. بەبێ کەرکوک کورد هەر لە بندەستیدا دەمێنێتەوە. 

حەسەن ماوەڕانی 

٢٤-١٠-٢٠١٧