ئەم هەواڵە بڵاوبكەوە
FaceBook  Twitter  

 

وەک بەشێک لە گوتاری سیاسەتی کەڵەگایی نەرمڕۆی عەبادی

ئاشکرایە عەبادی دوای گرتنەوەی موسل، بە گرتنی کەرکوک و کێڵگە نەفتییەکان و شەقکردنی حیزبی کوردیی، مێژووی کوردی گەڕاندنەوە نیوسەتەی رابردوو، راستتر بڵێم، بۆ سەردەمی ئەحمەدی خانیی و حاجی قادری کۆیی، واتە سەتەی ١٧ و نۆزدە، بەمەش توانی گەندەڵیی و بەرەڵایی سیاسیی ناوەخۆی عێراق لە بیر خەڵک بباتەوە و خۆی وەک فریادڕەسی عێراق ببینێت.

ئەوەی سەرنج لە قسەکانی عەبادی سەبارەت بە مامەڵەکردن لەگەڵ کورد وەڵامدانەوەکانی بۆ داوایەکانی ئەمەریکا سەبارەت بە حەشدی شەعبیی بدات، دەزانێت لە پشتەوەی رەوانبێژییەکەیدا هەڵگری چتۆ عێراقێکە و چۆنیش بۆ سازکردنەوەی ئەو عێراقە یەکگرتوو و خاوەن ناسنامە عەرەبییە کار دەکا.

پرۆژەی عەبادی دەست بەسەر داگرتنی کۆی ئەو شوێن و دەروازە سەرەکییانەیە کە دەلالەتی سیاسیی و ئابوورییان هەیە. بۆ مەیسەرکردنی ئەو ئامانجەش، هەوڵدەدا بە زمانی نەرم و حیزبە کوردییەکان رازی بکات، کە بێ شەڕ ئەو شوێنانەی رادەست بکەن.

عەبادی بۆ ئەو پرۆژەیە، لە هەوڵی ئەوەدایە سەبارەت بە داهاتووی کورد لەگەڵ ئێران و تورکیا، رەنگە لەگەڵ رژێمی سوریە و بگرە بەناو سوپاسی ئازادی سەر بە ئۆردۆغانیشدا لەسەر ئەو پرۆژەی پەل و پۆ بەستنی کوردی رۆژئاڤا ئەو کارە بکات، رێککەوتووە کە هێدی هێدی گورز لە هەموو پارچەکانی کوردستان بوەشێنن. هاتنی سوپای عێراق و حەشد بۆ فیشخاپوور، بەشێکە لەو پرۆژەیە هاوبەشە.

لە خۆڕا نییە دوای گرتنەوەی کەرکوک شوێنە گرینگەکانی دیکە. عەبادی و مەنسوولە عێراقییەکان لە بری "اقلیم الکوردستان"، "شمال العیراق" بەکار دەهێنن.

سەرگرتنی و نەگرتنی ئەو پرۆژەیەی عەبادی، پەیوەندی بە بەرژەوەندی ئەمەریکا و هاوپەیمانەکانییەوە هەیە. بەڵام عەبادی لە رەوانبێژی گوتاری عێراقە یەکگرتووەکەیدا روونە، لاملی لەگەڵ داوای ئەمەریکا سەبارەت بە حەشد و ئامادەیی ئێران لە عێراقدا بکات. لێددوانی ئەمڕۆ ئەو جەنارەلە ئەمەریکەیش لە عێراقدا سەبارەت بە هەڵوێستی ئەمەریکا لەسەر ئەو کێشە و شەڕانەی ئەو چەند رۆژەی نێوان پێشمەرگە سوپا و حەشد، ئاماژەیەکی ئەرێنی بۆ کورد تێدا نەبوو.

ئەوەی من تێبگەم راگرتنی شەڕ بۆ ماوەی ٢٤ کاتژمێر و پێکهێنانی "دەستەیەکی هونەریی"، رەنگدانەوەی گوتاری نەرمڕۆی سیاسەتی عەبادییە لەگەڵ کورددا، چونکە دەزانێ ئەگەر شەر لەگەڵ پێشمەرگە بکات، هەم رای جیهانی دەورووژێنێ و هەمیش خەسارەت و پرۆژەکەیشی دوا دەکەوێت. دەشزانێ کورد بەش بەش و سافیلکەن، بۆیە ئەو گوتارە نەرمڕۆە، باشترین رێگەیە بۆ گێرانەوەی کۆی ئەو شوێن و دەروازە گرینگانە کە لە رووی سیاسیی و ئابوورییەوە مانای گرینگییان بۆ سازاندنەوەی عێراقی یەکگرتوو هەیە، کە ئەمەش بەردەوامییەکە لە پرۆژەی ناسیۆنالیزمی عەرەبیی.

بەمجۆرە تا کورد خاوەنی ئەو گوتارە لەرۆزک و لەڕەی سیاسیی و چاوەڕێی قسەی خێر و بەزەیی ئەمەریکاش بێت، هێدی هێدی پاشەکشە دەکا و عێراقی یەکگرتووش وەک ناوێکی فشە گەشە دەکاتەوە.

هەر چۆنێک بێت، لەوە ناچێ هەناوی ئەو کوردە تشتێکی نوێی تێدا بێت، تا سەرلەنوێ بە هزرێک لە ئیرادەی نوێ لە دایک بێتەوە، بۆیە مەگەر داهاتووی رووداوەکان و ململانێیەکانی نێوان ئێران، رووسیا، سوریە، تورکیا، ئەمەریکا و ... پەلۆپۆی ئەو پرۆژەیە لە کورد سڕکردنەی کورد لە لایەن عێراق، ئێران و تورکیاوە ببەستن.

لێ کورد بۆ دڵدانەوەی خۆی، بێجگە لە گوتنەوەی هاوارەکانی خانیی حاجی قادر، قسەیەکی نوێی نییە. مێژوویش وەک ئەزموونێک لە رابردوو بۆ ئێستای نەتەوەیەک سوودی نەبوو، مێژوو نییە.