ئەم هەواڵە بڵاوبكەوە
FaceBook  Twitter  

لەڕاستیدا ئەم هەنگاوە زۆر گرنگە، ئەرکی هەموو لایەن و کەسێکی نەتەوەو نیشتیمانپەروەرو پێشکەوتنخوازە هەر یەکەو لایەنە لەلای خۆیەوە بە گورجی بیری لێبکاتەوەو زانستانەو بە وریایی بیخاتە بەرچاوی گەلەکامان و حیزب ورێکخراوو کۆمەڵەو سەندیکاو بزوتنەوەو گشت رێکخراوەکانی جەماوەر.

لایخۆمەوە پێموایە، بەچڕی و بەکورتی ئەو هەنگاوە یەکجار گرنگە بریتیە لە پێکهێنانی بەرەیەکی کوردستانیی بەرفراوان و نوێ، بە بەرنامەیەکی نوێ وگشتگیر کە ئامانجەکانی ئێستاو ستراتیژیی گەلی کوردستان بگرێتەخۆی وپەیڕەوی ناوخۆی بۆ ئامادەبکرێت.

ئاشکرایە کە گەلی کوردستانمان فرەنەتەوەیە، جگە لەگەلی کورد کە زۆربەیە، گەلانی کلدان و ئاشوری وسریان و ئەرمەنی و گەلی تورکمان و گەلی عەرەبی رەسەن کەلەدێرزەمانەوە لەکوردستاندا دەژین و( بێگومان ئەمە ئەوانەناگرێتەوە کە وەک بەشێک لە سیاسەتی بەعەرەبکردن هێنراون و لە کوردستاندا نیشتەجێ کراون، بەڵکو بۆ نمونە دەکرێ سەرژمێریی ١٩٥٧ بکرێتە پێوانە) تەواوی ئەو پێکهاتانەی نەتەوەیی ورەگەزی وئاینی وەک فەیلیەکان وئێزدییەکان و شەبەک و جولەکەو زەردەشتی و مەندائی و..تاد ئەمانە هەموویان دەبێ لەو بەرە گشتگیرە کوردستانیەدا بەشداربکرێن و مافەکانیان بەتەواوی لە بەرنامەکەی بەرەی نوێدا دیاریبکرێن.

بەرەی کوردستانی لەخەبات و شۆڕشی گەلەکەماندا پێشینەیەکی دەوڵەماندو زۆر بایەخداری هەیە، وێڕای هەموو کەم و کوڕیەکان، کەدەبێ بۆ ئێستاو ئایندەی ئەم بەرەی کوردستانیە گشتگیرییەی پێشنیازی دەکەین سوودو پەندی پێویستی باشی لێوەربگیرێت و رۆڵی ئەرێنیی وکاریگەری ئەو بەرەیە لە رابوردووی شۆڕشەکەی گەلی کوردستاندا بێگومان بەرز هەڵدەسەنگێندرێت کە تاڕادەیەک بایەخی هەبوو بۆئاوکردن بە ئاگری شەڕی براکوژیدا، بۆ لێک نزیککردنەوەی هەموو لایەن و جەماوەرەکەیان، بۆ بەرزکردنەوەی ناوبانگی شۆڕشەکە، بۆ هەڵوێستی هاوبەش لە پرسەگرنگەکاندا، بۆ پەیڕەوکردنی سیاسەتی هاوبەش وهاوکاریی یەکتری ئەندامانی بەرە بەپێی توانا، بۆ بەهیزکردنی شۆڕشەکەو فراوانکردنی پەیوەندییەکانی نێونەتەوەیی و بەرزبوونەوەی باشی ناوبانگی شۆڕشەکە لەناودەوڵەتاندا، بۆ بەرزکردنەوەی ورەی هێزەکانی پێشمەرگەو پشتئەستووربوونیان بە هێزی یەکێتیی ریزەکانی گەل..تاد.

بەڵام ئێستا سەردەمێکی تا ڕادەیەک نوێیە، زۆرئاڵوگۆڕ لەبوارەکانی سیاسی و کۆمەڵایەتیو ئابوری و زانیاری و تەکنەلۆژی و ژینگەو بیرو ئایدیۆلۆژی و مافی مرۆڤ و راگەیاندن و لەبوارەکانی دیکەی ژیان و تێکۆشاندا روویان داوە کەئەوەدەسەپێنن هەموان بەسنگێکی فراوانترو بیرێکی کراوەو زانستانەترو

هەڵسەنگاندنێکی راستبینانەترو هەستکردنێکی زۆرتر بە بەرپرسی و بەپەلەتر بەپیر دۆزینەوەی رێگای چارەسەری کێشەو قەیرانەکانەوەبچین و بە کەمترین قوربانی زۆرترین دەستکەوت وهێنانەدیی ئامانجەکانی گەلەکەمان دابینبکرێن. بۆیە لە ئەنجامدا دەڵێم باشە ئەگەر بیرۆکەی پێکهێنانی بەرەیەکی کوردستانیی بەرفراوان و نوێبەگورجی بخرێتە بەرباس و لێکۆڵینەوەی هەموو لایەنەکان و کەسایەتییە سیاسی و کۆمەڵایەتیەکان و رۆشنبیران و مامۆستایانی زانکۆکان و دامودەزگاکانی پێشمەرگەو راگەیاندنەکان و رۆژنامەگەریی وئەوانیتر بەتایبەتی ئەو هەشت لایەنەی کە لە بەرەی کوردستانیی پێشودا ئەندامبوون.

پێموایە ئەگەربەرەی کوردستانی دوای راپەڕین، لەبەر هەرمەبەستێکبوو، لەناو نەبرایەو هەڵنەوەشێندرایەتەوەو لە سەرکردایەتی خەباتی گەلەکەماندا بمایەتەوە، رەوتی روداوەکانوچاری کێشەکان بەجۆرێکیترو سەرکەوتووانەتر دەبون و ئەو هەموو گەندەڵی و هەڵانە روویاننەدەدا.

بەهەرحاڵ هیوادارم بەرپرسانە سەرنجی ئەم پێشنیازە بدرێت و سیاسەتی ئایندەی هەموو لایەنەکانباشترو ڕاستتر پیادەبکرێن و بەقازانجی دروشمی مافی چارەنووس و سەربەخۆیی باشووری کوردستان کە ئێستا لە ئارادایەو

بە قازانجی بزاڤی رزگاریخوازیی گەلی کوردستان و دروشمی سەربەخۆیی و یەکێتیی نەتەوەیی لەهەرچوار پارچەکەیدا بەپتەوی جێگیربێت و حیزب و لایەنەکانی ئەم بەشانە دەست لە کاروباری یەکتر وەرنەدەن و خۆیان بەپێی هەلومەرجی بەشەکەیان سیاسەتی خۆیان بڕیاربدەن و بۆ هەرلایەنێک تەنیا هاوکاری و پشتگیری یەکترپیادەبکرێت و لە کۆنگرەیەکی نیشتیمانیدا بەپێی رێوشوێنی دیاریکراوو رێکەوتن سەرکردایەتیی بەرە هەڵبژێردرێت و بەرنامەو پەیڕەوی ناوخۆ پەسەند بکرێن و ئەم بەرە کوردستانییە نوێیە دەستبەکاربێت.