ئەم هەواڵە بڵاوبكەوە
FaceBook  Twitter  

بەبۆنەی شۆڕشی ئۆكتۆبەر، بەبەشدرای هەزاران كەس و نوێنەرانی سەدان لەحزبە شیوعیەكانی جیهان كەتێیدا نوێنەرانی حزبی شیوعی كوردستان‌و عێراق بەشداربوون، میهرەجانێكی پڕ شۆكی بەرز راگرتنی یادەكەیان سازكرد.

شۆڕشی ئۆكتۆبەری 1917 ، كەلەروسیا بەسەركردایەتی لینینی مەزن بڵێسەی شۆڕشی بەرپاكرد،كەدواجار بوە هۆی ئەوەی بلۆكێكی رۆژهەڵاتی لەبەرامبەر بلۆكی ئیمپریالیستی سەرمایەداری جیهانی بەسەركردایەتی ئەمریكا و وڵاتانی رۆژئاوایی دروست بێت ‌و هاوسەنگی بۆ جیهان بگێڕێتەوە.

دوای ئەوەی شۆڕشی حزبە شیوعیەكانی ئاسیا‌و ئەوروپا بۆ بەدەستهێنانی ئازادی‌و عەدالەتی كۆمەڵایەتی لەوڵاتەكانیان سەركەوتن بەئیرادەی جەماوەری ئەو گەلانە، سۆسیالیزم رۆژ بەرۆژ پانتایی جیهانی گرتەوەو بەمەش هاوسەنگی هێزی جیهانی دروست بووە ، كەدواتر بە جیهانی دووجەمسەری ناسرا‌و بەمەش زۆرێك لەگەلان ئازادی خۆیان لەبن دەستی ئیمپریالیستی ‌و كۆلۆنیالیستی وڵاتانی سەرمایەداری كەدوو لەسەر سێ جیهانیان داگیركردبوو، بەدەست بهێنن.

شۆڕشی ئۆكتۆبەر لەئان‌و ساتی هەڵایسانییدا، گەلانی بن دەستی بێگانەی رۆژئاوایی، لەنێویشیاندا، گەلانی عێراق، هاوڕێیانی تێكۆشەری ئازادی خواز و پڕجۆش خرۆشی شۆڕشگێڕی(بەكورد‌و عەرەب‌و مەسیحی‌و توركمان‌و هەموو پێكهاتەكانی دیكە) لەدژی داگیركاری بەریتانیا، چەندین ناوەند‌و ئەلقەی بەرەنگاربوونەوەیان دروستكرد، گەلیان لەدژی داگیركار تەیار دەكرد، زۆربەی ئەو گەلانە لەتێكۆشانیاندا بەقوربانیدانی خۆیان‌و بەهیمەت‌و سمبولگرتنی شۆڕشی ئۆكتۆبەر، خەباتی خۆیان دەبردە پێشەوە تاگەیشتن بەسەربەخۆیی و ئازادی، دواتریش ئەم تێكۆشەرانە، حزبی شیوعی تایبەت بەخۆیان دروستكردو ، چوونە بەرەی بلۆكی سۆسیالیستی بەسەركردایەتی یەكێتی سۆڤێت.

شۆڕشی ئۆكتۆبەر ئیلهامی هەموو تێكۆشەرانی ئازادی‌و عەدالەتخوازی جیهانی بوو، بەسەدان لەسەركردەو كادیرانی حزبە شیوعی‌و سۆسیالیستی و كرێكارییەكان، گیانی خۆیان لەپێناو ئامانجە مەزنەكەدا، كەئەویش بیانكردنی دەوڵەتی عەدالەتی كۆمەڵایەتی‌و یەكسانی‌و نەهێشتنی چەوسانەوەی ئینسانەكان.

لەنێو گەرمەی ئەو تێكۆشانەدا، كاتێك جیهانی رۆژئاوایی‌و سەرمایەداری، رێكخراوی ناتۆی سەربازی دروستكرد، بلۆكی سۆسیالیستی بەسەركردایەتی یەكێتی سۆڤیەت، بەتایبەتیش دوای سەركەوتنی شۆڕشی میللی حزبی شیوعی لەچین‌و راگەیاندنی حكومەتی ئیشتراكی وهەروەها سەركەوتنی شۆرشی شیوعیەكان لە كۆباوكۆریای باكور‌و ڤیتنام‌و یۆگسلاڤیا، رێكخراوی وارسۆ دروستكرا بەمەش ، بلۆكی سۆسیالیستی هێزی بەرامبەری و هاوسەنگی دروستكرد.لەشەڕی دووەمی جیهانیدا، سوپای سوور ، توانی بەقوربانیدانێكی بێ شومار ، جیهان لەزەبروزەنگی هیتلەر و هاوپەیمانەكانی رزگاربكات.

هەر لەنێو گەرمەی ئەو تێكۆشانەو بەرئەنجامی شۆڕشی ئۆكتۆبەر ، شیوعیەكانی كوردستان‌و عێراق و لەچوارچێوەی حزبێكی شۆڕشگێڕدا، ئەوپەڕی تواناو قوربانیدانیان پێشكەش بەتێكۆشانی گەلانی ناوچەكە كرد ‌و لەم پێناوەشدا، بەهەزاران شەهید‌و زیندانی بەخشی ، كەتائێشتاش جێگای شانازی پێوەكردنە.

لەدوای نەمانی بلۆكی سۆسیالیستی ، جیهان هاوسەنگی خۆی لەدەستدا، بەم هۆیەش ئەمریكاو هاوپەیمانە رۆژئاواییەكانی، كوشت‌وبڕ‌و تێشكاندنی شۆكی گەلان، لەژێرسایەی تیۆری فەوزای دروستكراو، گەلانێكی زۆریان دوچاری شەڕو كاولكاری كردۆتەوە، بەتایبەتی لەرۆژهەڵاتی ناوەڕاست كەسەرەتاكەی لەئەفگانستان دەستی پێكرد‌و پاشان بۆ ئەفریكیا‌و وڵاتانی عێراق‌و سوریا‌و لیبیا‌و یەمەن‌و شوێنەكانی دیكە، ئاگری ماڵوێرانی پەڕیوە، كەهەر رۆژەی لەژێر ناوێك ، گروپێكی تیرۆریستی دروست دەكەن‌و پاشان هەوڵی لەناوبردنی دەدەن، كەتەنها سوتەمەنییەكەی گەلانی ئەو وڵاتانە دەبێت كەئەم فەوزایەی جیهانی سەرمایەداریی‌و دەزگا موخابەراتییەكانیان دروستی دەكەن بۆقازانجی كۆمپانیاكانی چەك فرۆشتن‌و نەوت بەتاڵان بردن.

یادكردنەوەی شۆڕشی ئۆكتۆبەر لەسەد ساڵەیدا، سیمبولێكە بۆ پێویستی تێكۆشانی هاوبەشی جیهانی لەێناو ئازادی‌و عەدالەتی كۆمەڵایەتی، لەپێناو بەردەوامیدان بەخەباتی گەلان لەرێگای حزبەكانی شیوعی و سۆسیالیستی و چەپ‌و دیموكراتخوازەكان، تاگەیشتن بەجیهانێكی نوێی كەتێیدا ئازادی‌و یەكسانی مسۆگەر بكرێت.

شاندی حزبی شیوعی كوردستان، لەپاڵ هەموو حزبە شیوعیەكانی جیهان ، 100ساڵەی شۆڕشی ئۆكتۆبەر بەرز رادەگرێت‌و بەشداری ئەو میهرەجانە جیهانیە دەكات كەلەروسیا بەڕێوە دەچێت‌و بەمەش پابەندی خۆی بۆ پێویستی بەرەیەكی جیهانی شیوعی‌و سۆسیالیستیەكان بۆئامانجی گەیشتن بەجیهانێك كەتێدا جێگای چەوسانەوەی مرۆڤی تێدا نابێتەوە، بەشێوەیەك لەگەڵ تایبەتمەنی هەر ناوچەو گەلێك‌و وڵاتێك بگونجێت، كەمسۆگەری سەركەوتنی ئەم شۆڕشە دەكات.