ئەم هەواڵە بڵاوبكەوە
FaceBook  Twitter  

دوای ئەو ڕۆژە وەرچەرخاندێکی بنەڕەتی لە نێوان حکومەتی بەغداد و حکومەتی هەرێم دا ڕویدا. بەغداد شەڕی ڕاگەیاند دژی هەولێر و کورد!! بێجگە لە شاری کەرکوک و دوزخورماتو. پەلاماری چەند ناوچەیەکی تری داو بەیەکدادان و کوشتار ڕوی دا. چونکە پێشمەرگە بڕیاری دا بەر بەو هێرشە سەربازیەی بەغداد بگرێت...

حکومەتی بەغداد. خۆی بەسەرکەوتو ئەزانێ و سواری سەری خۆی بوە و هەر لەو ڕوانگەیەوە ئەیەوێ گفت و گۆ لەگەڵ هەرێم بکات!! مەرجی خۆی فەرزبکات!!

ئەیەوێ هەمو ناوچە دابڕێنراوەکان بخاتەوە ژێر دەستی خۆی!! هەمو بازگەکانی سنورەکان, فڕۆکەخانەکان و سەرچاوەکانی نەوت و گازی هەرێمی کوردوستان کۆنترۆڵ بکاتەوە!! سنوری دەسەڵاتی هەرێم بگەڕێنێتەوە بۆ سنوری حوکمە زاتیەکەی سەدام حوسەین واتە ٢٠٠٣ !! هەر لە ئێستاوە بودجەی هەرێمی کوردوستانی لە ڕێژەی ١٧% وە دابەزاند بۆ ١٢,٦% !! بەم نیازەی بەغداد فیدرالیەکەی هەرێم وەک لامەرکەزیەکی پارێزگاکانی تری لێ دێ!!! ئەمە نیاز و مەبەستی ئایندەی حکومەتی بەغدایە. بەپێی ڕاپۆرت و هەواڵە جۆراوجۆرەکان سەرۆک وەزیرانی عێراق ئەم کەین و بەینەی لەگەڵ چەند کەسان و لایەنێکی کوردوستانی دا تاوتو کردوە و نەخشەی بۆ بڕیار داوە و ئەمریکا و فەرەنسا و بەریتانیاش ئاگاداربوون!!

ئەم بەسەرهات و بارودۆخە خەڵکی کوردوستانی هاویشتە گێژاوی دورێیانێکەوە. مەبەستم خەڵکە هۆشیارو دیموکراسخواز و نەتەوە و نیشتمان پەروەرانە... یان ئەوەتە مل کەچی وەزعە سەپێنراوەکە بن. یان ڕێگە بە جێبەجێکردنی ئەو پیلانەی حکومەتی بەغدا نەدەن...

بەڵام سەبارەت بەبەرهەڵستی کردن , جەماوەرەکە هەست ئەکات بێ تەنزیمە, بێ سەرکردەیە, بێ بەرنامەیە! ڕوناکیەک لە ئاسۆدا بەدی ناکات. چونکە حزب و لایەنە سیاسیەکانی کوردوستان بەشی هەرە زۆریان بەهۆی ئەو ڕوداوانەوە تووشی لێک ترازان و شڵەژان بوون گەلێکیان قاسەکانیان پڕومڕ بوە و ئەیانەوێ دەست بە کڵاوەکەیانەوە بگرن با نەیبات بەشێکی تریان وەکو دەرکەوت هاوکاری حکومەتی بەغداد/ ن وەدەستیان لە داڕشتنی پیلانەکەدا هەیە!! 

ئەوەیەش کە ئەمێنێتەوە , لاوازە, دەست کورتە, پەرش و بڵاوە !! بێ سەرکردەیە.

بە واتایەکی ڕوناکتر بەربەرەکانی کردنی نیازی حکومەت بەغداد پێویستی بەسەرکردایەتیەکی شۆرشگێڕ هەیە کە جەماوەرەکە ڕێک بخات ـ ئاڕاستەی بکات. بە پێی بەرنامەیەکی واقعی پڕ بەپێستی ئەم ڕۆژگارە کە پیم وایە وەک هەنگاوی یەکەم خۆی لەم خاڵانەدا ئەبینێتەوە ـ

ا ـ لەڕوی سیاسیەوە

١ ـ ڕیگەنەدان بە دابەش کردنی هەرێم کە بکرێ بە دو ئیدارەوە.

٢ ـ ڕێگەگرتن لە تەجاوزکردنی دەسەڵاتەکانی حکومەتی هەرێم (سیاسی, ئیداری , دارایی و ئەمنی) ....

٣ ـ پێک هێنانی ئیدارەیەکی هاوبەش (بەغداد و هەرێم) بە بەشداری کردنی پێکهاتەکان بۆ هەڵسوڕاندنی کاروباری ناوچە دابڕێنراوەکان بە (کەرکوک) یشەوە. تا ئەو کاتەی کێشە کە چارەسەر ئەکرێ.

٤ ـ دەست کردن ب گفت گۆی جدی لە نێوان (هەرێم و بەغداد) دا, بەبێ مەرج لە سنوری ماوەیەکی دیارکراودا و بە بەشداری کردنی نەتەوەیەکگرتوەکان بۆ چارەسەر کردنی سەرجەم کێشەکان.

٥ ـ ڕێگەنەدان بە تەعریب و تێکدانی باری کۆمەڵایەتی کەرکوک و ناوچەکان.

٦ ـ زامن کردنی زەمینە و کەش وهەوایەکی گونجاو و لەباری سیاسی و ئەمنی و کۆمەڵایەتی ئەوتۆ کە یاریدەربێ بۆ سەرخستنی وتووێژەکە.

داخوازیە بەپەلەکان

١ ـ گەڕاندنەوەی خەڵکە ئاوارە و دەرکراوەکان بۆ شوێنی خۆیان بەبێ چەند و چون.

٢ ـ بژاردنەوەی هەر زەرەرو زیانێک کە پێیان گەیشتوە.

٣ ـ محاکەمەکردنی تاوانکارەکانی (حەشد)!

٤ ـ ئاوەدانکردنەوەی خانو و دوکان و گوندە کاول کراوەکان.

٥ ـ کێشانەوەی (حەشد) و هەر هێزێک کە دوای ١٦/١٠ براوەتە ئەو ناوچانە.

٦ ـ بەتاڵکردنەوەی هەر فەرمان و بڕیارێک کە دژی هاوڵاتیان لە بەغدادەوە دەرچوە.

٧ ـ ڕاگرتنی ڕەفتاری (جەندرمە) کاری دژی هاووڵاتیان.

دەبا هەمو چەپ و دیموکراسیخواز و نەتەوە و نیشتمان پەروەرەکان یەک بگرن لە پێناو ئەم بەرنامەیەدا.