ئەم هەواڵە بڵاوبكەوە
FaceBook  Twitter  

1  ئه‌وه‌ی له‌ خۆپیشاندانه‌كاندا گه‌شه‌یكردووه‌، ڕه‌تكردنه‌وه‌ی كۆی لایه‌نه‌ سیاسییه‌كانه‌. ئه‌م بێ‌باوه‌ڕییه‌ به‌ لایه‌نه‌كان، ده‌كرێت ئیشی درێژخایه‌نی له‌سه‌ر بكرێت بۆ باوه‌ڕێكی په‌روه‌رده‌كراوتر له‌ داهاتوودا. مێژوو ئه‌م ساتانه‌ ونناكات، چونكه‌ ئه‌م ساتانه‌ درێژه‌ی خۆپیشاندان و چالاكییه‌كانی ساڵانی ڕابردوون. كۆی چالاكییه‌كان پێكه‌وه‌ ئاكامێك جێده‌هێڵن و پێناچێت له‌ئێستادا هیچ ئاكامێكی ڕوونی لێ بكه‌وێته‌وه‌(هۆكاره‌كان زۆرن). به‌ڵام به‌رده‌وامیدان به‌ خۆپیشاندان، نه‌ریتێكی به‌ره‌نگاری جێده‌هێڵێت و سبه‌ی سه‌دان و هه‌زاران میراتگری ڕاسته‌قینه‌ی بۆ په‌یداده‌بێت.

 2  ئه‌وه‌ی له‌ كۆی دۆخه‌كه‌ و ناو خۆپیشانده‌رانیشدا به‌دیده‌كرێت، نه‌بوونی تیۆرێكی شۆڕشگێڕانه‌یه‌. تیۆری شۆڕشگێڕانه‌، واته‌ خه‌ڵك به‌ده‌قیقی نازانن و ناتوانن چییان ده‌وێت. یه‌كێك به‌ خه‌یاڵی ڕاپه‌ڕینه‌وه‌ دێت بۆ خۆپیشاندان، یه‌كێكی تر بۆ فشاری موچه‌، یه‌كێكی تر وه‌ك كه‌ڕنه‌ڤاڵێكی ئاسایی وه‌ریده‌گرێت و هتد. ئه‌مه‌ش یه‌ك شت ده‌رده‌خات: فه‌زای ڕۆشنبیری له‌ هه‌رێمی كوردستان، نه‌یتوانیوه‌ تیۆری شۆڕشگێڕی به‌رهه‌مبێنێت و پتر له‌ ڕه‌خنه‌ و كاردانه‌وه‌دا ژیاوه‌. ئه‌وه‌ی جێی تیۆری شۆڕشگێڕانه‌ی گرتۆته‌وه‌، گوتاری میدیا و ته‌له‌فزیۆنه‌كانه‌. تیۆری شۆڕشگێڕانه‌، به‌ ڕۆژ و دوو ڕۆژ به‌رهه‌منایه‌ت، خۆپیشاندانه‌كانیش بچوكده‌كاته‌وه‌ بۆ چالاكییه‌كی ڕۆژانه‌یی و ئه‌وپه‌ڕی وزه‌كه‌شی له‌ سوتاندنی باره‌گای لایه‌نه‌كاندا سه‌رفده‌بێت(به‌بێ ئه‌وه‌ی ده‌ست بۆ چه‌ندین شوێنی سه‌رمایه‌داری ببرێت كه‌ دیسان به‌رده‌وامیپێده‌ری ده‌سه‌ڵات و سیسته‌مه‌كه‌ن). به‌بێ تیۆرێكی شۆڕشگێڕانه‌ كه‌ ئامانجی یه‌كلاكه‌ره‌وه‌ی خه‌ڵك دیار بێت، پێده‌چێت قوربانیی زیاتری لێ بكه‌وێته‌وه‌ و ئاكامی ئه‌وتۆشی نه‌بێت. بۆنمونه‌ قسه‌وباس له‌ ڕێبه‌رایه‌تی، خۆی پرسێكی تیۆرییه‌ و له‌ غیابی تیۆری شۆڕشگێڕانه‌دا درووستده‌بێت.

 3  گرێ‌كوێره‌كه‌ وه‌ك خۆی ماوه‌ته‌وه‌ كه‌ جووڵانه‌وه‌كان له‌ ناوچه‌ی سلێمانی دان. مه‌ترسییه‌كه‌ هه‌ر ئه‌وه‌ نیه‌ كه‌ جووڵانه‌وه‌كه‌ قه‌تیس ده‌بێت، به‌ڵكو تۆڵه‌ی حیزبایه‌تی له‌ خوێنی خه‌ڵكدا خاڵی ده‌كرێته‌وه‌. واته‌ مادام ئه‌ولا كپه‌ و سه‌ركوتكراوه‌، هه‌ر "تێكدانێك"ی ئێره‌ش باجی زۆری له‌سه‌ر دانراوه‌‌. بۆ كردنه‌وه‌ی ئه‌م گرێ‌كوێره‌یه‌، نابێت دانیشین و ده‌بێت چاو له‌ ئاینده‌، چاومان له‌ ناوچه‌ی هه‌ولێر و بادینانیش بێت. خه‌ڵك خۆی ده‌توانیت له‌ داهاتوودا، به‌ هه‌زاران كه‌س به‌ره‌و ئه‌و سنوره‌ بكه‌وێته‌ڕێ و فۆرمی تازه‌ی خه‌بات دابهێنێت كه‌ لایه‌نه‌ سیاسییه‌كان ناوێرن تاقیی بكه‌نه‌وه‌.

 ئێستا له‌ هه‌مووكات زیاتر كاتی قسه‌كردنه‌، كاتی بیركردنه‌وه‌یه‌‌، كاتی ئه‌وه‌ی به‌ جۆرێكی "هێمنتر" بیربكه‌ینه‌وه‌ و درێژه‌ به‌ جووڵانه‌وه‌كه‌ بده‌ین، هێمنییه‌ك له‌ بیركردنه‌وه‌دا نه‌ك ئه‌و هێمنییه‌ی كه‌ كۆی لیست و لایه‌نه‌كان وه‌ك "تاكتیك" به‌ خه‌ڵكی ده‌فرۆشنه‌وه‌. هه‌وڵده‌ده‌ین له‌م ڕۆژانه‌دا من و هه‌ندێ له‌ هاوڕێیانم له‌ زنجیره‌یه‌ك سیمینار و دانیشتندا، له‌ڕێگه‌ی‌ ڕاگه‌یاندنه‌وه‌ درێژه به‌م قسه‌وباسانه ‌بده‌ین..

  • 1