ئەم هەواڵە بڵاوبكەوە
FaceBook  Twitter  

[14] ی نیسانی ئەمساڵ، [70] ساڵ تێدەپەڕێت بەسەر دامەزراندنی یەکیتی گشتی خوێندکاراندا.

بەر لە [70] ساڵ لەم ڕۆژەدا  لە بەغدا لە گۆڕەپانی [سباع] کۆمەڵێک گەنجی چەپ ڕوونتر بڵیم ئەندام و لایەنگرانی حیزبی شیوعی عیراق ، کۆبوونەوە و لەوێدا بڕیار درا ئۆرگانیک بۆ خوێندکاران پیک بهێنن ، هەر لەو بۆنەدا  شاعیڕی کۆچکردو جەواهیری مەزن و دۆستی کورد ، پارچە هۆنراوەیەکی پێشکەش بەو کۆنفرانسە  کرد.

لەو ڕۆژەوە تا ئیستا ئەو ئۆرگانە خوێندکاریە  لە پێناو دۆزی خۆیندکاراندا، مەشخەڵی  خەباتی هەڵگرتووە ،هاوکات بەشداری  کارای هەبووە لە تێکۆشانی  جەماوەریدا  .   نەوە لە دوای  نەوە  خوێنکارە شۆڕشگێڕەکان خۆیان لە ڕیزەکانی ئەو ڕێکخراوەدا بینیوەتەوە ، کە پێدەچێت لە دامەزرێنەران  کەس لە ژیاندا نەمابیت .

بەنەدەش وەک کەسێکی چەپ ،سەرتا لە ڕێزەکانی ئەو ڕیکخراوەدا خۆم بینیەوە. باش لە یادم دیت کە لە هەڵەبجە لە قۆناغی ناوەندی بووم،بەو ڕیکخراوە ئاشان بووم، ئەویش لە ڕێگەی کۆچکردو ئازاد محمود شریف و بەڕێز سەباح محەمەدەوە  بوو  کە لەمن بەتەمەنتر بوون. ئێمە لە ناوەندی شارەزوور چەند ئەندامێک بووین وە تا ڕادەیەک لە نیو خوێنکاراندا ناسراو بووین. نەوەک بەڕێزێک لێم زوویر ببێت کە ناویم نە هێناوە ،بۆیە ناوی کەس ناهێنم ،تەنها هێندە دەڵێم یەکێک لە ئەندامە چالاکەکانمان کۆچکردو ئیسماعیل ئەحمەد بوو کە لە کیمیابارانی هەڵەبجەدا  خۆی و سەرجەم  خێزانەکەی  شەهید بوون ،  ئیسماعیل کەسێکی زۆر هەژا ،هاوکات هیمن و   کەمدوو بوو.

 دەمێک هاتمە سلیمانی بۆ خوێندن لەوێش لە ئامادەیی کشتوکاڵی بەکرەجۆ  پەیوەندیم کرد بە برادەرانەوە . وەک لە یادم بێت ئەو دەمە کاک بەهادین  قەرەداغی  بەرپرسی خوێندکارانی گشتی بوو  لە ئامادەیی کشتوکاڵ.بۆساڵی دوایی کاک  بەهادین قەرەداغی  تەخەرجی کرد ، بۆیە من وەک بەرپرسی ئامادەییەکە دەستنیشان کرام. دەبوو شەهید ئەکرەم عەبابەیلێی کە ساڵیک لەپێش من بوو ، ببیتە  بەرپرس ،بەڵام بەهۆی ئەوەی چالاک نەبوو ،وە خۆشی هێندە ئارەزووی  نەبوو بۆی ، نەکرایە لێپرسراو.

لە سەرتایی ساڵی سێییەمدا  بەندە لە کۆنفرانسێکدا کە لە سلیمانی بەسترا ، کرامە بەرپرسی خوێندگا پیشەییەکان ،کە [ئامادەیی کشتوکاڵ ،پیشەسازی ،بازر گانی] هەروەها  پەیمانگای ئیسلامی لە خۆ گرتبوو  {لەو پەیمانگایە [5-6] ئەنداممان هەبوو، کە  وەک لە یادم بێت یەکیک لەوانە {محەمەد  رەنجاو} بوو خەڵکی قەلادزی کە یەکیک لە شاعیر بەتواناکانە لە ئیستادا}

هەر لەو کۆنفرانسەدا  شەهید عەبدەلقادر بەرزنجی کە هاوپۆلم بوو، کرایە بەرپرسی ئامادەیی کشتوکاڵ.

ئامادەبوونم لە یەکەم یادکردنەوەدا

وەک لە یادم بێت  وابزانم ساڵی [ 72 ]بوو  لە  نزیک سەرچنار لە شوێنێک کە هەڵە نەبم  پێیان  دەگووت [چەقچەق] لەوێ لە ڕۆژێکی کەشو هەوا خۆشدا  لە ڕۆژی 14/4 یادی دامەزراندنی ئەو ڕیکخراوە خوێندکاریەمان کردوە .

ڕۆژێک پێشتر لە ڕێگەی هەمان ڕیکخراوەوە، ئاگادار کراینەوە کە بچنە فڵان شوین بۆ یادەکە .

لەوێ   لە ناو ئەو چەو و زیخەدا نزیک جۆگەلەی ئاوەکەی سەرچنار ، چەندین لافیتە بە زەویدا چە قێنرابوون  کە گووزارشتیان لە یادەکە دەکرد.عریف حفل لە پشتی لافیتەکانەوە برگەکانی پێشکەش دەکرد ، لە یادم نیە کێ وتاری ڕێکخراوەکەی خوێندەوە ، وێرای خوێندکارە کوردەکان ژمارەیەکی زۆریش لە خوێندکارانی عەرەب کە لە زانکۆی سلیمانی دەیانخوێند ئامادەبوون . بەهۆی ئەوەی ڕیکخراوەکە مۆڵەتی نەبوو بڕێک بە حەزەرەوە دەجوڵاینەوە و لە دوورەوە چاودێر دانرابوون بۆ چاودێری  دۆخەکە . خۆشبەختانە هیج ڕووی نەدا ،پاش بڕگەی وتارو بروسکەی پیرۆزبایی  و هیتافات و شعر خوێندنەوە هەندێک  گۆرانی پێشکەشکرا و بە دوایدا  بڕێک هەڵپەڕکی  کرا  .

پاش پتر لە دوو کاتژمێر کۆتایی بە مەراسیمەکە هێنرا.

ئەوانەی ئارەزووی مەیخواردنەوەیان  هەبوو کە بەندەش یەکێک بوو لەوانە،  چوینە باڕەکانی سەرچنار و هەندێک بیرەمان نووشی و ئەوانی دیکەش  یا پیاسەی سەرچناریان کرد  یا بەرەو شار گەڕانەوە.

پیرۆزبیت یادی[70] ساڵەی  دامەزراندنی ئەو ڕێکخراوەی کە فێرگەیەکی سەراتایی بوو   بۆم ،کە هەر  لەوێوە یەکەم هەنگاوم  بۆ دونیای سیاسەت نا.

  • 1