ئەم هەواڵە بڵاوبكەوە
FaceBook  Twitter  

هەڵبژاردن كۆتایی هات بەڵام تێكۆشان بەردەوامە

پارێزەر ڕەمزیە جەباری

ئەزمونێكی سەختمان بەڕێ‌ كرد، بەڵام بەداخەوە نەبووەئەو ئەزمونەی خەونی هەژاران بێننَتەدی، زۆر شتی نوێ فێربووین، بەڵام پێویستە لە خەڵكەوە نزیكبین تاكو زیاتر فێربین.

لەم پرۆسەیەدا، زۆر كەس و خاونەوادەی بەڕێز، لە ماڵان و لە شەقام پێشوازییان لێكردین، كە زۆربەی هەرە زۆریان خەڵكانێكیبێدەرامەت و كەمدەست بوون. لە ڕیزی هیچ بەرەیەكدا خۆیان ڕێكنەخستووتەوەو بەتاسەوە بوون ڕۆژێك حزبێك یان بەرپرسێك سەردانیان بكات و عەرزی حاڵی خۆیانی بۆ باس بكەن،زۆر كوچەو كۆڵان و گەرەكی پەراوێزخراومان بینی، خۆڵ و خاشاك ژینگەی لێ پیس كردبوون.گلەیی و گازندە و ڕەخنەی لاوان و ئافرەتانێكیبێكاری زۆرمان بیست،كە هیچ كەس گوێی لە داواكانیان نەگرتبوو، هەر لەم ماوە كورتەدا،لە یەكی ئاداردا، كرێكارانی كورد و عەرەب و توركمان و كلدۆئاشوری زۆرمان بەسەر كردەوە، بەڵام تا پیرۆزباییمان لێنەكردن، نەیان دەزانی ئەوەیەكی ئادارە و ڕۆژی ئەوانە.ئاستی هەژاری وام بینی ئەگەر باسی بكەم ڕەنگە باوەڕم پێنەكرێت. ئەمانەو سەدان و هەزاران حاڵەت و دیاردەی جیاجیا لە كێشەو مەینەتییەكانی هاوڵاتیییان كە نەبینراون و نەبیستراون. تاڵی و سوێری ژیان لەشكرێك لە خەڵكی لە گۆشەی پەراوێزیدا كۆكردووەتەوەو نازانن چۆن و لەگەڵ كێدا خۆیان ڕێكبخەن و بڕوایان بەم حزبانە نییە چارەسەری دەردی حاڵیان بكات. قورسترین پرسیار كە وەڵامەكانمان هیچ هیوایەكی بۆ ئەوان دروست نەدەكردن ئەوە بوو،كاتێك دەیانووت ئەوەی بە ئەنفال و كیمیاباران و دەیان هەزار شەهید بەدەستمان هێنا، بە ناپاكی لە دەستمانیان داو هەندێكیان بە هەنسك و گریانەوە بۆ ڕۆڵە شەهیدەكانیان، دەیانووت تەنها بەختەوەرییەك هەمان بوو لە 16 ی ئۆكتۆبەردا لەدەستیان داین، ئیتر چۆن جارێكی تر دوای ئەم كارەساتە بچینەوە سەر سندوقی دەنگدان.ئەوەندە ئێشوئازاریان هەبوو، لە بریتی ئەوەی ئێمە باسی هەڵبژاردنیان بۆ بكەین، ئەوان سەدان بابەتی ئازار بەخشیان بۆ دەگیڕاینەوە. مەینەتی كەركوكییەكانبێوێنەیە،ئەوان لە بارودۆخێكی وادا بەشداری پرۆسەی هەڵبژاردنیان كرد، ئەمانەی بینیوومن مشتێكە لە خەروارێكیان دڵۆپێكە لە دەریایەك. بەڵام، لەگەڵ هەموو ئەمانەشدا زۆر لاوی خوێن گەرم و ژن و پیاوی بە ئەزموونمان بینی و فێری بەردەوامی و خۆڕاگرییان كردین.

پرسیار ئەوەیە، كاتێك لەبەرامبەر تابلۆیەكی وا تراژیدا دەوەستین، دەكرێت لە میانەی پرۆسەیەكی هەڵبژاردنەوە تەماشای بكەین و بەتەواو بوونیهەڵبژاردنێك ئەو مەینەتییانە كۆتایی دێت؟ یان ئەمە تێكۆشانێكی بێووچانی دەوێت؟ وەڵامی ئەم پرسیارە، وام لێدەكات بڵێم هەڵبژاردنمان بەڕێ كرد ، بەڵام، كات و شوێن و شێوازی تێكۆشان بێسنوورە و ئەبێت لە پێناو گۆڕینی ئەو واقعە تاڵەو سڕینی فرمێسكی دایكی شەهیدان و هێنانی خەندە بۆ سەر لێوی منداڵە چاو گەشەكانی گەلەكەمان بەجۆرێكی تر خۆمان ڕێكبخەینەوەو لە تێكۆشان بەردەوام بین.بە تایبەتی دوای ئەوەی هەردو حزبی دەسەڵاتداری هەریم لەگەڵ هاوشێوەكانیان لە عێراق گەورەترین تاوانی گزی كردنیان دەرحەق بە دەنگی دەنگدەران ئەنجام داوەو پێویستە بە سزای خۆیان بگەن.

من وەكو یەكێك لە كاندیدەكانی لیستی حزبی شیوعی كوردستان لە بازنەی كەركوك ، سوپاس و پیزانینی خۆم ئاراستەی حزبی شوعی كوردستان دەكەم، بۆ ئەو ئەركە قورسە كەمتمانەی كاندید كردنی بە من بەخشی، زۆر سوپاسی كەسوكاری سەربەرزی شەهیدان و یەكەبەیەكەی هاوڕێیان دەكەم، كە خۆبەخشانەو خۆنەویستانە، بە گەشبینییەكی پڕ لە هیواوە بۆ ئایندەیەكی باشتر لە گوند و شار و لە بازاڕ و شوێنی كار و كوچەو كۆڵان و شەقامەكاندا، لیست و كاندیدانی حزبیان بە جەماوەری كەركوك و دەنگدەران لە ناووەو دەرەوەی شارەكەدا دەناساند. سوپاسی بێپایانی دەنگدەرانی لیستەكەمان لە كورد و عەرەب و توركمان و كلدۆئاشور و تەواوی كەركوكییەكان لە دەرەوەو ناووەی ووڵات دەكەم.لە هەمان كاتدا، هەرگیز ئەو پێشوازی و دەسپێشخەرییە گەرمەی خزمان و كەسوكارەكانی خۆم لە عەشیرەتی جەباریلە یاد ناكەم، كە لە كاتی بانگەشەی هەڵبژاردندا، بەپیرمانەوە هاتن و پەیوەندییان پێمەوە دەكرد و هەموو ئامادەییەكیان دەربڕی و بەشێكی ئەركەكانی منیان خستە ئەستۆی خۆیان.

لە كۆتاییدا، ئەوە دووپات دەكەمەوە، كە هەڵبژاردن بە وێستگەیەك لە تێكۆشان دەزانم و دەرەنجامەكەی هەرچی بێت دوای هەڵبژاردن، ئەبێت تێكۆشان هەر بەردوام بێت، جا لەناو هۆڵی پەرلەمان بێت یان، لە شەقام.خۆمان و دەنگدەرانی لیستەكەمان باش دەزانن، ئەوە دەرەنجامەی ڕاگەیەنراوە، ناڕاستەو ناپاكییان لێكردووین، تەزویر و ناپاكی دەسەڵاتداران لە متمانە و دەنگیدەنگدەرانمان، ساردمان ناكاتەوەو، ڕۆژێك دێت هەندێكیان ویژدانیان بجوڵێ‌ و ببنە شاهێدحاڵی ئەم ناپاكییە، كەئەمە كاریگەرییەكی خراپ لەسەر بارودۆخی كورد دروست دەكات، ئەوانە لێی بەرپرسیار دەبن كە یاری بە ئیرادەی گەلەكەمانەوە دەكەن. ئەوانە خەیاڵیان خاوە كە پێیان وایە دەنگی دەنگدەرانی ئێمە تەنها لە سندوقی هەڵبژاردندا قەتیس دەمێنێ‌ و نرخە بۆ كورسی پەرلەمان ، نەخێر ئەوە دەنگی بەرز و زوڵاڵی ئەوانەكە گۆڕانكاری بنەڕەتی بەدووی خۆیدا دەهێنێت و سەركەوتن هەر بۆ ئیرادەی گەلە.

 

  • 1