ئەم هەواڵە بڵاوبكەوە
FaceBook  Twitter  

(عەزیز نەسین) گەورە رۆشنبیرو چیرۆك نووسی تورك لە كتێبی (بیرەوەری دوور خراوەیەك) دا دەڵێت: ساڵی (1933) حكومەتی توركیا، بڕیاریدا دەبێت هەموو كەسێك نازناوێك بۆ خۆی دابنێت، بەڵام حكومەت هیچ میكانیزمێكی دانەنا بۆ چاودێری كردنی ئەو پرۆسەیە، بۆیەش هەركەسەو بە ئارەزووی خۆی و باشترین نازناوی بۆخۆی دانا، بۆ نموونە: تەمبەڵترین كەس ناوی خۆی نا زیرەك – ئەوەی لەمستێك ئاودا دەخنكا ناوی خۆی نا مەلەوانی دەریاكان، ترسنۆكترین كەس ناوی لەخۆی نا پاڵەوانی دێو بەزێن، خیانەتكار ناوی لەخۆی دەنا نیشمانپەروەر، نەخوێندەوار ببووە ئەفلاتۆن، لەهەمووی سەیرتر عەلەی دراوسێمان هەر خوێندەواریشی نەبوو ناوی خۆی نا (عەلەی خەت خۆش)! جا لەوەش خۆشتر ئەوەیە دواتر هەر ئەو عەلەیە بۆ بەڕێوەبەری بەڕێوەبەرایەتی خەت خۆشانی توركیاو تا ساڵێك پێش ئێستاكە قەزاو بەڵای مردن بۆ خۆی بردیەوە، عەلە تەنها یەك دێر نووسینی نەبوو.

منیش حەوت برا دەناسم و هەموویان حزبین و ئەندامن لەحەوت حزبی كوردستان – بۆ نموونە فەعۆ ئەندامە لەحزبی لای من ببە ئەندام دەتكەم بەڤاندام، تەحۆ ئەندامە لە حزبی وەك نەعامە سەری بخە ژێر لم و دنیا شەریفە شامە، قەدۆ ئەندامە لە حزبی قەسەم بەخوا بەس من راستم، فەتۆ ئەندامە لە حزبی ئەو نانە نانە ئەمڕۆ لەخوانە، قیتۆ ئەندامە لە حزبی لێدە عەلۆ برنجە، تەتۆ ئەندامە لە حزبی پارە هەموو شتێكە، شەحتۆ لە هەر حەوت حزب ئەندام بووە، ئێستا هەر حەوت برا خانەنشینی وەردەگرن تەحۆ بەناوی پێشمەرگەی دێرین فەعۆ بەناوی زیندانی سیاسی – قەدۆ كەم ئەندامی – فەتۆ پیاوی ماقوڵانە – قیتۆ برینداری سەنگەر – تەتۆ ئاوارەو دەربەدەر – شەحتۆ خۆیشی لێی بپرسی نازانی بۆچی خانەنشینكراوە، بەڵام ئەو حەوت برایە رۆژێك لە رۆژان ئەندام نەبوونە لە هیچ كامێك لە حزبێكی شۆڕشگێڕ، كەدەرۆن بۆ مووچە وەرگرتن زۆرجار هەڵە دەكەن و هەریەكێكیان بەهەڵە دەچێتە بەڕێوەبەرایەتی موچە وەرگرتنی ئەویتر دیارە فەعۆ و تەحۆ و قەدۆ و قیتۆ و شەحتۆ‌و تەتۆ‌و فەتۆ تاكە شتێك لەژیان كە بەراستی هەو بووبن هەر حەوتیان بەعسی بوون.

  • 1