ئەم هەواڵە بڵاوبكەوە
FaceBook  Twitter  

لەم ڕۆژانەدا دەنگ و باسێکى تازە پەیدابوە ـ گوایە ئەگەر سەر لە نوێ دەنگەکان بە دەست نەژمێرریتەوە یان هەڵبژرادن دوبارەنەکرێتەوە. ئەو لایەنانەى کە لە دەرئەنجامى هەڵبژاردنەکە ناڕازین بایکۆت لە پەرلەمانى عێراق ئەکەن ناچن بۆ بەغداد!! ئەم ڕایە جگە لەوەى کە زۆر سادەیە و دورە لە هەڵوێستى سیاسیەوە. بەتایبەتى لەم ڕۆژگارەدا کە عێراق و کێشەى کورد لە بارو دۆخێکى ئاڵۆز و ناسک دایە و چاوەڕوانى گۆرانکارى ئەکرێ لە تێکڕاى سیاسەتى عێراق دا.. ئەڵێم جگە لەوە ئەم هەڵوێستە خۆ دزینەوەیە لەو ئەرکە نەتەوەیى و نیشتمانیەى کە چاوەڕوانى نوێنەرانى کورد ئەکات لە پەرلەمانى عێراق دا. بگرە بەتەنگەوە نەهاتنە!!

ئێوە ئەگەر نەچن بۆ بەغداد ڕەوڕەوەى کاروبارى وڵات ڕاناوەستێ؟ بگرە لەوانەیە نەیارانى کورد پێیان خۆش بێ چونکە هیچ نەبێ لە بۆڵە و کێشمە کێشى ناو پەرلەمانەکە ڕزگاریان ئەبێ!! چونکە بەڵایەکیان لەکۆڵ ئەبێتەوە!!

ئێوە بایکۆت ئەکەن بەتەماى چین؟ پەرلەمانێک بۆ خۆتان دروست ئەکەن؟ بەشێک لە کوردوستان بۆ خۆتان دائەبڕن؟ لە بەغداد جیا ئەبنەوە؟! ئەچنە ماڵەوە دائەنیشن!!

لەم پێکهاتەیەى عێراق و هەرێم دا کەسى سیاسى ئەبێ بە دڵنیاییەوە چاوەڕوانى ( گزى و فزى و دەست تێوەردان لە هەڵبژاردنەکاندا بکات) ئەم ساختە کارییە دەرهاویشتەى واقعى سیاسى و کۆمەڵایەتى عێراق / ه. ئەمە ئەنجامى دەست تێوەردانى بێگانەیە!! ئیتر بۆ سەیرە بەلاتانەوە؟

کۆمەڵانى خەڵک چاوەڕوانن نائبەکان بچن لە پەرلەمانى عێراق دا داوا بکەن پارەى دەغڵ و دانى جوتیارانى هەرێم کە چوار ساڵە دواخراوە. بەزوترین کات پێیان بدرێ حسابى دواخستنى ئەم چوار ساڵەیان بۆ بکرێ!!

جەماوەرى کوردوستان بە تەمابو نائبەکان لە بەغداد پێ داگربن کە سنورێک بۆ هەڵسوکەوت و مامەڵەى دوژمنانەى (حەشد) لە ناوچە دابڕێنراوەکان دابنرێ. بەتەمابون هەوڵ بدەن گەمارۆى ئابورى لەسەر هەرێم لابدەن. رێگاى کەرکوک ـ هەولێر بکەنەوە!! کە بە عەمدى داخراوە؟!

ئەم ساختکارییەى کە بوە بە کێشە. لە هەرێمى کوردوستان دا دام و دەسگاى تایبەتى هەرێم و چاودێرانى لایەنەکان سەرپەرشتیان کردوە. نەک کاربەدەستانى بەغداد!! ئیتر مانگرتن لە پەرلەمانى بەغداد ماناى چیە ئەگەر شەڕى هەریسەکە نەبێ. ئەگەر بەزین کۆڵدان نەبێ!!؟

من دڵنیام کە سەرکردەکانى ئەم لایەنانە خۆیان زۆرباش لێیان ڕوونە کە ئەمڕۆ چ کێشمە کێش و ململانێیەکى نێو دەوڵەتى و هەرێمایەتى لەسەر عێراق و هەرێمى کوردوستان هەیە (لەسەر نەوت و گاز و بازاڕ). بەڵام ئەوە هەست پێ ناکەن کە خۆیشیان کەوتونەتە بەرتەوژمى ئەو لافاوە؟ 

ساختەکارى و دزى و پەیدابونى ملیار دێرەکان تەنانەت دەسەڵاتەکانیش دەرئەنجامى ئەم بارو دۆخە شپرزەیەیە!!

خەڵکى برسى و بێکار کە گوێیان لەم بالۆره یە ئەبێ ئەپرسن بۆچى پارو پێرار پەرلەمانتارانى هەرێم لە بەغداد چییان بۆ کردون تا لە خەفەتا دەست لەئەژنۆ دابنیشن!!

 

 

 

  • 1