ئەم هەواڵە بڵاوبكەوە
FaceBook  Twitter  

ئەوان واتا دەرەبەگەكان لەسەر هەڕەشە و گوڕەشەكانیان بەردەوام بوون هەموو هەوڵێكیان دەدا كەس هاوسۆزی لەگەڵ جوتیاران نەبێت، بەپێچەوانەوە ئێمە وەك حزبی شیوعی پێش ئەوەی رێكخراوێكی جوتیاری دروست بێت بەرنامەی حزبمان جێ بەجێ دەكرد و من وەك بەرپرسی یەكەم(سەلام عومەر)وەك نوێنەری حزبمان لە بەرەی كوردستانی نوێنەرمان لە یەكێتی جوتیارانی كوردستان لە قەڵادزێ، لەكێشە و ئاریشەكان داكۆكی كەرێكی سەرسەختی مافە رەواكانی جوتیارن بووین، من لەگەڵ راگەیاندنیش بەوئاراستەیە، ریپۆرتاج، چاوپێكەوتن و لەگەڵ كەسایەتی گوندەكان وتارم دەنوسی، لە 30/1/1994 فەرماندەی هێزی چەكداری عەشایەری پشدەر لە قندۆڵ ئاگاداریەكیان بە نهێنی خستبووە حەوشەی ماڵەوە كە (2-3) جار قەڵەمی ژەهراویم دەخستە سەر كاغەز، جارێك بە خائن و جارێك هەرەشەم لێكردوون تۆڵەی جوتیارانیان لێ بكەمەوە، ئاگادارم دەكەن نوسەر دەبێت خزمەتی وڵات بكات نابێ بۆ ئارەزوی خەڵكی گێرە شێوێن و هەلپەرست قەلەم بخاتە سەر كاغەز ئامۆژگاریم دەكەن كە من منداڵم زۆری وەكو منیان بەسەهوبردووە.

ئینجا داوای برایەتیم لێ دەكەن و هۆشدارم دەدەنێ تۆزێك بیر بكەمەوە دوواتر بە قەولی ئەوان كەس بەری خراپەی نەخواردوە و دەشڵێن لە ئاخری پەشیمان دەبیەوە هەڕەشەدەكەن چیدی لەسەر ئەم مەسەلانە برۆم (تەعەمولی) هەموو مەسئولیەتێك دەبێ بكەم، ئەوە پەیامی گەرمی فەرماندەی هێزی چەكداری عەشایری لە پشدەر بوو لە قندۆڵ و هەڕەشەشیان كردووە شەوێك پەلاماری ماڵەكەی من و بارەگا بدەن كە بەیەكەوە بوون، هەندێ لە ترسان وازیان لە پێشمەرگایەتی هێنان.. لەبەرامبەردا ئێمە هەموو شەوێك بەجۆرەها چەكی گەورەو بچوك بەووریایەوە لە ئامادە باشیدا بووین. چەند شەوێكیش ترسنۆكانە دەستڕێژی گوللـەیان لە هاوڕێیانی پاسەوان و هاوڕێیانی دی لە بارەگا دەكرد خۆشبەختانە هیچ زیانی نەبوو دووشەویش لەسەریەك دوو ئارپێچی تەوقیت كراویان بەماڵی ئێمەوەنا.. گوللـەكان بەردیواری دەرەوە كەوتبوون كە زۆر نزیك بوو لە پەنجەرەی تیدا دانیشتبووین، هیچ زیانێكی نەبوو.

شەوێكیش لەبەری گەرمكات تەقەو هەرابوو خێرا بەپێ كە 40 دەقە دەبوو مەفرەزەیەكمان برد، گەیشتیەنەلایان كە پەڕینەوە هیچ روی نەدابوو چاومان پێیان كەوت و هەربەم شەوە گەڕاینەوە قەڵادزێ، جارێكیش گوندی چۆ مخركە داوایان لێكردین كە هەواڵیان لایە ئەم شەو ئاغاكان نیازیان وایە پەلاماری گوندەكەیان دەدەن، لە ئێوارەوە هێزێكمان برد بۆ حەرەسیات تانزیكی سەرلەبەیانی لەگەڵیان بووین، كاتێك كاك(هەمزە) كە جووتیارێكی لەسەرەخۆو بەڕێزبوو هات بۆ ئەوخاڵەی ئێمەی لێ بوین منی دیت واقی وڕما گووتی: دكتۆر ئەتوش لێرەی شەرتە لەوشەوەوە دەبت پێم بڵێن(هەمزە شیوعی) هەموو دامانە قاقای پێكەنین لەو شەوەوە ناومان لێ نا( هەمزە شیوعی) تا ئێستا هەروا بانگی دەكەم سەڕەڕای ناخۆشیەكان، روداوی خۆش و سەیرو سەرمەرەی ناخ هەژێن هەن، خۆشیەكانی بەردەوامن و نابڕێنەوە هەر كە یەكدی دەبینین ئەو ڕۆژە خۆش و ناخۆشانەمان دێتەوە یاد..

 

  • 1