ئەم هەواڵە بڵاوبكەوە
FaceBook  Twitter  

مێژوو سەلماندویەتی حكومەتی مەزهەبی نەك نایەوێ كێشە سەرەتاییەكانی میللەتە چەوساوەكان چارەسەر بكات، بەڵكو توانای ئەوەی نییە چارەسەر بۆ كێشە ئاساییەكانیش بدۆزێتەوە، لەنێویشیان بەسرەی داماوی زوڵملێكراو كە هەمیشە لەسەر پشتی ئەو شارە عێراق خۆی دەوڵەمەند كردووە كەچی بەشی ئەو شارە تەنیا خواردنی ئاوی ژەهراو و كەمی كارەبا و نەبوونی خزمەتگوزاری بووە. 

لەكاتێكدا بینیمان توڕەیی خەڵكی بەسرە و نغرۆبوون لە ئازار و مەینەتی، وایكرد چەندین بارەگای حزبی و كۆنسوڵخانەی ئێران بسوتێنن لەم شارە، بەڵام ئەمە ئەوە ناگەینێت خۆپیشاندەران توڕەیەكانیان بەتاڵكردبێتەوە، بەڵكو ئەوە زیاتر بەو ئاراستەیان دەبا كە دەڵێن: "ئێمە لە پێناوی نان و ئازادی ئامادەین هەموو شتێبكەین و تواناشمان هەیە".

خۆپیشاندەران لەكاتی سوتاندنی زۆربەی بارەگای لایەنەسیاسییەكان، دەستیان بۆ سوتانی بارەگای حزبی شیوعی نەبرد، چونكە مێژوو ئەوەی سەلاماند كە حزبی شیوعی تێوەگلاوی گەندەڵی نییە، ئەوە ئەوانەن كە تێوەگلاون نەیاری حزبی شیوعین و دژی جیهانی پێشكەتوون.

هەموومان بینیمان كە بۆچی خۆپیشاندەران پەلاماری بارەگاكانی لایەنەسیاسییەكانیاندا و پارێزگاریان لە بارەگای حزبی شیوعی كرد لە بەسرە؟ چونكە ئەوان دەیان گوت: "حزبی شیوعی ئەو حزبەیە كە هەمیشە لەشەقامەكان بووە بۆ داخوازی خەڵكی زوڵملێكرا و هەر لەو سەنگەرەش قوربانیەكی زۆری داوە بۆ ئەوەی نیشتمان ئازاد بكرێت لەدەست كەسانی زاڵم، بۆیە ئێمە نایسوتێنین، بەڵكو پارێزگاریشی لێدەكەین.

وڵاتانی عەرەبی لە چوارچێوەی خۆ دەوڵەمەندكردن و پشتگوێ خستنی خەڵكی هەژار و چەوساوە و نەدار، خەریكە وێنەی دەوڵەتێكی هەژار ، پیشانی خەڵكی سڤیل دەدەن.

ئەگەر سەیری دەوڵەتی عێراق بكەین كە ئێستا نزیكەی 37 میلیۆن كەس لەسەر خاكەكەی دەژین و بەوێنەی كارگەیەك هەموو رۆژێ لەبەرامبەر نەوت پارەی بۆ دێت، كەچی هاوڵاتیانیان بۆ مافەسەرەتایی و زەوتكراوەكانیان لەلایەن پۆلیس بە گوللـە وەڵامیان دەدرێتەوە، رۆژ نییە مەرگی ماف خوراوێك میوانی ماڵێكی بێ ناز نەبێت.

ئەو قسانەی خۆپیشاندەران ئەوە بە نەیارەكانی حزبی شیوعی دەڵێت، "ئەوە ئێوەن سەروەت و سامانی وڵات بە هەدەر دەدەن و بوونەتە بەرهەم هێنانی گەندەڵكاران، بونەتە پیاوی دەوڵەتان و دۆستی دوژمانی وڵاتمان، ئێوە لەپێناوی بەرگری كردن لەمافە مەدەنی و كۆمەڵایەتییەكان خەڵك دانەمەزراون و بۆیە بنچینەتان نییە، هەر بۆیەش ناتوانن گۆڕانكاری ریشەیی بكەن".

 

  • 1