ئەم هەواڵە بڵاوبكەوە
FaceBook  Twitter  

پێموابوو دوای هەڵبژاردن لە هەرێمی كوردستان پارت و لیستە براوەكان ئیدی ئەزموونێكیان وەرگرتوەو هەرگیز بەلای دزی و تەزویردا ناچن، كەچی وانەبوو كۆمسیۆنی باڵا چەندین شەكوای بۆهات و لیستی تەواوی دەنگدەرانیش لە دەستی نوێنەرەكانی پارتەكان گیران، پێناسی باری شارستانی و بەڵگە نامەكانی دی لە ژوورە تاریكەكان دەدرانە تەزویرچیەكان، هەر ئەوەندەنا كۆمسیۆنی ساوا بەبڕیارێكی هەڵەو پیرانە سەرووی نەوەد ساڵی بە مردوو و زیندوەوە هەڵدایە دەرەوەی بنكەكان و چەندین خەڵكی تێكۆشەر كە سەدەیەك خەباتیان هەبووە بێبەشكران لە دەنگدان كە ئەوەش پرۆسەكە دەخاتە ژێر پرسیارەوە.

پێموابوو لەكاتی بانگەشەكاندا ئاژاوە دروست نابێت و لیستەكان بەشێوەیەكی مۆدێرن ریكلام دەكەن، كەچی لەناو بانگەشەكان خەڵك گیراو بریندار بوو، هەروا لەكاتی هەڵبژاردنیش دیسانەوە بەسەر بنكەكاندادراو چاودێرەكانیان وەدەرنان، پێموابوو لیستی براوە بەتایبەت ئەوانەی ئەزموونیان هەیە لە دەسەڵات و سوپایان هەیەو ناویان ناوە جەیشی نیزامی، تەقەی خۆشی ناكەن، كەچی پێچەوانە دەرچوو، سەلماندیشیان كە میلیشیایان هەیە نەك سووپا، چونكە ئەم پارتانە لەهەموان باشتر دەزانن لەدوای تەقە خۆشیەكان ناخۆشی بەسەرهاوڵاتیاندا دەبارێ‌، خۆ هێشتا چاودێرە نێو دەوڵەتیەكان نەچوبوونەوە ئەم دیاردە ناشیرنە جارێكی دی دووبارە بۆوەو نموونەیەكی ناشیرین پیشان دەدات، ئاخر لەساڵی 1992یش بەهەمان شێوەبوو قەوانی بەتاڵ و وێنەی كاندیدەكان لە شەقامەكاندا كەوتبوون،

پێموابوو تۆمەت بەخشینەوە كۆتایی دێت و دوای ئەوەندە ساڵ ئەزموون پارتەكان بڕیاری هەڵە نادەن، كەچی ئەویش وانەبوو هەر لەگەڵ تەواو بوون و داخستنی بنكەكان بەر لە جیاكردنەوەی دەنگەكان لایەنێك رەتی دەكردەوەو ئەویدی تۆمەت و ئەوانی دی چاوەڕێی ئەنجامی كۆتاین تا ئەگەر دەنگیان كەم بوو رەتی بكەنەوەو بڵێن ساختەكاری هەیە، لەكاتێكدا هەر هەموویان لە ساختەكاریدا درێغیان نەكرد.

دواجار پێموابوو هاوڵاتیان دەنگ بە بەرنامەجوانەكان دەدەن نەك لیستەكان، كەچی دەركەوت بەرنامەی جوان كاریگەری خۆی جێناهێڵێ‌ بەقەد ئەوەی سۆزە هەڕەمەكیەكان ودان وستان و دامەزراندن و بودجە كاریگەرن.


  • 1