ئەم هەواڵە بڵاوبكەوە
FaceBook  Twitter  

 

شەش حەوت پیاوی دڵ پڕ لە قسە بە دیداری یەكتر گەیشتین ، پاش ئەوەی بە دڵی خۆمان دەردەشەی ئەو هەمووە كێشە سیاسی و ئابوریانەی كوردستانمان كرد ، گەیشتینە ئەو دەرئەنجامەی كە زوڵمێكەو دەسەلاتدارانی كوردستان لە هەژارانی ئەم ولاتەی دەكەن ! پاشان بۆ دڵنەوایی خۆمان چوینە سەر بەزمی ئافرەت و ڕێزگرتن و قسەی ڕۆمانسیەتی نێوان هاوسەران ، ڕووی دەممان لەو هاوپیشەیەمان كرد كە دە پانزە ڕۆژە ژنی دووەمی هێناوە ، كاكەی دوو ژنە وتی : ژنی یەكەمم كە كوردەو دەشتەكی خۆمانە زیاتر لە بیست ساڵە بەیەكەوەین تا ئێستا لەو ماڵەی خۆمان مریشكێكی سۆركراوەی لە پێشم دانەناوە ! خاولی بۆ ڕانەگرتوومە ! داوی لە سەر كوڵمەكانم نەداوە ! وەڵلا بابە ئەمن لۆخۆم هەر خەنی بوومە خەنی بەو ژنە عارەبەی !

یەكێ لە هاوڕێكانمان وتی : بە ئۆتۆمبیلی خۆم لە سلێمانی بۆ هەولێر دەگەڕامەوە لە ترافیكی ناو شار ئافرەتێكی پلەداری پۆلیسی هاتووچۆ ڕاوەستا بوو ، منیش پرسیارم لێیكرد كە كامە ڕێگا دەچێتەوە هەولێر ؟ 

زۆر بە نەرم و نیانیەوە وتی : گوڵەكەم ئا ئەم ڕێگایە بگرە ڕێك دەڕۆیت بۆ ڕێگای سەرەكی هەولێر ! 

ئەم وەلامە پڕ لە ڕێزو خۆشەویستیە زۆر دڵخۆشی كردم ، ئاخر لە هەولێرو بە تایبەتیش دەشتەكیەكەی خۆمان بەشی زۆری ژن و مێرد بەو زمانە شیرینە گفتوگۆ لەگەڵ یەك ناكەن !

یەكێكی تریان هەڵیدایێ و گوتی : ئێوارەیەكیان كە گەڕامەوە ماڵەوە بە ژنەكەمم وت : حەیاتم كوی ؟

ژنەكەشم وتی : ئەو قسە قۆڕە لە كێ فێر بوویت ! 

زۆر بەداخەوە ئەم جۆرە وەلامە دەم كوتەی نێوان بەشێك لە هاوسەران لە شوێنی قوڵكردنەوەی خۆشەویستی نێوانیان زیاتر لێكیان دەترازێنێ ، من وەك خۆم باوڕم بە گەورەیی و توانای ئافرەت هەیەو گومانم لەوەدانیە كە ئافرەت نیوەی كۆمەلەو دایكی نیوەكەی تریەتی ، بۆیە لە زۆربەی كاتەكاندا هاوخەباتیان بوومە لە پێناو ئازادی و یەكسانیان ! لەوەش دڵنیام ژیان بە بێ ئافرەت هیچ مانایەكی نیە ! بەلام ڕاستیەكیش هەیە لە بەشێك لە شارو شارۆچكەكانی كوردستان زۆربەی كێشە كۆمەلایەتیەكانی نێوان هاوسەران ئەوەیە خودی ئافرەتەكە هونەری گفتوگۆ نازانێ ، یان بڵێین كەمترین وشەی ڕۆمانسیەت و قسەی شیرین بەرامبەر پیاوەكەی دەردەبڕێت ! گومانم لەوەشدانیە كە بەشێكی زۆری پیاوانیش دڵ ڕەق و بێ هەستن لە ئاست خۆشەویستی و نەرم و نیانی هاوسەرەكانیان ، بەلام دەبێ ئافرەتی كورد ئەو ڕاستیە بزانێت كورد وتەنی ( هەر ژنە پیاو دەكاتە پیاو ، هەر ژنیشە پیاو لە پیاوەتی دەخات ) ناودارێكیش وتەیەكی هەیە دەڵێ ( لە دوای هەموو پیاوێكی مەزن ، ژنێكی مەزن هەیە ) هیوای لێكتێگەیشتن و شادی و بەختەوەری بۆ هەموو هاوسەران دەخوازم .

  • 1