ئەم هەواڵە بڵاوبكەوە
FaceBook  Twitter  

د ناڤا حزبا شیوعی دە، تاكێن گەلەكێن دلسوز هاتینە پەروەردەكرن، عەشق و ڤیان لهەمبەری گەل و نیشتیمانی ئاستێن هەری بەرز توماركرینە، ئێدی ئەڤ كەسە بونە میناكێن هەری بالكێش دناڤا جڤاكێ‌ دە، لهەر جهەكێ‌ تێدا ئاكنجیبن زوی دبنە خوەدی هەبوون و د هەموو جڤاتان دە دكارن خوە ئیفادەكەن، مرۆڤایەتی لجەم وان ئارمانجا بنگەهینە، لەوما د دەمێن كێمدە شیانێن خوە گونجاندنێ‌ لجەم وان پەیدادبن دگەل تێكرایا تەخ و توێژێن كومەلگەهێ‌. 

هەلبەت هاورێ‌ (سەلام فەواز) ب رەگەز عەرەبە خەلكێ‌ پارێزگەها ئەنبارە، ل داویا سالێن هەفتێیان تەڤلی رێزێن ئەنصارێن حزبا شیوعی بوویە، د ماوێن تێكوشانا خوە یا جەكداری و سیاسی دە، ژبەر ژێهاتی و هەبوونا شیانان د هن بیاڤێن كاركرنێ‌ دە، گەلەك پلە و پوستێن جودا جودا وەرگرتینە، هەر تم ژی جهێ‌ متمانە و نرخێن پوزەتیف بوویە دناڤا رێزێن حزبێ‌ دە.

پشتی سەرهەلدانا بهارا (1991) ێ‌، دگەل هاورێیا زێدە هێژا .. خوەدی نرخ .. زیندانیا سیاسی (فەتحیا) یێ‌ ژیانا هەڤژینیێ‌ پێكئینایە و مالباتەك سەربلند ئافراندی یە، ئەو نها خوەدیێن دو زاروكانە، ئێش و ئازارێن مەزن كشاندینە، رۆژەكێ‌ ژ رۆژان سەرێ‌ خوە نە تەواندی یە، هەر تم ب سەر بلندی بەردەوامی دایە كاروانێ‌ ژیانا خوە یا سیاسی و جڤاكی، دناڤا كومەلگەها دهۆكێ‌ دە گەلەك و گەلەك یێن بەرنیاس بوونە، دوستێن وان ژ هەموو تەخ و توێژێن جڤاكێ‌ بوونە (كورد، عەرەب، ئێزدی، كریستیان، ئاشوری، موسلمان ...) بەردەوام ب ئێك مەسافە بێ‌ جیاوازی مامەلە و رەفتار دگەل هەموویان دا ئەنجامداینە.

دڤان سالێن داویێ‌ دە، وەختێن خوە تەرخانكرن بو بیاڤێن نڤیسینێ‌، ئەو وەكە نڤیسەركێ‌ خوەدی شیان دناڤا جڤاكێ‌ دە هاتە نیاسین، چەندین پەرتوك د مژارێن هەمەجور دە چاپكرن و بەلاڤەكرن، پەرتوكا هەری سەرنج راكیش لجەم دهوكیان ئەو پەرتوكا وی بوویە ئەڤا تایبەت ب پارێزگەها دهۆكێ‌ ڤە، چونكە تاكە پەرتوكە لسەر دهۆكێ‌ ژ ئالیێ‌ كەسەكێ‌ نە دهۆكی دهێتە نڤیسین، گەلەك جاران ل جڤاتێن جودا جودا دە ب حێبەتیڤە دهاتە گوهلێبوون، كو كەسەكێ‌ عەرەب لسەر پارێزگەها دهۆكێ‌ پەرتوكەكا بنرخ چاپكریە. 

ئێك ژ ساخلەتێن هەری باش یێن هاورێ‌ (سەلام) یێن كو بالا من كشاندی ئەو بوویە، دەما جارەكێ‌ ژی لسەر هن میكانزمێن خەبتینا كاركرنا حزبی هەلویستێن دلگران و نەرحەتبوونێ‌ وەردگرتن، هیچ جارەكێ‌ مرۆڤی هەست ب دویربوونا وی نەدكر ژ حزبێ‌، بەلكو د وان حالەتان داژی ئەو پتر هەمی دەمەكێ‌ دن نێزیكی حزبێ‌ بوویە، واتە هەموو دەمێن وی چ د حالەتێن ئاشبونێ‌ دە بیت یان سلبوونێ‌ دە، ئەو داكوكیكەرێ‌ هەری راستەقینە بوویە ژ دوزێن رەوایێن حزبێ‌.

ئەم د گەرماتیا هەوا پرۆپاكندێن هەلبژارتنێن پەرلەمەنتویا كوردستانێ‌ دە بووین، مە چەند هاورێیەكا (حەمید دوسكی، بایەزید باجلوری، جەگەرخوین) پلان هەبوو دگەل هند هاورێ‌ یێن زاخو دەست ب بەلاڤكرنا پرۆشور و بزنسكارتێن كاندیدێن حزبا شیوعی بكەین دناڤا سویك و كولانێن باژارێ‌ زاخو دە، بێگومان ئەو چەند ب پراكتیك بێ‌ گرفت هاتە پێكئینان، رەفتارێن جوانێن خەلكێ‌ زاخو مورالا مە زێدە بلند كر، ئیقبالا وان بو حزبا شیوعی جهێ‌ رێزێ‌ یە و ئەم گەشبینكرین، پاشان مە دەست ب سەرەدانا چەندین مالان كر.

ل دەمێن ڤەگەریانێ‌ دا، هاورێ‌ حەمید دوسكی گوتی راستە ئەم گەلەك دماندی و وەستیایی نە، لێ‌ پێشنیارەكا من هەیە، كو بەری بچینە مالێن خوە ئەم سەرەدانا هاورێ‌ (سەلام فەوازی) بكەین، داكو ژ نێزیك ڤە هایداری رەۆشا وی یا تەندروستی بین، هەلبەت ئەو پێشنیار هاتە پەسندكرن ژ ئالیێ‌ هاوریێن دن ڤە، ئێدی مە قەستا مالا وانكر و مە سەرەدانا خوە پێكئینا.

چاخێ‌ ئەم ب ژور كەفتین، ب خەمگینی ڤە مە رەۆشەكا تەندروستی یا پر خراب یا هاورێ‌ (سەلام فەواز) دیت، ئێشا وی گەلەك گران داهتە دیتن، نەفەسا وی ب زوری دهاتە كێشان، سەرەرای گرانیا ئێشا وی، ئەوی هەولدا هن پرسان ئاراستەی مە بكەتن، د پێشیا هەر تشتی دا گوت هون چونە فلان مالێ‌ .. هەوە فلان ژبیرنەكربیت، ئیقبالا خەلكێ‌ چاوان بو .. هوون هەتا چ رادەكێ‌ دگەشبینن .. پرسا سەرۆكاتیا ئیراقێ‌ گەهشتە چ قوناغەكێ‌، مە ژی بەرسڤێن ویدان و مە گوتێ‌ ئیقبالەكا گەلەك باش هەست پێهاتەكرن و ئەم یێن گەشبینین و مورالا مە گەلەك یا بلندە.

ئەم گەهشتینە وێ‌ باوەرێ‌، كو هەتا داوی ساتێن ژیانا (سەلام فەوازی) خەما وی خەما حزبێ‌ بوویە، گرانیا ئێشا وی نەشیایە باوەری یا وی بهەژینیت و بگوهریت، وی هند خەما باشیا تەندروستی یا خوە نەبویە .. هندی گرنگیا خەما ئایندێ‌ حزبێ‌ هەی، لجەم وی حزب لسەر هەر تشتی بوویە، مەبدەئیەت ب باشی د كەساتیا وی دە دهاتە پارڤەكرن.

ب خەم و كوڤانەك پر مەزن ڤە، چەند دەمژمێرەكان پشتی سەرەدانا مە، ئانكو شەڤا (26/09/2018) ێ‌ دەمژمێری (12:45) خولەك، داوی ب كاروانێ‌ ژیانا خوەئانی، تشتێ‌ گرنگە ئەوە كو بێژینە هاورێ‌ سەلامی: رحا تە شادبیت .. خەباتا تە پیرزبیت .. ئالایێ‌ حزبا تە بلند بیت .. تو هەر خوەدی هەبوونی لجەم تێكرایا هاورێیان و تاك ب تاكێن پارێزگەها دهۆكێ‌ ... تە ب پێنوسێ‌ خوەیێ‌ زێرین پەرتوكخانە یێن دەولەمندكری .. سلاڤ ل گورێ‌ تەیێ‌ پیرۆزبن .. تو هەر و هەر لبیرا مەی. 

 

  • 1