ئەم هەواڵە بڵاوبكەوە
FaceBook  Twitter  

تەمەنی حكومەتی هەرێم، یان دەسەڵاتی خۆ وڵاتی 26 ساڵە، ململانێی چینایەتی و حزبایەتیش لەسەر كۆنترۆڵكردنی ئەم دەسەڵاتە، چڕوپڕتر و توندوتیژترە، بەپێی پەرەسەندنی بواری داهات و دەسكەوت.

خەڵكی چەوساوەی دەستی (بعس و صدام) و حكومەتە كۆنەپەرستەكانی پێشتووتر، خەلًكی ئەنفال و كیمیابارانكراو بەهیوایەكی بەرز و دڵخۆشكارەوە ئەیانڕوانییە ئەم دەسەڵاتە خۆماڵییە، چاوەڕوان بوون:

1- گوندەكانیان بۆ ئاوەدان بكرێنەوە و بگەڕێنەوە سەر ئەرز و ئاوی باوك و باپیرانیان، گوندی هاوچەرخیان بۆ بینا بكرێ و لە كەلاوە پڕ مار و مشك و دوپشك رزگاریان ببێ، ئاوی خواردنەوە و كارەبا و خزمەتگوزارییەكانی تریان بۆ زامن بكرێ، نەك وەكو ئەمڕۆ ناچاربن روو لە شار و شارۆچكەكان و هەندەران بكەن.

2- چاوەڕوان بوون هەموو چەشنە یارمەتییەك بدرێن لەپێنا و بوژاندنەوە و گەشەپێدانی كشتوكاڵ و باخ و بێستان و ئاژەڵداریدا نەك وەك ئەمڕۆ میوە و سەوزە و خۆراك لە وڵاتی تر بكڕین، نەك وەك ئەمڕۆ وڵات بكرێت بە بازار بۆ دەوڵەتانی تر.

3- چاوەڕوان بوون بەپێی یاسایەكی دیموكراسی و دادپەروەرانە كێشەی موڵكایەتی و زەوی ئاو چارەسەر بكرێ، زەوی تەنیا بۆ ئەو كەسە بێت كە بیچێنێ و بەرهەمی بهێنێ، نەك دەرەبەگ و خاوەن موڵكی نوێ یان بۆ دروست بكرێ، نەك حكومەت و حزبە دەسەڵاتدارەكان ببنە خاوەن موڵكەكان، نەك هەرچی گەنجی لادێ هەیە فێری موچەیان بكەن و لە بەرهەمهێنان دایان ببڕن.

4- خەلكی هەرێم چاوەڕوان بوون كە دەیان كارگە و كارخانە و پڕۆژەی پیشەسازی هەمەچەشن لەم وڵاتەدا دابمەزرێ، بەتایبەتی ئەوانەی كەرەستەخاوەكەیان خۆماڵییە، (خوری، لۆكە، زەیتوون، دار و كونجی، گوڵەبەڕۆژە، پێستە، گۆشت، شیر و ئاردەمەنی) نەك وێرانكردن و فرشتنی ئەوە كە هەبوو، نەك دابەشكردنی كارگەكانی چیمەنتۆ و پاڵفتگەكانی نەوت و تەنانەت بیرە نەوتەكانیش، نەك فرۆشتنی كارگەكانی جگەرە و قەدەغەكردنی كشتكاری توتن، لەبەر خاتری كارگە و كۆمپاینیا بێگانەكانی جگەرە كە كاربەدەستان بوون بە دەڵاڵ و وەكیل و شەریكیان، توتنی كوردستان چاكترین توتن بوو، جگەرەی كوردستان خەریك بوو بازاڕەكان قۆرخ بكات، سەرچاوەی داهاتێكی روو لەزیاد بوو بۆ كوردستان،... بەمەرجێك ئەمڕۆ لە كوردستان جگەرەكێش گەلێك لە جاران زۆرترە، داهاتەكەی دەچێتە گیرفانی چەند بەرپرسێكەوە!!

5- خەڵكی كوردستان چاوەروان بوون كە داهاتی دەروازە سنورییەكان بەشەپارەكەی بەغدا، داهاتی نەوتی ئەم چەند ساڵەی دوایی لەپێناو ئاوەدانكردنەوە و خۆشگوزەرانی ئەواندا بێ، نەك لەلای چەند كەسانێك كەڵەكە ببێ و وەكو كاربەدەستێك و تبووی لەژێرزەمینەكاندا وەك فەردە توتنی جاران عەمبار بكرێ، یان ببرێت بۆ دەرەوەی وڵات.

6- لەڕوی سیاسی و ئیداریشەوە، لە ساڵی 1992ەوەوە بەربەرەكانی و دوژمنایەتی و ساختەكاری لە هەرڵبژاردنەكاندا لەپەرەسەندندایە بە جۆرەها شێوە، لەپێناوی ئەوەدا نوێنەری كام چین و توێژ لە هەرێمدا خاوەن دەسەڵات بی، واتە دەستكەوت و داهاتەكان تەنیا هەر بۆخۆی بێ، نەك بیربكەنەوە چۆن و كەی كێشەكانی خەڵك چارەسەر بكەن، خواستەكانی جەماوەری بێ كار و برسی و ماف و بەشخوراو جێبەجێ بكەن، چونكە بەرەژەوەندی و خواستنی ئەوان هەرگیز لەگەڵ خواست و بەرژەوەندی جەماوەردا یەك ناكەوێ، بۆیە هەتا ئەم كێشمەكەێشمە چینایەتییە لەئارادا بێ، ئەم كوردستانە ئارامی و پێشكەوتن بەخۆیەوە نابینێ، پێموایە رۆژگاری داهاتوو بەتایبەتی كێشەی پێكهێنانی حكومەتی ئایندەی هەرێم ، دانانی یاسای هەڵبژاردنی سەرۆكی هەرێم و هەروەها هەڵوێستی كورد لە بەغدا هەرا و بەزمێكی مەترسیداری بەدواوە ئەبێ.

  • 1