ئەم هەواڵە بڵاوبكەوە
FaceBook  Twitter  

من لێرەدا مەبەستم ئەو بەرنامەیە نییە كە لەبەینی دوو كۆبوونەوەی ئەنجوومەنی وەزیراندا سەرپێیانە یان ئارەزوومەندانە دەهێنرێتە كایەوە، هەروەها مەبەستیشم ئەو بەرنامەیە نییە كە ڕووداوێك یان گۆڕانكارییەكی چاوەڕێنەكراو لەناكاو فەرزی دەكات، من مەبەستم ئەو بەنامەیەیە كە حكوومەتی نوێ بە پشتبەستن بە بارودۆخی وڵاتەكە پاشماوەی ئەو بەرنامەیەی حكوومەتی پێشوو، داواكارییەكانی دامودەزگاكانی دەوڵەت و حزب و كۆمەڵ و ڕێكخراوە جۆراوجۆرەكان پێشكەشیان كردووە، كە هەڵچنراوی تێكڕای دۆخی ئابووری و خزمەتگوزاری و سیاسی و ئیداری و ڕوناكبیری و كۆمەڵایەتی وڵاتەكەیە، كە سەرۆك وەزیرانی ڕاسپێردراو لەگەڵ وەزیرە دەستنیشانكراوەكانیدا دایدەڕێژن، بۆ ئەوەی لە پەرلەماندا متمانەی پێ وەربگرن، ئەمەیش دەكرێت بە دوو بڕگەوە.

یەكەمیان بریتییە لەو ئەركانەی كە لەماوەی ڕۆیشتنی حكوومەتی پێشوو هاتنی حكوومەتی نوێ، كە جاروبار (6-5) مانگ دەخایەنێ و كەڵەكە دەبێ، واتە هەنووكەیین، دەبێ پەلە بكرێت لە جێبەجێكردنیان. دووەمیان بەرنامە سەرەكییەكەی حكوومەتەكەیە بۆ لەوەو دواتر، واتە ئەركی داهاتووی حكوومەت. ئەمڕۆ لە زۆر وڵاتانی جیهان، پەرلەمان لەسەر بنەمای ناوەڕۆكی بەرنامە متمانە بە حكوومەت دەدات، هەروەها حسابی ئەوەش دەكات ئاخۆ وەزیرە دەستنیشانكراوەكان لە ئاستی ئەو ئەركانەدان كە بەپێی ئەو بەرنامەیە پێیان دەسپێردرێ، لەم هەرێمەدا لەبەر ئەوەی حزب حزبێنە و بەشبەشێنە كراوە، بەمەبەست لەبەرئەوەی بەرژەوەندی تایبەت لەپێش هەموو شتێكی ترەوەیە، لەسەرەتاوە تا ئەمڕۆ جۆرەها گرفت و كەند و كۆسپ هاتۆتە ڕێی پێكهاتنی حكوومەتە یەك لەدوای یەكەكان، دوای بێنەوبەردەیەكی (4-5) مانگی، ئینجا پێكهاتووە و بەرنامەكەیشی بە پلەی یەكەم بەپێی خواست و مەبەستی ئەو حزبانە بووە كە حكوومەتەكەیان لێ پێكهاتووە، نەك بەپێی خواست و ویستی زۆرینەی خەڵكی وڵاتەكە، هەربۆیە هیچكام لەو حكوومەتانە نەیانتوانیوە بگرە مەبەستیشیان نەبووە كێشە سەرەكییەكان (موڵكایەتی و زەوی و ئاو و پیشەسازی و كارەبا و ئاوەدانكردنەوەی لادێكان و خزمەتگوزارییەكان و تەنانەت دوو ئیدارەییش) چارەسەر بكەن. لەبەرنامەیاندا نەبووە ئەو داهاتە خەیاڵییەی هەرێم بۆ پێشخستن و خۆشگوزەرانی جەماوەری بێكار و برسی و وەلانراو خەرج بكەن، بەڵكو بۆ خۆدەوڵەمەندكردن بۆ بازرگانی پێكردن، بۆ ناردنەدەرەوە بووە، بەسەرنجدانی ئەو ناكۆكی و كێشە حزبایەتی و چینایەتییەی ئەمڕۆ لەو هەرێمەدا جۆشی سەندووە، بۆچوون و لێكدانەوەكان وای نیشان دەدەن كە هەلومەرجی پێكهێنانی حكوومەتی ئەمجارەیش لەوەكانی پێشوو باشتر نابێت و بارودۆخی هەرێمەكەیش سەقامگیر نابێت.

 

  • 1