ئەمە بڵاوبكەوە
FaceBook  Twitter  

ماوەیەكە سەردان و وتووێژ لەنێوان پارتی و یەكێتی لەلایەك و لەگەڵ حزب و لایەنەكانی تر لەلایەكی دیكەوە دەستی پێكردووە بە مەبەستی پێكهێنانی حكوومەتی نوێی هەرێم. وەكو باس دەكرێ ئەم كۆبوونەوانە مشتومڕیشی تێدابووە!!

لەو كۆبوونەوانەدا، هەر یەكە لەو حزبانە، پارتی و یەكێتی بەتایبەتی، مەرج و بەندی خۆیان هەبووە بۆ بەشداریكردن لە حكوومەتەكەدا. واتە ئەو مەرجانە كراون بە بەردی بنچینەی حكوومەتی ئایندە!!

ئەوەی كە تائێستا لەبەرچاوە مەرجەكانی هیچ كام لەو حزبانە پەیوەندی بە بەرنامەكەوە نییە كە كێشەكانی هەرێم، فیدرالی و خواست و ئاواتە كەڵەكەبووەكانی جەماوەری هەژار و بێكار و بێ خزمەتگوزارییەوە نییە!! بەڵكو مشتومڕەكە لەسەر چۆنێتی دابەشكردنی پلە و پایەكانی حكوومەتەكەیە (جێگری سەرۆكی حكوومەت، سەرۆكی پەرلەمان، وەكو ناویش نراوە وەزارەتە سیادییەكان)!!

كاتێكیش لەسەر پێكهاتنی حكوومەتەكە ڕێكدەكەون، حزبەكان خۆیان ئەو كەسانە دیاری دەكەن بۆ ئەو شوێنانەی بەریانكەوتووە، بەپێی بەرژەوەندی خۆیان نەك لەسەر ئەو بنەمایەی تا چ ڕادەیەك لێهاتوو و شارەزا و كارامەن بۆ جێبەجێكردنی ئەركەكانی ئەو شوێنە!

چونكە ئەوان تەنیا بۆ ئەوە دانراون كە مەرام و مەبەستەكانی حزبەكانیان بەدی بێنێ!! لەلایەكی تریشەوە، وەزارەتەكە بەرنامەیەكی واقیعی ئەوتۆی نییە لە خزمەتی بەرژەوەندی گشتیدا بێت!

گومان لەوەدانییە كە مەرام و مەبەستی هەریەكە لەو حزبانە بەپێی ڕەچەڵەكی چینایەتییان جیاوازە لەوی دیكەیان. بۆیە ئالێرەوە ناكۆكی و ناتەبایی لەهەڵوێستیان پەیدا دەبێ. بۆ نموونە لەكۆبوونەوەی ئەنجوومەنی وەزیراندا، بڕیارێك دەدەن یان پڕۆژەیەك دادەنێن، كەچی فڵان لایەن لەبەر ئەوەی ئەو بڕیارە لەخزمەتیدا نییە. لەدەرەوە دژی رادەوەستێ و ڕەفتاری لەگەڵ دەكات! ئەم حاڵەتە گەلێ جار ڕوویداوە و بە مسۆگەریش لەمەودوایش ڕوودەدات!

خۆ ئەگەر حكوومەتەكە دوای ئەو هەموو كەین و بەینە پێكهات و ڕێككەوتن لەسەر بەرنامەیەكی (سەرپێیی)!! بۆ چاوبەستنی جەماوەرە. ئەوا ئەو بەرنامەیەش هەر بەرهەمی بەرژەوەندی حزبەكان خۆیانە، نەك بەرژەوەندی گشتی!!

ئەوەش دیاردەیەكی ئاسایی و سروشتییە، چونكە ئەوان زۆر دوورن لە واقیعی ژیانی پڕ مەینەتی زۆری خەڵكی كوردستانەوە. باشترین و ئاشكراترین بەڵگەش ئەوەیە كە ئەمان لەماوەی 26 ساڵی ڕابردوودا، كە كورد واتەنی (هەس و نەسی) ئەم هەرێمەیان لەبەردەستدابووە نەیانتوانیوە یان نەیانویستووە كێشەكانی ئاو و كارەبا و بێكاری و خزمەتگوزاری خەڵكی ئەم هەرێمە چارەسەر بكەن!!

  • 1