ئەمە بڵاوبكەوە
FaceBook  Twitter  

جەنگ جگە لەحاڵەت و دیاردە ناحەزەكان و گۆڕینی ژیانی ئاسایی بۆ نائاسایی، ئەو زاراوە ناخوشەیە كە پڕە لە هەواڵی بێزاركەر و ترس و هیچ ئومێدێكی تیا نییە تاكو سەركەوتنەكانیشی بۆ دەوڵەت، یان نەتەوە یان ئایین بەجوانی ببینرێت، كەچی جەنگی ئێستا لەبری ئەوەی خۆی و كەرەستەكانی ناشیرین بن، بەپێچەوانەوە بەپێی سایكۆلۆژیای خەڵك و ئەوانەی بەگشتی بەشداری تێدا دەكەن، بەشێوەیەك جوان كراوە كە ئازادی بەخشە، هەر دەڵێی بۆ ئارەزووی خەڵك و ویستی گشتییە بە بەشدارییەكی ئارەزوومەندانە بۆ ئەوانەی پشت سیناریۆكان، بۆیە جوانییەكەی لەدروستكردنی دوژمنی وەهمی و شەهیدی وەهمییە، یان دروستكردنی كەرەستەكانییەتی بۆ بەرگری هاندەر و بكەرانی یان هەردوولایەنی شەڕكەر ئامادەكراوە و لەزۆربەی پێداویستی ژیاندا ڕەنگیداوەتەوە، تادەگاتە ئەوەی لەبری عیشق و هاوسەرایەتی بەهەموو ماناكانییەوە بەئازادی تەماشا بكرێت، هەروەك چۆن شەهید و كوژراو لەدوو مانادا كۆكراوەتەوە، بەردەوام بوونی مەسەلەی ڕۆژئاوای كوردستان بە نموونە.

جەنگ هەمیشە جگە لەبردنەوەكان و دۆڕانەكانی بۆ گرووپە سیاسییەكان و دەوڵەت، دۆڕانێكی گەورەی لەپشتەوەیە كە ئازادی وەكو بەرانبەر دەبەخشێت بە ئەوانی دیكەی بینەر و ملكەچەكانی. مەسەلەی هەڵوەشاندنەوەی خێزان و قەیرانی هاوسەرایەتی كوڕ و كچ لەجەنگدا، یەكێك لە هۆكارەكانە كە بەناچار دەوڵەت لەڕێگەی كۆمپانیاكانەوە بۆ ئەوەی زیانێكی گەورە نەكەن، پەنا بۆ هێزی كولتووری و ئایینی و مەزهەبی دەبەن تاكو قەناعەت بە گەنج بكەن هاوسەرایەتی باشترین ڕێگەیە بۆ دووركەوتنەوە لە سەرئێشە كە ئەمە سلاڤۆی ژیژاك وەكو بیرمەندێكی ڕۆژئاوایی، چاودێری جەنگەكانی ئەمدواییەی كردووە، ئەو تازە هەستی پێكردووە لە ئەوروپا ئەم حاڵەتە كاریگەری خستۆتە سەر هەمووان. لەكاتێكدا لە ڕۆژهەڵات چونكە جەنگ حاڵەتێكی هەمیشەییە و بەتایبەتی بۆ كورد، هەر ئەویشە ئازادییەكان دەبەخشێتەوە.

ئەگەر لە ئەوروپا دەوڵەت زەمینەی ئازادییەكی بێ‌ بەرانبەری بۆ كوڕ و كچ خۆشكردووە و كەرەستەی ژیانیان پێدەخشێت لەبەرانبەر ئەو نەیارییەی جەنگە جۆراوجۆرەكان دەیخوڵقێنن، لێرە لە ڕۆژهەڵات لەمێژە هاوسەرایەتی جۆراوجۆر لەبری عیشق و ئازادی بۆ قەیرانەكە بیری لێكراوەتەوە، بۆ نموونە هاوسەرایەتی مسیار و زیغەی شیعەكان و هاوسەرایەتی بەخشینی كچ بەكوڕ بەبێ‌ عیشق لەلایەن هێزە ئیسلامییەكانەوە، هەروەها هاوسەرایەتی لەڕێگەی كۆیلەكردنەوە بە ئایین و ئینتیمای سیاسی و فكری و هاوسەرایەتی كۆمەڵایەتی، تەنیا بۆ ئەوەی كوڕ و كچ ئازاد نەبن عیشق بكەن و هاوسەرایەتی تەقلیدی بمێنێتەوە و ئازادییەكە بكەوێتە بەرانبەر شتێكی دیكە كە ئیغراكردنی هەوەسی گەنجایەتییە كە بەرهەمی جەنگە.

جەنگ موڵكێكی تەنیا نییە تاكو بترسێت لەڕووبەڕووبوونەوەی نەیارەكانی و شكست بهێنێ‌، لەهەموو دۆستەكانی كە سوپا و شارەزا و سیناریستەكانێتی، چونكە كۆمپانیاكان بەناڕاستەوخۆ میدیایان وەكو ماكینەیەك خستۆتەگەڕ بۆ قەناعەتپێهێنانی تەواو بەخەڵك هەم بەشداری بكەن، هەم بەدەركەوتەكانی قایل بن، هەروەك ئەوەی لەڕێگەی پیاوانی ئاینی و بەناو كۆمەڵناسەكان و میدیاكارەكانەوە بۆ ڕۆژئاوا دەكرێت بەتایبەتی دوای دەنگۆی كشانەوەی هێزە سەربازییەكانی ئامریكا لە سوریا، ئەم ڕیكلامە سیاسییە جۆرە چارەسەرێك بۆ قەیرانە كۆمەڵایەتییەكان پێشكەش دەكەن كە تەنیا شایستەی ئینسان نییە، نموونەش ئەو شەرعیەتەیە كە بە جەنگ و دیاردەكانی دەدەن بەناوی جەنگی پیرۆزكراو، ئەمە ئەزموونێكە لەسەردەمی شەڕەكانی نێوان عێراق ئێران و شەڕی ناوخۆ و شەڕەكانی نێوان كورد و ڕژێمی بەعس بینیمان، بەتایبەتی چەپاندنی حەز و ئارەزوو و ئازادییەكانی خەڵك لەبەرانبەر ئەو بەخشینەی بەناچار قەبوڵ دەكرێت، لێرەوە جەنگ چارەسەری قەیرانەكانی خۆی دەكات كە بەخششی جۆرە ئازادییەكە بە ئیدیۆلۆژیشتەكان.

  • 1