ئەمە بڵاوبكەوە
FaceBook  Twitter  

ئەوەی هەڵا بوو لە كەركووك دا، ڕۆژی هەینی بە كردار ڕوویدا بەو جۆرەنا كە دەیانگوت، تەنیا گۆڕینی هێزێكی عێراقی بوو بەهێزێكیتری عێراقی، ئەمەش هەمووی نا، بەڵكو قۆناغ بە قۆناغ هێزی دژە تیرۆری عێراقی دەگەڕێتەوە و بارەگەكانی پارتی دیموكراتیش بە هەمان شێوە لە دەستی ئەو هێزانەدان كە هاتوون وەكو دەڵێن دژە تیرۆر گۆڕا بە لیوای 61ی سەر بە وەزارەتی بەرگری عێراق. 

شار جۆرێكی تر دەبینێت، بەڵام لە هەمان بەرگی داگیركردندا، ئەوەی كە ڕوودەدات سەربازە نوێیەكان دەیانەوێت توندوتۆڵ خۆیان نیشان بدەن ئەویش بە لێپرسینەوەی توند و داوای هەموو جۆرە ناسنامەیەك دەكەن بۆ خۆت و ئۆتومبێلەكەت. سەربازگەی كەیوان خاڵی نییە لە ئەمریكییەكان، ئەوان هەڕەشە دەكەن لە حەشدی شەعبی، بەڵام شار پڕە لە هەموو جۆرەكانی حەشد، ئەمریكییەكان كێوماڵی شاخەكانی حەمرین دەكەن. هێزە ئاسمانی و زەمینییەكانیان ناوچەكە دەپشكنن، لە یارییەكی منداڵانە دەچێ، تابلۆكە ڕوونە و پڕە لە هەڕەشەكانی ئێران بۆ ئەمریكا، هەروەها پڕیشە لە ئاگادارییەكانی ئەمریكا بۆ ئێران و هاوسۆزەكانی و هەمووشیان لێرەن.

تۆ سەیری یارییەكە بكە ئەوەی بێ ئاگایە ئێمەین، خەڵك و دانیشتوانی ئەم شارە، دڵنیام ئەوان چ ئێران و چ ئەمریكا وەكو حەیوان تەماشامان دەكەن، چونكە لە ڕاستیدا ئێمە هیچ بەهایەكمان نەماوە لەسەر پارێزگارێك كۆبوونەوەی ئەنجوومەن كورد و كورد، عەرەب و عەرەب، توركمان و توركمان هەمووشمان پێكەوە بەربووینەتە گیانی یەكتر.

ئایا تۆ بڵێیت بەرژەوەندییە ئابوورییەكان نەیتوانی بێت بەنهێنی جەنەڕاڵێكی ئەمریكی و قاسمی سلێمانی لەسەر ئەم خاكە سوتاوەی ئێمە كۆنەبنەوە. مامەڵەی بزن و مەڕمان پێوە نەكەن؟ یارییەكە وامان پێدەڵێت ململانێكە لێرەدایە، داعش بڵاوە دەكات بە ناوچەكەدا و ماڵی خۆی ڕێكدەخات، ئەمریكا كێوماڵ دەكا و ئێران ڕاویان دەنێ، حەشدیش لەوناوە بەڕەڵان.