ئەمە بڵاوبكەوە
FaceBook  Twitter  

هەموو یان زۆربەی حكوومەتەكان لە جیهاندا پێش كۆتایی ساڵ بە چەند مانگێك دەست دەكەن بەئامادەكردنی وردەكارییەكانی بودجە-میزانیەی ساڵی داهاتوو. هەر وەزارەتێك بە پێی بەرنامەی خۆی (كۆن و نوێ‌) بڕێك پارە داوا دەكات. پێشكەش بە ئەنجوومەنی وەزیرانی دەكات و بە پێی پێشبینی كردنی داهاتی گشتی وڵات و ڕووداو و گۆڕانكارییە چاوەڕوانكراوەكان لە ئاستی وڵاتەكە و دەوروبەر، دەست دەكرێ‌ بەگەڵاڵەكردنی و دەدرێت بە پەرلەمان بۆ تاوتوێكردنی و بڕیاردانی. 

وەك ئاگادارین لە عێراقدا لە سەردەمی حكوومەتی عەبادییەوە پێش لە كاركەوتنی بە دوومانگ هەتا ئەمڕۆ حكوومەت و پەرلەمان سەرقاڵی گفتوگۆن بۆ ئامادەكردن و بڕیاردانی بودجەی گشتی.

جا، ئاخۆ لە هەرێمی كوردستاندا شتێك لەم بابەتە هەیە؟

سێ‌ مانگ و نیوە پەرلەمان هەڵبژێردراوە، بەڵام هێشتا حكوومەت پێكنەهاتووە.

حكوومەتی پێشوویش كە تا ئەمڕۆ لە كاردایە هیچ جموجۆڵێكی لەم بارەیەوە لێ‌ بەدی ناكراوە. چونكە لەوانەیە بە ئەركی حكوومەتی نوێی بزانێ‌ نەك بە ئەركی خۆی، هەرچەند دەبووایە وەكو حكوومەتەكەی عەبادی دەستی بە ئامادەكردنی وردەكارییەكانی بكردایە.

تا ئێستا نازانرێت حكوومەتی نوێ‌ كەی پێكدێ‌؟! ئاخۆ بەرنامەی هەیە؟

هەروەها نازانرێ‌ ئاخۆ بیر دەكەنەوە لە ئامادەكردنی بودجەی گشتی هەرێم؟ من پێم وایە وەڵام هەر نەخێرە.

ئەمەیش ئەوە دەگەیەنێت كە حكوومەتی نوێ‌ بە پێی بەرنامەیەكی سەرپێی ئەو پارەیە ( داهاتی خۆماڵی و بەشە پارەكەی بەغدا) دابەش و خەرج دەكات كە لە ئاستی پێویستی چارەسەركردنی كێشەكان و جێبەجێكردنی داواكارییەكاندا نابێ‌ بەتایبەتی چونكە وەزارەتی كۆن وەكو گوتم هیچ بەرنامەیەكیان پێشنیار نەكردووە و وەزیرە تازەكانیش تا لە واقیعی وەزارەتەكانیان تێ‌ دەگەن ساڵ كۆتایی دێت!

بە واتایەكی تر بێجگە لە مووچەی كارمەندان و كرێكاران كە وەك گوتراوە 74%ی بودجەكە پێكدەهێنێ‌، باقیەكەی سەرپێیانە و ئارەزوومەندانە خەرج دەكرێ‌، ئەوكات كورد واتەنی ((خۆزگە بە پار دەبەن!)). جا، ئاخۆ كێ‌ لەم پاشاگەردانییە بەرپرسە؟!