ئەمە بڵاوبكەوە
FaceBook  Twitter  

پێنج مانگ بەسەر هەڵبژاردنی پەرلەمانی كوردستان تێپەڕی، بەڵام هێشتا كابینەی نوێی حكوومەتی هەرێم پێك نەهێنراوە و خەڵكیش لە چاوەڕوانی هێزە ناكۆكەكانە، بۆ ئەوەی چیتر نەبنە سووتەمەنی سیاسەتێكی نادروستی ئەوان كە لە پێناوی بەرژەندییەكانیان شەوڕۆژ لە كۆبوونەوەدان و هەر لایەنە و زۆرترین پشك بۆ لای خۆی ڕادەكێشێ‌، هەرچەندە جۆرێك لە ڕێككەوتن كراوە، بەڵام هێشتا نیەتێكی باش نابینرێت لەنێوانیان و گەورەترین كێشەشیان نەبوونی متمانەیە بە جۆرێك تەواوی سێكتەرە گرنگەكانی ئەم وڵاتە دووچاری چەقبەستن بووە بەهۆی ئەو بێمتمانەییەی نێوانیان و خەریكە تەواوی جومگە سەرەكییەكانی حكوومەت پەك دەخەن.

بە دروشمی لایەنەكان لە هەڵبژاردنەكانی ڕابردوو هەموو شەقامەكانی تەنیی بوو، بەڵێنەكانیان زۆر لە خۆیان گەورەتربوو، كەچی وەك هەموو جارەكان خەریكە بەڵێنەكانیان دەبێتە ڕابردوو و بە پاساوی بێ بنەما دیزە بەدەرخۆنەی دەكەن، تەواوی گرفتە سەرەكییەكانیشیان دابەشكردنی پۆستەكانە، واتە ئەوەی كرا زیاتر بەرژەندی حزبی بوو نەك گشتی. بۆیە ئاراستەی ئەوان بەرەو دوو ڕێگامان دەبات، كە زیاتر ئەوان لێی سوودمەند دەبن و باجی زۆرتریش هاووڵاتی هەژار و نەداری هەرێمەکەمان دەیدات. ئێستا بێخەمی ئەوان باڵی کێشاوە بەسەر هاووڵاتییان و ئەو ئومێدەی کە هەمووان چاوەڕێیان دەکرد، ئێستا نەزۆك بووە. 

حكوومەتی هەرێمیش ئێستا بڕیاری داوە پاشەكەوتی مووچە لەسەر فەرمانبەران هەڵبگیرێت، ئەوە نابێت وەكو دەستكەوت و پاداشت بە هاووڵاتییانی بفرۆشنەوە، چونكە مافی تەواوی مووچەخۆرانی هەرێمە ئەوەی لای حكوومەتیش ماوە وەریگرنەوە، پێشتر غەدریان لێكراوە و ئێستا وەریدەگرنەوە، ئەم جۆرە بابەتەش دەیسەلمێنێ‌ كە هەموو پرسە هەستیارەكانی كوردستان بەستراوە بە بەرژەوەندی تەسكی حزبایەتی كە هەمیشە هێندەی لە خەمی خۆیاندان نیو هێندە خەم لە بەرژەوەندییەكانی گەلەكەیان ناخۆن. چونكە ژیان و گوزەرانی هاووڵاتییان دوای پێنج مانگ دیار نەبێت، ئاخۆ هێزە ناكۆكەكان لە ناوخۆیان لەسەر ئەم واژووكردنە هەنگاوی كرداری دەهاوێژن یان نا!.

حكوومەتی عێراقیش لەم نێوەندەدا بەجۆرێك لەگەڵ حكوومەتی هەرێم مامەڵە دەكات كە وای لێهاتووە لەبڕیاردان زوو پەشیمان دەبێتەوە، زۆربەی بڕیارەكانیش نوێنەرانی كورد و وەزیرەكانیش نازانن، ئێستا بڕی 522 ملیار دینارەكەی بەغدا هاتووە بۆ مووچەی فەرمانبەران، ئەم بڕە پارەییەی وەكو پشكی كورد دیاری كراوە كە دێت و بەچ شێوازێكە ئاخۆ بەردەوامە یان بەغدا وەك چەند ساڵی ڕابردوو دیسان دەیكاتە كارتی فشار بەرانبەر بە هێزە سیاسییەكانی كوردستان. بۆیە هاووڵاتی لە نێوان حكوومەتی هەرێم و عێراق بووەتە سووتەمەنی دەستی سیاسەتێكی هەڵە كە ئایندەی بە ونی یان لە نێو ئەگەرەكاندا خۆی نمایش دەكات.

پەرلەمانی کوردستانیش بەهۆی ململانێی لایەنەکان ناتوانێت لە کۆبوونەوەکانی بەردەوام بێت، چونكە هەمووی گرێدراوی دەستی سیاسەتێکی نادروستە کە خەریکە دەبێتە هۆكاری لەناوبردنی ئەو بڕە دەسكەوتەش كە بەخوێنی شەهیدان وەدیهاتووە، وایلێهاتووە پێش ئەنجاندانی كۆبوونەوە مەرج بۆ بەشداریكردن دادەنرێت و بە كۆبوونەوەیەكی ڕووت و بێ ئەنجام كۆتایی دێت.

لەهەمانکاتدا بازاڕی ئازاد بۆتە بارێکی قورس بەسەر شانی هاووڵاتییانەوە، دەست بۆ کڕینی هەر کەلوپەلێك دەبەن لە ئاست گیرفانیاندا نییە، بەم هۆكارە بازاڕ وەستاوە و ئابووری تاك ڕووی لە لاوازی كردووە، ئەگەر هەرچی زووە حكوومەت دروست نەكرێت و دەست بە چاكسازی ڕیشەیی نەكرێت ئەوە قەیرانەكان بازاڕ دادەپۆشێ‌ و دەسەڵاتیش قووت دەدا. 

بۆیە بەردەوام بوون لەسەر ئەم سیاسەتە هەڵەیە، تێکڕای پرسە هەستیارەکان بەرەو ئاقارێکی نادیار دەبات و ئیدی برینە ساڕێژ نەکراوەکان دووبارە دەست بە کولانەوە دەکەن کە دواجار چارەسەرکردنی ئەستەم دەبێت.

ئەو کوردستانەی کە بە هەزاران لاوی ئازا و بەجەرگ سڵیان لە دوژمن نەکرد و لە پێناو خۆشگوزەرانی هاووڵاتییانی وڵاتەکەمان خۆیان کردە چەترێک بۆ ئەوەی تیری دوژمن نەیانبڕێت، مەرگی خۆیان پێشکەش کرد بەخاکی کوردستان، بەڵام بەردەوامی لایەنە ناکۆکەکان وێنەیەکی خراپ‌ پیشانی خانەوادەکانیان دەدەن.

بۆیە یەک چەک ماوە کە لایەنە ناکۆکەکان بە کاری بهێنن بۆ چارەسەرکردنی کێشەکان و دەرچوون لەو هەڵاوسانە ئابوورییەی کە تووشی کوردستان بووە ئەویش یەکگرتن و ڕێککەوتنی یەكجارەكییە کە پێناچێت دەستی بۆببەن.

 

  • 1