ئەمە بڵاوبكەوە
FaceBook  Twitter  

دەربارەی مەفرەزەكەی شەهید ئازاد چاوشین

تەقاندنەوەی هێڵی ئاسنینی شەمەندەفەری نێوان كەركوك – هەولێر

 

بەشی چوارەم و كۆتایی

ئێوارەی رۆژی 19/7/1980 خانەوادەی هاوڕێ مام (حاجی صابر) لەهەولێر گەڕانەوەو، دكتۆر (یوسف حاجی صابر) مەرزانیشیان لەگەڵدابوو، ئەوكاتە هاوڕێ یوسف هەر قوتابی بوو، پاشان بووە دكتۆرێكی ناودارو ناسراو لەسەر ئاستی كوردستان، ئەندامانی خانەوادەكەی هاوڕێ حاجی (صابر) خەمبارییان بۆمان دەربڕی كە بەم رۆژە گەرماو دەرگا داخراوە ماینەتەوە، لەهەمان كاتدا خۆشی و شادی بەسیمایانەوە دیاربوو كە هیچ كارێكی نەخوازراو رووی نەداوە.. نانی شێوانمان لەتەكیەكاندا خواردو، دونیا تاریك داهاتوو، دانیشتوانی گوندی یەدقزلەر بەنان خواردن و حەسانەوە خەریك بوون، دەنگە دەنگی خەڵكەكەو هاتۆچۆیان كپ بوو، هاوڕێ (كانەبی گەورە) رووی لە هاوڕێ (كەمال، كۆسرەت) كردو داوای لێكرد كە بەخێرایی و وریایی بچێتە سەردانی دایكی، كە ماوەی ساڵێك زیاتر بوو لەدایكی دابڕابوو، ئەو چەند رۆژەی لەم ناوە بووین هاوڕێ كۆسرەت خۆی داوای سەردانی خانەوادەكەی و دایكی نەكرد، لەماوەیەكی زۆر كورتدا هاوڕێ (كۆسرەت) گەڕایەوەو ئاسوودەو دلخۆش بوو. ئامادەبویین و بەخێرایی لەماڵی هاوڕێ (حاجی صابر) دەرچووین و، بەبێ گیروگرفت لەگوندەكە دوور كەوتینەوەو، خاوەن پیكابێك چاوەڕوانی دەكردین، نەمزانی ناوی چیەو ئەوكاتیش نەمپرسی، بەرەو رێگای كەركوك بەرێكەوتین و، لەنزیك مورتكەی گچكە چووینە سەر جادەی قوشتەپە – هەولێر چوار رایەكەی قوشتەپە –بیستانە – كەركوك بە ئاڵای عێراقی و هەندێ لافیتەو گلۆپی رەنگاو رەنگ رازاندرابۆوە بەبۆنەی 17/7/1968رۆژی ئینقلابەكەی حزبی بەعس، لەجادەی كەركوك لامانداو بەرەو گوندی ئۆمەراوە رۆیشتین و لەنزیك گوندەكە خاوەنی پیكابەكە گەڕایەوەو، بەخێرایی بۆی دەرچوو.

هاوڕێ (محسن دەشتی) كە شارەزای ناو گوندەكە بوو، بەتەنیا چووە ماڵی هاوڕێ شەهید (سەلیم سەعید) و دوای ماوەیەكی كەم لەگەڵ هاوڕێ سەلیم گەڕایەوەو، هەندێ لەگوندەكە دووركەوتینەوەو دانیشتین، هاوڕێ (سەلیم سەعید) بە درێژی باسی دەنگ و باسی ناوچەكەی كردو، جوڵەو چالاكی پیاوانی بەعس و مەفرەزەكانی تایبەتی جاشەكان و ئەمنی خستەڕوو، هەروا باس لەمەزاجی جەماوەر كراو، رۆڵی پێشمەرگەی كوردستان و حزبە سیاسیەكانی كوردستان ئاماژەی بۆ كرا... بەكورتی قسەی لەسەر ئەوە كرد، كە جەماوەر بارودۆخی ئابوری باشە، بەڵام خەڵك لەتوندوتیژی بەعس و پیاوانی ئەمن یەكجار نارازییە، ترس لەگوندەكاندا هەیە.. و لەشاریش پیاوانی ئەمن و موختارەكان لەگەڕەكەكاندا گەڕان و سوڕانیان بەردەوامە، گفتوگۆو گەنگەشەی بارودۆخەكە درێژەی كێشاو، دواكەوتین و كاتژمێر بووە یەكی دوای نیوە شەو، واتە ئێمە ئێستاكە لەشەوی 20/7/1980 داین و، ئەركێكی گرنگمان لەئەستۆدایەو، دەبێت جێبەجێی بكەین، لەگەڵ هاوڕێ شەهید(سەلیم سەعید) لێكدابڕاین و، ئێمە بەپەلە بەرەو هێڵی شەمەندەفەر رۆیشتین و لەگەڵ گەیشتنمان بۆ شوێنی مەبەست و دیاریكراو، دەستمان بەكاركردن كرد، بەندە(TNT)یەكانم ئامادەكرد و، هاوڕێیانیش خەریكی قۆڵكردن و رێكخستنی شوێنی دانانەوەی TNT بوون، بەڵام لەبەر ئەوەی خاكی ژێر هێڵە ئاسنینی شەمەندەفەرەكە یەكجار رەق بوو، هاوڕێیان گەلێك ماندووبوون، TNTیەكەم بەشێوەیەكی هونەری پوخت رێكخست و داوام لەهاوڕێیان كرد كە دووربكەونەوە لەشوێنی دانانی TNTیەكە نەوەكو هەڵەیەك رووبدات و لەدەستمدا بتەقێتەوە، با هەر من شەهید بم و ئێوە بگەڕێتەوە باوەشی حزب، هاوڕێیان بەپەلە دووركەوتنەوەو، منیش كارەكەم ئەنجامداو TNTیەكەم لەژێر هێڵەكە دانایەوە..

بەخێراییەكی زۆرەوە بەرەو گوندی گردەسۆر بەرێكەوتین و، لەگەڵ رۆژهەڵاتندا لەكێبڕكێ دابووین، دونیا روناك داهات و گور و سەگ لێك جیا دەكرانەوەو، جولە كەوتە ناو گوندی گردەسۆر، هاوڕێ (كانەبی گەورە) داوای كرد خێراتر بڕۆین و بگەینە ناو گوندەكە، كە لەگوندەكە نزیك بووینەوە، ماڵێك دەرگایەكی گەورەی هەبوو، دانەخرابوو، رووبەڕوومان بوو، پیكابێك لەحەوشەی ماڵەكە بوو، بەپەلەو وریاییەوە خۆمان خستە حەوشەكەوە، خاوەن ماڵەكە لەژوورێكی دەرگا كراوەوە بەرامبەر حەوشەكە پاڵیدابۆوە، دەرپێیەكی كوردەواری سپی لەبەر دابوو، كورتەكەكی مەیلەو شینی پۆشی بوو، دیاربوو بەئاگا بوو، چاوی بە ئێمە كەوت و یەكسەر هەڵسایەوەو، شەرواڵەكەی لەبەر كردو جەمەدانیەكەی لەسەرناو، زۆر بەخێرایی دەبەیەكی ئاوی هێناو، دەبەكە گوشیان لێ پێچابوو، بۆ ئەوە بەشەو تەری بكەن، تاكو ئاوەكە سارد بێت، هەروا شفتیەكی خستە ناو پیكابەكەو، ووتی سواربن، بەبێ ئەوەی بپرسێ ئێوە چنە! یان لە چ حزبێكن، یان بەرەو كوێ دەچن؟ گەلێك بەزانایی و بەبێ ئەوەی بشێوێ پیكابەكەی لەحەوشەكە هێنایە دەرەوەو بەخێرایی زۆرەوە لێیدەخوڕی، لەئێمە بە پەلەتر بوو، بەرەو جادەی گوندی قەشقە- بیستانە و لەماوەیەكی كەمدا ئێمەی گەیاندە هەرەتەكانی (بەرزاییەكانی) گوندی قەشقەو دابەزین و، دەبە ئاوو شفتیمان لەیاد نەكردو، ئەویش بۆی دەرچوو، ئەم هاوڵاتیە ئازایەو نەترسە، كارەكەی گەڵەك گەورەو تەژی مەترسی بوو، لەوكاتەدا بەكەم كەس ئەنجام دەدرا، لەبەر ئەوەی ئەوكارەی كاكەی جوتیارو تێكۆشەر كە جێبەجێی كرد، لەئەنجامدانی ئەركێكی پێشمەرگایەتیدا فرە سامناكتر بوو، چونكە ئەگەر بگیرایە، خۆی و تەواوی خانەوادەكەی دەبوونە قوربانی و شەهیدی دەستی پیاوكوژانی حزبی بەعس... ! بەڵام دڵسۆزی ئەم جوتیارە قارەمانەو نیشتمانپەروەرەو خۆشەویستی بۆ پێشمەرگەو گەل و نیشتنمانەكەی، بەبێ گوێدانە سامناكی و مەترسیەكانی كارەكەی بەڕێوەبردو، پێنج پێشمەرگەی لەكارەساتێكی چاوەڕوانكراودا رزگار كرد، هیوادارم ئەم مرۆڤە مرۆڤدۆستە لەژیاندابێت و تەمەنی درێژ بێ و ئاسودەو خۆشحاڵ بێت، گەلێك ئارەزووش دەكەم كە ئەم نوسینە ببینێت.

رۆژی 20/7/1980 لەدەوروبەری كاتژمێر 9 بوو، كە كاتی هاتنی شەمەندەفەرەكە بوو بۆ سەر شوێنی TNTیەكە، ئێمە بەپەرۆشەوە چاوەڕوانی سەركەوتنی كارەكانمان بووین و لەجادەی قەشقە، بیستانە تەواوێك دووركەوتبوینەوەو، لە زوورگەكانی پشتی گوندی قەشقە بووین، و لەهێرشی جاش و پیاوانی بەعس و ئەمن بەدوووربوین، بواری دەربازبونمان فراوان بوو، لەناكاودا دەنگی تەقینەوەیەكی یەكجار زۆر بەهێز هات و تۆزو دوكەڵ لەشوێنەكە بەرز بۆوە، زانیمان TNTیەكە لەژێر شەمەندەفەرەكە تەقیوەتەوە، وسەركەوتین، هاوڕێ (كانەبی گەورە) ووتی با شفتیەكە بخۆین و پشو بدەین، دوای ماوەیەكی كەم چەند فرۆكەیەكی هەلیكۆپتەر بۆ ناوچەكە هاتن و ماوەیەك سوڕانەوە، بەڵام ئێمە بە هاوكاری و یارمەتی كاكەی جوتیاری تێكۆشەر رزگارمان ببوو، گەیشتبوینە ناوچەیەكی گونجاو بۆ خۆ حەشاردان و دەربازبوون.

ئەو كردەوەیەو تەقینەوەكە دەنگدانەوەیەكی فراوانی لەناوچەكەو ناو شاری هەولێر هەبوو، لەبەر ئەوەی لەم كات و سەردەمەدا تەقینەوەی وا بەهێز و كاریگەر رووی نەدابوو، تەواوی دانیشتوانی دێهاتەكان گوێبیستی دەنگی تەقینەوەكە ببوون، لەهەمانكاتدا شوێنی تەقینەوەكە لەجادەی كەركوك نزیكبوو، وەستانی شەمەندەفەرەكەیان دەبینی، بۆ ماوەیەكی باش ئەم كارە بووە جێگای قسەو باس و هەواڵی جەماوەر.

سەربەرزی و تەمەن درێژی بۆ كاكەی جوتیاری تێكۆشەر

14/7/2019

  • 1