ئەمە بڵاوبكەوە
FaceBook  Twitter  

د. حەسەن حەمادە

و: رابەر رەشید

ئەو كافرانە بە كارامەیی و ژیری ‌و زیرەكی و لێهاتوویی خۆیان، ئاگرە هەمیشەییەكەی دۆزەخ و ئەو گەرما پڕوكێنەی ناو دۆزەخ دەگۆڕن بۆ وزەو لە دروستكردنی شارستانییەتە نوێیەكەی خۆیاندا بەكاریدەهێنن، ئەوەش بە سوودوەگرتن لە بیردۆزەكانی نیوتن‌و گالیلۆو ئەنیشتاین‌و ئەدیسۆن‌و ئەوانیتر. دەستپێك ئامێری كارەبا بەرهەمهێن و كەلوپەلی ناوبڕو دابڕی كارەبا دروست دەكەن، پاشان گومەزی شووشەیی زەبەلاح بۆ بەرگەگرتنی گەرمای دۆزەخ و لە ناوەوەش فێنككەرەوە دادەهێنن كە هەر یەكەو بەشی شارێكی گەورە دەكات. لە ناو ئەو گومەزانەش شارو كارگەو كارخانەو كێڵگە كشتوكاڵییەكانیان دروست دەكەن و دەست بە بونیادنانی ئابووریی نیشتیمانی و پیشەسازییە گرانەكانیان و دروستكردنی كۆمەڵگەیەكی شارستانیی یەكگرتوو و پتەو دەكەن، بۆ بەهێزكردنی ئەوەش لە بیرۆكەكانی فرۆیدو سارتەرو نیچەو ماركس‌و ئەوانیترەوە سود وەردەگرن و هەنگاو دەهاوێژن. بەمەش شارستانییەتێكی دەیان جار گەورەتر لەوەی لە سەر زەوی دروستیان كردبوو دادەهێنن، ئەوەش لە سایەی ئەو وزە زۆروزەبەندو بێسنوورو خۆڕاییەی لە دۆزەخدا لەبەردەستیاندایە، ئەو ئاگرەی هەرگیز كوژانەوەی بۆ نییە، بەمەش ئەو دۆزەخە گڕگرتووە دەكەنە بەهەشتێكی سەوزو جوان و پڕ لە گوڵ و گوڵزار. ئەمەش لەگەڵ ئەو فەرموودەیەی پەیامبەر یەكدەگرێتەوە كە دەفەرموێت: "بەهەشتەكەی خۆتان لە ئاگرەوە وەربگرن–سەرچاوە الصحیح الجامع".

لە بەهەشتیشدا عەرەب بەو كێوێتی و نەزانییەی خۆیان دەست بە كاولكردن و وێرانكردن دەكەن، بۆ ئەمەش سوود لە بیرۆكەكانی ئیبن تیمییەو زەواهری و بەغدادی و قەرەزاوی و عرێفی و ئەوانەیتر وەردەگرن و سەرەتا ململانێ لە سەر كەنیزەك و حۆرییەكان دەكەن و لە سەر بەتاڵانبردنی سەروەت و سامانی بەهەشت‌و خێروبێرەكانیشی بۆ وڵاتی كافرەكان دەكەونە پێشبڕكێ‌و ململانێش لە سەر سەرۆكایەتی و پیاوماقووڵی‌و دەسەڵات دەكەن‌و جەنگ بەرپا دەكەن‌و بەهەشت بۆ میرنشینی جۆراوجۆر دابەش دەكەن، بە كەللەسەرو ئێسكوپرووسكی هەژارو بەشمەینەتانیش سنووری میرنشینەكانیان دەكێشن و رووبارەكانیان بە بە خوێنی بێتاوانان دەڕەنگێنن‌و جۆگەلەی شەراب‌و رووباری هەنگوین‌و ماستاوی خۆش بە ئاوی ئاودەسخانەكان پیس دەكەن‌و هەموو هۆكارەكانی خۆشكردنی ژیان تیایدا تێكدەشكێنن، ئەو بەهەشتە فیردەوسە دەكەنە دۆزەخێكی وا كەس بەرگەی نەگرێت. دوای ئەوەی عەرەب شارستانیی خۆیان كاول كرد، پەنا دەبەنەوە بەر زانا راستەقینەكانیان، تاكو شارستانییەتێكی وەكو ئەوەی كافرەكانیان بۆ دروست بكەن، بۆ ئەمەش بە دوای ئەو زاناو بیرمەندانەیاندا دەگەڕێن كە كاتی خۆی لە سەر زەوی پشتگوێیان خستبوون، وەكو ئیبن خەلدون‌و ئیبن سیناو ئیبن روشدو ئەبو عەلای مەعەڕی‌و فارابی‌و رازی‌و ئەوانەیتر، بەڵام هیچ كامێكیان لە بەهەشت نادۆزنەوە، لەبەرئەوەی كاتی خۆی تێكڕای ئەو بیرمەندانە لە لایەن زانایانی موسڵمانانەوە تۆمەتی كافربوون و زیندیق بوونیان درابووە پاڵ‌و روویان لە دۆزەخ كردبوو و چووبوونە پاڵ زانایانی كافرەوە. ئەو كاتەش لە بەردەم عەرەبدا شتێك نامێنێتەوە پەنای بۆ ببەن، جگە لە پەنابردنە بەر دانیشتوانی دۆزەخ، ئەوانەی خاوەنی زانست‌و پیشەسازی‌و تەكنەلۆژیان، تاكو پێداویستییەكانی ژیانیان پێ ببەخشن، كە ناتوانن بە بێ ئەو پێداویستییانە بژێن، ئەو كاتەش كافرەكان مەرجی توندی خۆیان‌و ئەو نرخەی بیانەوێت دەخەنە سەر پێداویستییەكانیان‌و جارێكی دیكەش جڵەوی فەرمانڕەوایی و چارەنووسی عەرەب دەگرنەوە دەست، وەكو چۆن پێشتر لە سەر رووی زەوی دەیانكرد، بەمەش جارێكی دیكە گەڕاینەوە بۆ ناو جوغزی ئەو فەرموودە پیرۆزەی خۆت كە وەسفت كردووین: "ئەوەی لەوەیاندا كوێرو نابینا بێت، ئەوا لە رۆژی كۆتاییشدا نابینا دەبێت‌و رێگە ون دەكات" –سورەتی ئیسرا، ئایەتی 72). ئەمە بارودۆخی عەرەبە، نە لەم دونیا بایی ئەوەندەیان چاندو نە لە رۆژی كۆتاییشدا سوودێكیان هەبوو، خەسڵەت‌و تایبەتمەندییەكانی مرۆڤایەتی‌و عیززەت‌و شكۆمەندیش، جگە لە وشەگەلێك كە تەنها بە كەڵكی گۆرانیی هیشەك بیشەك دێن، هیچیتر نین.

سەرچاوە: https://mufakerhur.org