ئەمە بڵاوبكەوە
FaceBook  Twitter  

بەشی سێیەم

بۆ جێبەجی كردنی بڕیاری ناردنەوەی ئافرەت و منداڵەكان بۆ شار ، دەبێت لەگەڵا دایكی ساوێن دابنیشم ، بارودۆخەكەی بۆ باس بكەم و رازی بكەم كە شەو لەگەڵا ئافرەتەكانی تر بیانبەینە گوندێك و بەیانی بۆ شاری هەولێر بگەڕێنەوە ...

دانیشتین و بەكورتی باسی بارو دۆخەكەم خستەروو ، كە ئێستا ئێمە گەمارۆ دراوین ، سوپا وجاش لە هەموو لایەكەوە ئامادەكاری بۆ هێرش و شەڕ لە دژی هێزی پێشمەرگەی كوردستان دەكەن ، دانیشتوانی دۆڵەرەقە خەڵكی نیشتمانپەروەرو لایەنگری پێشمەرگەن بۆیە ئەم ماوەیە توانیومانە لەم ناوچەیە بمینێنەوە ، بەڵام توانای ئەوانیش سنوردارە و دەبێت لەم ناوە دوور بكەوینەوە ، بۆ ناوچە شاخاوییە سەختەكان برۆین ، وەكو پارتیزان بژین ... دەبێت هاوڕێ‌ (نجم الدین مامۆ)ش چارە بكەین و رەوانەی رانیەی بكەین ، ئێمەش ، بەیانی تەنەكەیەك ئارد لەم گوندە دەكرین و بەیارمەتی ئەوان دەیكەینە نان و دەرۆین ، دەبێت دەربازبین ... ئێوەش دەبێت بگەڕێنەوە ... ووتی من بۆ شار ناگەرێمەوە ، منیش پێشمەرگەمە ، ژیان و مردنم لەگەڵا تۆ دەبێ‌ ، لێرە لەگەڵا ئێوە بكوژرێم زۆر باشترە لە ژیانی ژێر دەستەیی و هەر رۆژەی لە ماڵێكدا و ژیانیش رۆژێك و دوان نییە ، چۆن وا تەواو دەبێت ؟ فەرمانگەی ئەمنی هەولێر هەوڵی گرتنمان دەدات .. بچمە لای كام خێزان ، براكانت دەربەدەر و هەڵاتون ، ماڵی باوكم لە ژێر چاودێریدان ... ماڵی ئامۆزاكانیشتم بێزار كردوە ، بۆیە بەهیچ جۆرێك ناگەڕێمەوە بۆ شار چی دەبێت با ببێت ، منیش لە ئێوە زیاتر نیم .. !! ووتم قسەكانت راستە ، بەڵام نابێت هیچ مرۆڤێك وا بەئاسانی بیەوێت بكوژرێ‌ و خۆ بەدەستەوە بدات ، چۆن دەبێت ئێمە ئەو ژمارە پێشمەرگەیە كە دەزانین لەم ناوە بین چاوەروانی مردن دەكەین ، كارێكی نابەجێ‌ و لە نگە ، دەبێت دژی مردن و نائومێد بجەنگین ، دوای ئەوە ئەگەر كوژراین و شەهید بووین ئەو كاتە حزب و جەماوەر بەجەنگاوەر و ئازا و شەهیدی راستە قینەمان دەزانن ، پاشان دەبێت تۆ هەوڵی مان و ژیان بدەیت لەبەر (ساوێن) ئەم ئێستاكە نازانێت چ باسە ... بۆیە دەبێت ببیتە هەڵگری ئێش و ئازاری میللەتەكەمان و ئەو جەنگاوەرانە و ئەوەی دیوتە و زانیوتە بۆ (ساوێن)و منداڵانی وەكو ئەو باس بكە ، بابزانن ئێمە لەسەر چی كوژراوین و شەهید بووین .. ! دوای وت و وێژێكی دوور و درێژو تەژی ئازار ، ووتی باشە دەگەڕێمەوە شار بچمە چ ماڵێك ؟ ووتم بچۆ ماڵی مامۆستا (ئەحمەد شێخۆ) دایكی هەژار شوێنیتان دەكاتەوە ، وەكو دایكێكی مهرەبان لە باوەشتان دەگرێت ... لە رێگای ئەوانەوە بچۆ ماڵی خاڵم لە چەمچەماڵا و ئەوان دەتوانن بتانبەنە ماڵی كاك (زاهیر)ی برام كە ئێستاكە لە سلێمانی خۆیان حەشارداوە ، ووتم دڵنیام و لە دوا رۆژ بەیەكتر شاد دەبینەوە ، داوای لێبوردنت لێدەكەم ، كە نەمتوانیوە ژیانێكی ئارام و ئاسودەتان بۆ دابین بكەم ، لە دوا رۆژیشدا بەكاكە (ساوێن) بڵێ‌ تۆ هەرچەندە تەمەنت بچوك بوو ، بەڵام باوكت داوای لێبوردی لێكردی ... هەر دووكیانم لە باوەش گرتوو ، هەوڵمدا سۆزی باوكایەتی كارم تێنەكات و بە رووێكی خۆشەوە بەڕێیان بكەم ... لەگەڵا هاوڕێ‌ (سەلام)ی كوڕی هاوڕێ‌ (نجم الدین مامۆ و هاوڕێ‌ هەژار كە دایكی لەگەڵدا بوو) ، بۆ گوندێكمان بردن كە لە نزیك جادەكەی دۆڵەرەقە بوو ، دوا گوندی دۆڵەكە بوو ، بەرەو زینی ئەستێرۆكان ، ئێمە لە گوندەكە نزیك بووین ، تاریك داهاتبوو گەیشتینە گوندەكە ، ماڵێك بەرامبەرمان ، لە رۆخی گوندەكە بوو چووینە حەوشەكە و بووینە میوانییان ، خاوەن ماڵەكە و تەواوی ئەندامانی خانەوادەكە زۆر بەگەرمی پێشوازییان لێكردین ، بەرووێكی خۆش و میواندۆستانە داوایان كرد دانیشین و پشوو بدەین ، سوپاسمان كردن و ووتمان ، ئەو ئافرەت و منداڵانە ئەم شەوە لاتان دەبن ، بەیانی ئەگەر بۆ شاری هەولێر بەڕێیان بكەن زۆر ممنونتان دەبین و سوپاستان دەكەین ، خاوەن ماڵەكە ووتی بەسەرچاو بێن ، ئەوانە خوشك و كەس و كاری ئێمەن و هیچ خەمتان نەبێت ، بەیانی سەیارەیان بۆ ئامادە دەكەین و بەبێ‌ گیروگرفت بۆ شوێنی خۆیان بەڕێیان دەكەین ، سوپاسمان كردن و بەجێمانهێشتن ، دابڕان لەكەس و كار و خۆشەویستان گەلێك ناخۆش و پڕ ئازارە ، بەڵام بۆ ئێمە كارێكی باش بوو ، ئەركمان سووك و ئاسانتر بوو ، بەر لەوەی بەرەو گوندەكە بچین ، لەگەڵا هاوڕێیان (نجن الدین مامۆ و مەلا حسن و حمە سعید و مەلا جەلال) دانیشتبوین ، لە هاوڕێ‌ (مەلا حسن)م پرسی هاوڕێ‌ تۆ تازە لە سوڤیەت گەڕایتەوە و لە خواكورك بووی ، بۆ چی وا بەپەلە گەیشتیە ئەم ناوچەیە ؟ بۆ چی كاری حزبی و پێشمەرگایەتی بەم زووانە كۆتایی دێ‌ ؟ هاوڕێ‌ (مەلا حسن) یادی بەخێر ، ووتی نە ئارەزوم هەبوو ، نە لە سەر داوای من بووە ، بەڵكو بڕیاری حزبە و جێبەجێم كردووە ، ووتم بڕیارەكەی حزب و جێبەجێكردنەكەی تۆش جێگای گلەیی و رەخنەیە ، وەكو هەڵوێستەكەی یەكێتی و كاك (كۆسرەت)و .. !! لە ماڵەكە هاتینە دەرەوە و رووبە رووی پێشمەرگەكانی حزب بووینەوە كە رێزیان بەستبوو لە جادەی دۆڵەرەقە دەپەڕینەوە ، هاوڕێی شەهید(محمد حەللاق) لە پێشەوەی هێزەكە بوو ، رووداوێكی چاوەڕوان نەكراو بوو ، گەشاینەوە و دڵخۆش بووین ، چونكە هاوڕێیانمان لە دۆڵی بالیسان رزگاریان بووە و بۆ ئێمەش پشت و پەنایەكی بەهێز بوو ، كارمان ئاسان بوو ، هەر بەرێگاوە هاوڕێ‌ (محمد حەللاق) ووتی ، هەموومان لەگەڵا برادەرانی پارتی ئیمرۆ 30/8/1988 بڕیاری ئینسحابماندا ، دۆڵی بالیسان بەتەواوەتی چۆڵكراو گوندنشینەكان بەرەو شارەكان كۆچییان كرد ، برادەرانی یەكێتی دوێنێ‌ ئینسحابیان كرد ، ئێمەش ئەو پێشمەرگانەی بۆ مەفرەزەكانی پارتیزانی دەمینێنەوە دابەشمان كردن ، هەر مەفەرزەو بۆ لایەك رۆیشت ، تەواوی هێزی پێشمەرگەی شیوعی و پارتی بەبێ‌ گیروگرفت بەیەكەوە گەیشتینە شوێنەكە و لە ژێر دار بەڕوەكان دابەش بوون ، هێزەكەی پارتی بەسەر پەرشتی و لێپرسراوێتی كاك (نادر هەورامی)بوو .. هێزەكەی حزبمان هاوڕێیانی زۆر ئازا و وریاو شارەزای لەگەڵدا بوو ، بەتایبەتی هاوڕێ‌ (محمد حەللاق) بەیانی رۆژی 31/8/1988 هاوڕێیانی مەڵبەند و بەرپرسەكانی پێشمەرگە سەرقاڵی دۆزینەوە رێگایەك بوون لە پێناو دەرچوون لە ناوچەی دۆڵەرەقە ، دوای نیوەرۆ هەواڵی هێرشی حكومەت بۆ ناوچەی قەندیل بڵاوبۆوە و باس لە تێكشكانی جەیش و جاش دەكرا ، هەروا ووترا پێشمەرگەش شەهید و برینداری هەیە .. هەواڵی ئینسحابی هێزی پێشمەرگە لە دۆڵی بالیسان بڵاو بۆوە و بەخێرایی گەیشتە شارەكان بەتایبەتی رانیە و دەوروبەری قەڵادزێ‌ ...

تێبینی :-

رستەیەك بەهەڵە چاپكراوە (منیش لەوان هەراشتربوو) راستیەكەی وایە (نەمین)یش كەمێك لەوان هەراستربوو . 

رەوەند

  • 1