ئەمە بڵاوبكەوە
FaceBook  Twitter  

 

بەشى یەکەم ـ

ئەگەر واز لە وە بێنین کە ئەمریکا لە جەنگى دوەمى جیهانەوە سەرکوتکەرى هەمو گەلانى ئازادیخوازە لەسەرانسەرى جیهان دا و تەنها باس لە هەڵوێستەکانى بکەین بەرانبەر بە گەلى کورد ئەڵێم: ـ

ئەمریکا تا ئەو ڕۆژەى (سەدام) ملى بۆ کەچ کردو لەگەڵ شاى ئێران لە ئازارى ٩٧٥ پێک هات. حکومەتى شاى ئێران بە پێی خواستى ئەمریکا یارمەتى شۆڕشى کوردى ئەدا.. واتە بە مەبەستى لاوازکردنى دەسەڵاتى (بەعس) لە عێراق دا. کاتێکیش (سەدام) خۆى تەسلیم کرد. ئەمریکا ئیشى بە کوردو شۆرشەکەى نەما و ئاش بەتاڵى پێ کرد!!!

ساڵى ٢٠١٧ بە جۆرێک چینى بورجوازى و بنەماڵە خاوەن موڵک و خێڵەکانى تەفرەدا. کە ئەمڕۆ یا سبەینێ حکومەت بۆ کوردى عێراق دائةمەزرێنێ. چونکە ئەو کاتە بە تەماى کةرت وپەرتکردنى عێراق بو!! بەڵام کە ئەوەى بۆ پێک نەهات و تا ڕادەیەک حکومەتى عێراق ملی بۆ کەچ کرد پابەندى سیاسەتەکەى بو. ئەوە بو پاش رێفراندۆمەکەى ٢٥/٩/٢٠١٧ پشتى کردە کورد و بوە لایەنگرى حکومەتى عێراق. کە هێرشى کرد بو (کەرکوک و دوز) و ناوچە کوردوستانیە ڕزگارکراوەکان و داگیریان کردەوە و بە هەزاران خێزانى ئەو ناوچانەیان دەربەدەر و ماڵ وێران کران. کە تاکو ئەمڕۆ هەر ئاوارەن!!

هەمان داستان لەگەڵ کوردى سوریا/ ش دوبارەکرایەوە. ئەمریکا لە برى سوپاکەى خۆى کوردەکە (سەرکردەکەى) تەفرەدان و چەکدارى کردن شەڕى ـ داعش ـ ى پێ کردن و ناوچەکەى پێ پاکردنەوە. وەکو (ترەمپ) ووتى (( پارەیەکى زۆرى پێ دان ـ واتە بەسەرکردەکان)) !! ئەمە گوایە لە خۆرئاواى کوردوستانى سوریا. هەرێمێکى سەربەخۆیان بۆ دائەمەزرێنێ!!

بەڵام کاتێک ئیشى بەوانیش نەما بەناوى دیارى کردنى (ناوچەى ئارامەوە) ڕێگەى دابە تورکیاى هاوپەیمانى کە ئەو ناوچەیە بە هێرشێکى چڕوپڕى هاوچەرخ داگیر بکاتەوە پێگە سوپاییەکانى خۆى بۆ ئەو هێرشە چۆڵ کرد!!

ئەم ڕوداوە خوێناویە وێرانکەرە ئۆباڵى لە ئەستۆى ئەو سەرکردە مفتە خۆرانەیە کە دەرزو پەند لە هەڵوێستى ئەمریکا بەرانبەر بە کوردى عێراق وەرنەگرت و چوونە ژێر دەوارەکەیەوە!!

ئیمپریالیەتى ئەمریکا لە پەنجاکانى سەدەى ڕابوردوەوە چاوى بڕیوەتە خۆرهەڵاتى ناوەڕاست کە یەکێکە لە هەرە ناوچە دەوڵەمەندەکانى جیهان و ئەیەوێ ئەو نەخشە ئیدارى جوگرافیایەى کە دوابەدواى جەنگى جیهانى یەکەمى جیهان ڕەنگى بۆ ڕیژرابو بگۆڕێ سەر لەنوێ دایبڕێژێتەوە. بەهەر جۆر و بەهەر نرخێک بۆى سەر بگرێ. واتە ئەو دەوڵەتانە هەڵبوەشێنێتەوە!! داعشى بۆ ئەو مەبەستە هێناو هەر بۆ ئەو مەبەستەیش شەڕى داعش ئەکات. بەڵام چ لە عێراق و چ لە سوریا بە کوردى ئەکا..!!

ئەم هێرشەى تورکیا بۆ سەر کورد و حکومەتى سوریاش کۆمەڵێک مەبەستى بە دواوەیە هەر لە پێناو ئەو پیلانە سەرانسەریەدا: ـ

أـ کورد نابێ هەرێم و کانتۆنى سەربەخۆى هەبێ و لەژێر ڕکێفى ئەمریکا دەربچن و کورد واتەنى ـ ((زەرەرى بۆ پەزەکان هەبێ))

ب ـ نابێ هیچ کاریگەرێکى ڕاستەوخۆ و ناڕاستەوخۆى بۆ تورکیاى هاوپەیمانى هەبێ!!

ج ـ تورکیا لە ماوەى چەند ساڵى ڕابوردودا و لە نێو ئاوارەکاندا بە هەزاران چەکدار و مەشق پێکراوى ئامادەکردوە و لەگەڵ ئەم هێرشەدا ئەیانگێڕێتەوە بۆ پەلاماردانەوەى حکومەتى سوریا!!

چ ـ بەهۆى ئەم شەڕەوە جارێکى تر بوارى لەبار بۆ داعش ئەڕەخسێ کە دەست بە چالاکى بکاتەوە لە سوریاو لە عێراق/ یش.. واتە پڕۆژەى کەرت و پەرتکردنى عێراق و سوریا بە شێوەیەکى تر دەست پێ ئەکرێتەوە!!

کەچى سەیرو سەمەرە لەوە دایە کە زۆرێک لە کەس و لایەنە سیاسیە کوردەکان گوێیان بۆ دوان (خوتبە) بێ سەرو بەرەکانى (ترەمپ) شل کردوە و دەماودەم باسی ئەکەن گوایە [ دەست لە کورد بەرنادات] !!

بەمەرجێک ئەوە تەنها تەفرەدان و کات بەسەر بردنە چونکە ئەمریکا و پەیمانى ناتۆ پیش وەختە ئەزانن تورکیا ئەبێ تا کوێ ئەو ناوچەیە داگیربکات و ئاوارەکان بگەڕێنێتەوە و جێگە بە کوردەکان لێژبکەن و ناوچەیەک بە ناوى کوردوستانەوە لە سوریا نەمێنێ!!

دوبارە ئەڵێم چین و توێژە خۆپەرستە مشەخۆرەکەى کورد بەرپرسن لەم بارودۆخە. چونکە پشت بە ئەمریکای دوژمنى گەلانى ئازادیخواز ئەبەستن!!

پێشینان وتویانە ـ

((هەزار ساڵ بکەى بێگانە پەرستى

ئاخرى هەر ئەهێنى نوشوستى))

 دوو بەشى ترى ماوە تکایە چاوەڕوان بن

 

                                               

 

  • 1