ئەمە بڵاوبكەوە
FaceBook  Twitter  

بەشێ‌ سیێ‌:

حزب چاوان بوونە ژێدەرێن پارۆیێ‌ ژیارێ‌:

كابینێن پێشان سیاسەتا رازیكرنێ‌ بكارئینا لهەبەری تاك و گروپێن هەیی د جڤاكێ‌ مەیێ‌ كوردستانی دە، هەولدا حزب ببنە ژێدەرێن سەرەكی یێن پارویێ‌ ژیارێ‌ یێن تاكێن جڤاكێ‌ لسەر كیستێ‌ حكومەتێ‌ و داهاتێ‌ گشتی یێ‌ خەلكێ‌ ستەملێكری، حزب شیان بەرامبەر دامەزراندنێ‌ د بیاڤێن فەرمانبەریێ‌ دە و خانەنشینكرنێ‌ لژێر ناڤێن جودا جودا خەلكەكێ‌ ژ خوە كومڤەكەن.

هەر وەسا بەرپرس و ئەندامێن سەركردایەتیا حزبان ب پلێن بلند هاتنە خانەنشینكرن و پارچێن عەردی یێن زێدە بو دابینكرن، ئێدی ئەو كەسێن ب ڤان دەستكەفتان شادبوی بێ‌ حەزا خوە بوونە سیاسەتڤان و كەتنە دگورەپانا سیاسەتێ‌ دە، كەسێن حەزا پاشگەزبوونێ‌ هەی راستی كەفێن قوتبرینێ‌ دهاتن، ئەڤە بخوە د هوندرێ‌ خوە دە دبیتە سیاسەتا موبەرمەج یا كوێلەكرنا تاكێن جڤاكێ‌ د دەستێن پارتێن سیاسی دە.

هەتا ئیرۆ حزب ب ژێدەرێن پارویێن ژیاریێ‌ یێن تاكێن جڤاكێ‌ دهێنە دیتن، پرۆسەیا خانەنشینكرنێ‌ و دامەزراندنێ‌ ب ئاوایێن نەپەن بەردەوام دهێتە برێڤەبرن، ئەڤ سیاسەتە گەلەك یا مەرسیدارە لسەر ئایندە و پاشەرۆژێ‌، جاران دگوت حكومەت دایك و بابە، بەس نها حزب لسەر كیستێ‌ حكومەتێ‌ ئەوی رۆلی دگێرن و ئەو شاشیا خوە دكەنە منەتەك مەزن ژی لسەر هاوەلاتیان.

یاریكرنا حزبان ب حكومەتێ‌ دێ‌ كارەساتێن مەزن لپشت خوە هێلیت، حزبێن سەرەكی خوە ب حكومەتێ‌ مەزن كر و دبەرامبەر داژی حكومەت بچوویك كر، نوكە حزبێن بالادەست و كەسێن ب باندور دناڤ دە ب زەنگین و دەولەمەند دهێنە دیتن، حكومەت ژی ب دەیندار و بەریكێن ڤالا دهێتە حەسباندن.

دەما حكومەت دبیتە یارپێكرن، حزب دبنە كویخە لسەر حكومەتێ‌، پەیداكرنا پارویێ‌ ژیارێ‌ دبیتە منەت لسەر هاوەلاتیان، هەموو چەمكێن وەلاتی دبنە ئەسیر دبن كاریگەریا حزب و كەسێن بالا دەست دا، رێكا لپێشیا خەلكێ‌ دمینیت رەنگە هن جاران رەڤینبیت یان ژی قەبولكرنا كوێلەبوونێ‌ بیت وەكە ئەمر واقع.

ئەڤ سیاسەتە پرسا گورانكاریان ددەتە پاش، چونكە چ حكومەت ب واتەیا دروست ناهێنە پێكئینان، حزبێن بالا دەست حزبێن بچووك بازاردكەن و لسەر رێكا سیاسەتكرنا دروست لادەن، هەر دو پێكڤە تاكێن جڤاكێ‌ ب پارێن حكومەتێ‌ دكرن، واتە حزب هەر ئێك ب قەبارێ‌ خوە یێ‌ جەماوەری د هەموو قووناغان دە دكارن ببنە گەفە لسەر پارویێ‌ ژیاریێ‌ یێن تاكێن جڤاكێ‌، ئەگەر ب پارێن حكومەتێ‌ نەبیت ئەڤان حزبان هەمیان دو هەزار ئەندامێن رێكخستی نابن و دێ‌ كەڤنە دبن مەزنترین كریز دە. 

دابرین ژ ئایدیا (پەدەكێ‌ دراڤی):

دەمێ‌ سەرهەلدان هاتیە ئەنجامدان، هێزا وێ‌ ژ گەل دهاتە سەرچاوەركن، پرانییا هەرێمێ‌ ژ دەستێن داگیركەران هاتە رزگاركرن، هەر زوی ساخلەتێن دزینێ‌ پەیدابوون، كەل و پەلێن گرێدیی ژێرخانا ئابوری ب ئەرزانترین شێوە ل بازارێن دەولەتێن داگیركەر هاتنە فروتن، هیچ لێپرسینەك دڤی واری دە نەهاتەكرن، پاشان ئەو دەڤەرێن رزگاركری دیسان هاتنە بەردان و تێكرایا تەخ و توێژێن جڤاكێ‌ رێكا كوچكرنێ‌ هەلبژارت و مال و مولكێن خوە بجه هێلان و دەربدەری وەلاتێن داگیركەربوون.

ستراتیجیەتیا دەولەتێن زلهێز جارەك دن هێز بكارئینا و هێلا سیه و شەش دەستنیشانكر، پشتكی هنگی خەلك ڤەگەریا سەر مال و مولكێن خوە و بەرێ‌ كوردستانی ئیدارا هەرێمێ‌ بستویێ‌ خوەڤە گرت، ل وی دەمی رێژا فەرمانبەران گەلەك یا كێم بو، فەرمبانبەر ب پارەكێ‌ كێم دهاتنە رازیكرن و پارێن مایی ژی ب رێژە پارتێن كوردستانی لسەر خوە دابەشدكرن، ژ هنگی وەرە بیروكا پەیداركرنا یەدەكێ‌ درافی نەبوویە ستراتیجیەتا حكومەتا هەرێمێ‌، كو د روژانێن بەرتەنگ دە ب وی یەدەكی خوە راگریت. 

د پلانا حكومەتێ‌ دا رەۆش یا هاریكار بوویە، پەترول ب رەنگەكێ‌ بەرفرەه هاتە فروتن بێكو داهاتێ‌ وێ‌ ژبووی حكومەتا بەغدا بهێتە ڤەگەراندن، هەر دیسان رێژا هەڤدە ژ سەدێ‌ د دەمێن خوە دە هاتە گرەنتیكرن، ئەڤە ژبلی داهاتێن دن مینا (كومرك، باچ ...هتد) ئێدی هەست ب هەبوونا پارەكێ‌ زێدە مەزن ل هەرێمێ‌ دهاتە كرن، تەڤگەرەكا بازرگانی یا خورت د بیاڤێن هەمە جوردا هەبوونا وان دهاتە دیتن.

كەسەكێ‌ ئەگەر شیان هەبانە ب رێكەكێ‌ ژ رێكان سەرۆك وەزیری یان پارێزگەرەكێ‌ ببینیت، هەر چاوابیت دا دەستێن وی چەوربن ژ وەرگرتنا كوژمەكێ‌ پارەی یان وەرگرتنا پارچەكا عەردی یێ‌ گران بها، هەر وەچكی حكومەتێ‌ ئەو پارە بخوە دیتی و بێ دل پێڤەبوون ب شێوازەكێ‌ نەبەرنامەكری دەستكاری تێدە دكر و كەسێ‌ وان دڤیا د پاران رە دنژنی، هوسانێ‌ داهاتێ‌ هەرێمێ‌ مامەلە دگەلدا دهاتەكرن و دابرین ژ ئایدیا (یەدەكێ‌ درافی) بەردەومی پێدهاتەدان.

پەیوەندیێن كەسی ئێك ژ مژارێن گرنگ دهاتنە هەژمارتن، لسەر خاتر خاترانێ‌ هزاران كارێن نەرەوا دهاتنە سازدان، كەسێن نەفس نزم یێن بەرتەسك د پارستنا بەرژوەندێن خوخویی دە، ب ساناهی دشیان لڤێرە وێراهە ببنە خوەدی دەستكەفت، رێژەكا هەرە زور یا خەلكێ‌ ئێدی ب (كلاوات) تەماشەی كارێن دامودەزگەهێن حكومەتێ‌ دكر، مامەلا نەرم یا حكومەتێ‌ و دانا دەرفەتێن زور بو رێڤەبەر و كەسێن بەرپرس رەۆشەكا وەسا ئینا پێش، كەسێن كارەكێ‌ سەختە ئەنجام دا ژ حكومەتێ‌ نەترسن و حسابێ‌ بونەكەن، ئێدی دیاردێن هەرە كرێت سەرهەلدان مینا دیاردێن (هەبوونا چەند مووچەیێ‌، وەرگرتنا چەند پارچە زەڤیێن گران بها، چێكرنا كومپانیێن سەختە یێن جوراوجور، هەبوونا بندیواران و چەندین فێل و سەختەكاریێن دن د دەرحەقێ‌ ب هەدەردانا سەروەت و سامانێن گشتی دە.

تشتێ‌ كابینێن پێشان بیر تێدا نەكری ئایندە بوویە، ئەڤ هەموو داهاتێن زەبەلاح و دەرفەتێن زێرین یێن هاتنا دراڤەكێ‌ مەزن بۆ هەرێمێ‌ هزر د دروستكرن و پارستنا یەدەكێ‌ دراڤی (احتیاگ مالی) دە نەكریە، فەربو حكومەت نها خوەدیێ‌ یەدەكەكێ‌ وەسا بایە، شیانێن هندێ‌ لبەر دەستبانە خوە لهەمبەری نەخوشترین كاودانێن ئابوری دە راگریت، دا نەچار نەبایە پەنایێ‌ بو پاشكەوتكرنا مووچێن فەرمانبەران ببەت.

 

  • 1