ئەمە بڵاوبكەوە
FaceBook  Twitter  

 

خۆی لە ڕاستیدا ئەگەر باسی نا ئارامی و ناجێگری بكەین بۆ مڕۆڤەكان لەسەر ئەم گۆی زەویەدا بە هیچ شێوەیەك ناوچەیەكی ئارام كراومان بەرچاو ناكەوێت كە بەشێوەیەكی مسۆگەركراو بێت بۆ مڕۆڤە هەژارەكان چوونكە هەژارەكان بەردەوام بوونەتە قوربانی لەسەر دەستی كەسە دڕەندەكانی ئەم گۆی زەویەدا, كەچی بەردەوام تووشی برسێتی و ماڵ وێرانی و لەگەڵ چەندین جۆری دەستدرێژی جۆراوجۆری دیكە دەبنەوە,ئەگەر سەیری كیشوەرێكی وەكو ئەفریقا بكەین كە هیچ كاتێك هەست بە مڕۆڤ بوونی خۆمان ناكەینەوە, چوونكە چەندین كارەساتی نامڕۆڤایەتی بەرچاومان دەكەوێت خۆ ئەوانیش لە كۆتایی دا مڕۆڤن مافیان هەیە كە لەم ژیانەدا بە خۆشی و ئاسوودەیی بژین نەك بەشێوەی ڕەزالەتی و مەینەتی جگە لەوەش تەنها ئاوێكی پاكیان بێ شك نابرێت كە تینوویەتیەكەیان پێ بشكێنن ئیتر بە هەر شێوەیەك و حالەتێكدا بێت هەژارەكان لە هەر كوێیەكی ئەم گۆی زەویەدا بن ژیانیان نائارامە چوونكە دادپەروەریەكی ڕاستەقینە هێشتا لە دایك نەبووە كە هەموو كەسێك لە ژێری دا بحەسێتەوە.

ڕۆژهەڵاتی ناوەڕاست ئەو گۆڕەپانە ئاڵۆزو مەترسیدارەیە كە ژیانی مڕۆڤەكانی تێدا بەبەردەوامی لە ناجێگیری دایە, بەهۆی دەرئەنجامی ئەو جەنگ و كوشتاریەی كە لەم ناوچەیە ئەنجام دەدرێت,هەڵدانەوەی لاپەڕەكانی مێژوو ئەوەمان پێ دەڵێت كە ئەم ناوچەیە وەكو بوركانەكان بووە كە بەردەوام لە كوڵان دابووە كە لەهەر فرسەتێكدا تەقیوەتەوە,هەرچەندەش ڕۆژهەڵاتی ناوەڕاست كە بە مەڵبەندی سەرەكی سەرهەڵدانی ئاینە جیاوازەكان و هاتنی پێغەمبەرەكان دادەنرێت كە بە درێژایی مێژوو لەم ناوچەیەدا بە چەندان ئاین و پەیامبەرانی ئاینە جیاوازەكان خۆیان بە خەڵكی ناساندوە هەتاوەكو كۆتا ئاین كە ئاینی (ئیسلام)ە,بەڵام ئەوەی جێگای سەرنجە لەگەڵ هاتنی هەر ئاینێك و پەیامبەرێكی دا ڕاستەوخۆ بەربەرەكانێ و جەنگ هەڵگیسراوە, كەلە دەرئەنجام دا خوێن ڕشتنی لێكەوتۆتەوە كە بە دەیان خەڵك خوێنیان تێدا ڕژا,من هیچ كاتێك بەرگەی ڕژانی خوێنی هیچ مڕۆڤێك ناگرم لەسەر ئەم گۆی زەویەدا بەتایبەتیش كە مڕڤێك بەبێ تاوان لەسەر هیچ شتێكدا بكوژرێت چوونكە ئێمەی مڕۆڤ كاتێك هاتوینەتە سەر ئەم گۆی زەویەدا بۆ ئەوە هاتووین كە خۆشەویستی و پەیامی ئاشتی بڵاوبكەینەوە بۆ یەكتریدا نەك وەكو گورگێك بكەوینە جەستەی یەكتری و یەكتر لە ناو ببەین.

بەڵام خۆ هەرچەندەشكە (ڕۆژئاوا) بێ بەش نەبووە لەم جەنگ و كوشتاریانەدا كە بە درێژایی مێژوودا دەبینرا بە تایبەتیش لەسەردەمی قەشەكاندا كە ئەوكات ئاینی (مەسیح) باڵا دەست بوو , جگە لەوەش ناكۆكی لە نێوان ڕەش پێستەكان و سپی پێستەكان دا كە بەردەوام ڕەش پێستەكان كران بە كۆیلەیەكی چەوسێنراوی ژێر دەستی سپی پێستەكاندا, بەڵام خۆ ئەوانیش هەر لە كۆتایی دا مڕۆڤ بوون بەس تەنها لەبەر ئەوەی پێستەكەیان ڕەش بوو, بەڵام لە دەرئەنجام دا ڕۆژئاوا توانی ئەو بەربەستانە بشكێنێت و بەخۆیان دا بچنەوە كە ئیتر بڕیاری هەڵگرتنی ئاڵایەكی دیموكراتیەتیان دا(دیموكراسی) ,بەڵام من پێم وانیە كە هیچ بەشێكی ئەم جیهانە بتوانێت دیموكراتیەتێكی تەواو سەربەستانە بەرقەرار بكات چوونكە لەسەردەمی ئێستادا وشەی دیموكراسی (دیموكراتیەت)وەكو كاڵایەكی هەراجی لێهاتووە كە كەسانی باڵا دەستی وڵاتان لە پێناو بەرژەوەندیەكانی خۆیان دا مامەڵەی پێوە دەكەن,

بۆ پشت ڕاستكردنەوەی ئەم قسەیەشم گۆڕەپانی ڕۆژهەڵاتی ناوەڕاست ئەو بەڵگە حاشا هەڵنەگرەیە كە ئەوەمان نیشان دەدات دیموكراسی(دیموكراتیەت) تەنیا وەكو تابلۆیەكی ئۆتۆمبیلە یان تەنها وەكو ڕەمزێكی تەقلیدیە كە

كەسە دەسەڵات دارەكان بۆ گیرفان و بەرژەوەندیەكانی خۆیان مامەڵەی پێوەی دەكەن ئەگەرنا ئەوەی ئەمڕۆ لە نێو ڕۆژهەڵاتی ناوەڕاستدا دەبینرێت كە شەپۆلێكی جەنگ و خوێناوی وكاولكاری ڕووی تێدا كردووە, كەچی ئەو وڵاتانەی خۆیان بە وێنەی دیموكراسیەوە خۆیان نیشان دەدەن كەچی دەبینین هیچ جۆرە هەڵوێستێكی ئەوتۆی خۆیان نیشان نادەن, تەنها بەشێوەیەكی ڕووكەشی دا هەڵوێستەكانی خۆیان نیشان دەدەن بە تایبەتی ئەو ڕێكخراوانەی كە لۆگۆی مافی مڕۆڤیان بە خۆیانەوە دا هەڵگرتووە ئەوانیش تەنها كۆمەڵە كەسانێكی قازانج ویستن لە ئەنجامی ڕوودانی كارەساتە جۆراوجۆرەكاندا,هەر بۆیە دیموكراسی و دادپەروەریەكی تەواوەتی بە هیچ شێوەیەك و هیچ كاتێكیش بوونی نابێت چوونكە تاوەكو مڕۆڤی دڕەندەو جەنگ خواز هەبن لەسەر ئەم گۆی زەویەدا بۆیە بە شتێكی مەحال هەژمار دەكرێت, خۆی هەرچندەش ڕۆژ بەڕۆژ مڕۆڤە باشەكان بەرەو كەمی دەچن یان لەناو دەبرێن بە هەر هۆیەك بێت ئیتر , 

بوونی ململانێی مەزهەبیش لەنێو رۆژهەڵاتی ناوەڕاستدا, بەشێكی گەورەی نائارامیەكەی ئەم ناوچەیە نیشان دەدات كە بە درێژایی مێژوو تێپەڕاندنی بە خۆیەوە بینیوە كە تاوەكو ئێستاش هەر بەردەوامە لە پاڵیشیدا بە هەزاران خوێنی یەكتری تێدا ڕژاوە وە یاخود ڕق و كینەكان بەرامبەر بەیەكتردا تۆخ تر دەكرێن تەنها بەهۆی دوو مەزهەبەوە كە لەیەك ئاینەوە سەری هەڵداوە كە ئەویش ئاینی(ئیسلامە), كە ئەمەش تەنها كۆمەڵە كەسانێكن پێیان دەگوترێت: بازرگانی مەزهەبی واتە بۆ ڕایی كردنی كارو بارەكانی خۆی و بڵاوكردنەوەی ئایدیاكانی خۆیان دا وە هەروەها بۆ فراونكردنی سنورەكانی دەسەڵاتی خۆیاندا پشت بە چەندین مەرامی جیاوازدا دەبەستنەوە, چوونكە ئیسلام یەك ئاین و یەك ئایدیایە بۆیە ئیتر ناكرێت كەسە بەرژەوەند خوازەكان بیكەن بە چەندین گرووپ و مەزهەبدا ,كە لە ئەنجامیشدا ناسەقامگیری لەنێوان تاكەكانی گۆمەڵگا درووست دەكەن وەلە جیاتی ئەوەی تاكەكان ڕووحی مڕۆڤایەتیان تێدا بەرجەستە ببێت كەچی بەهۆی درووستبونی ئەم گرووپانەوە گێژاویەكی بێ سەرو بەرانە لەنێوان تاكەكانی كۆمەڵگادا درووست دەكات بەڵام ئەوەی لێرەدا گرنگە پێویستە تاك لەسەروی ئەمانەوە بیربكاتەوە واتە بەشێوەیەكی (ڕۆشنبیرانەوە) هەنگاوەكانی بنێت.

سوریا نموونەیەكی گەورەی نا ئارامی ڕۆژهەڵاتی ناوەڕاست نیشاندەدات كە ماوەی 9 ساڵە بە بەردەوامی جەنگ و كووشتاری تێدا دەبینرێت كە ئەمەش لە دەرئەنجام دا ئەوەی بە درێژایی ئەم چەندین ساڵەدا باجەكەی دەدات تەنها خەڵكە هەژارەكەیە كە ماڵ و ژیانی خۆی لە دەستداوە جگە لەوەی كە ڕووبەڕووی چەندین دەست درێژی جۆراو جۆر دیكە بوونەتەوەكەچی سەرۆك و خێزانەكەی لە ماڵێكی گەرم و گوڕدا ژیانیان دەگوزەرێنن بەبێ ئەوەی هەست بەبوونی هیچ ئازارو كەم كورتیەكدا بكەن, كەچی لە پاڵ ئەوەیشدا بە دەیان منداڵی بێ تاوان خۆیان لە ئاوارەیی و بێ نازی دا دەبیننەوە, دیارترین نموونەش كە لەم كۆتاییەدا ڕووی دا هێرشەكەی توركیا بوو لە 9ی ئۆكتۆبەردا بۆسەر ڕۆژئاوا كە بە دەیان خێزان ئاوەرە بوون چەندان منداڵ بەبێ ناز كران, كەچی هەر لە كۆتایشدا دەسەڵات دارەكان بۆخۆیا لەسەر مێزێكدا كۆ دەبنەوە و دەست دەخەنە نێو دەستی یەكتریەوە لە چاوی كامێراكانەوە بە پێكەنینەوە دەسكەوتی گەورەی خۆیان ڕادەگەیەنن.

 

*ئاخۆ دەبێت ئەو ناوچە نائارامانەی نێو ڕۆژهەڵاتی ناوەڕاستدا چ كاتێك ئاڵای ئاشتی و دادپەروەری بەرز دەكەنەوە ,وە ئیتر كۆتاییش بەم وێرانكاریانە دەهێنن

 

  • 1