ئەمە بڵاوبكەوە
FaceBook  Twitter  

خەلەكا شەشێ‌

بەرهنگاربوونا گەندەلیێ‌ ئەركێ‌ حكومەتا نوی یە:

پرسا گەندەلێ‌ باوەرناكەم كەسەك هەبیت هەستپێنەكەت، لهەر درەكێ‌ یان هەر جڤاتەكێ‌ بەحس بەحسا گەندەلیێ‌ یە، گەندەل بخوە ژی د ئاستێن جودا جودا دانە، ژبەركو گەلەك جاران گەندەل بخوە ژی گازندان دكەن، چونكە گەندەلی ژی پلەنە، بەس ئەگەر مرۆڤ گوهداریا گازندێن خەلكێ‌ بكەت لدور گەندەلیێ‌ ئەنجامێن وێ‌ ئەون، دبێژن یا ب زەحمەتە ئێدی رەۆش هند یا شێلیبوی ب ساناهی ناهێتە چارەسەركرن.

مەبەست بڤێ‌ چەندێ‌ ئەوە، كو تاك دئاڤاكرنا خوە دە یێ‌ گەندەل بووی، شێوازێ‌ ئاڤاكرنا تاكی گرفت تێدا هەنە، هەبوونا مرۆڤێن پاقژ و راستگوو ژینگەها چێبوونا وان یا لەواز بووی، كەسێن زمان لوس و دوروی پتر هەر كەسەكێ‌ دكارن بەرژوەندێن خوە ڤەوژێرن و ببنە ژێدەرێن ئاگەهیان بو بەرپرسایەتیا حكومەتێ‌، وەلاتپارێز و نیشتیمانپەروەر ب ساناهی وژدانا وان رێكێ‌ نادەتێ‌ راستیا وەكە خوە نە ڤەگوهێزن.

باشە دەرفەت بو هەر دو ئالیان هەبیت، حكومەت نێرینێن هەر ئێك ژوان بنرخینیت و بەراوردكەت، رەنگە د وێ‌ بەرواردكرنێ‌ دا مرۆڤ بگەهیتە هند ئەنجامێن نوی یێن هەری گرنگ، كو د دارشتنا نەخشێ‌ حكومەتێ‌ دا تشتەكێ‌ سود بەخشبیت، ئەم نە دگەل سیاسەتا نەفیكرنا ئالیەكێینە بەرامبەر راگەهاندنا دانپێدانا ئالیەكێ‌ دن، دڤی جڤاكی دە چ كەسەك یێ‌ زێدە نینە، پێتڤیاتیا حكومەتێ‌ ب هەموویان هەیە، كەسێن شاش ممكینە بهێنە راستكرن و یێن سوجدار ب ئاوایەكێ‌ یاسایی و مودێرن بهێنە سزادان. 

هەمی مرۆڤ د ناڤەروكا خوەدا یێن گەندەلن، ئەگەر دەرفەت هەبیت بو هەر كەسەكێ‌ دێ‌ دەستی بو كریارێن گەندەلیێ‌ درێژكەت، لێ‌ ئەگەر مرۆڤ بزانیت سزایێن كریارەكا بچووك یا گەندەلیێ‌، دێ‌ مرۆڤ باش پێ‌ كرێت بیت و دێ‌ د چاڤێن جڤاكێ‌ دا هێتە شكاندن و دێ‌ گەلەك بچووك بیت دناڤا كومەلگەهێ‌ دا، دونیا سەروبن ببیت مرۆڤی ئەو جسارەت نابیت كارەكێ‌ بوی شێوازی بكەت.

لڤێ‌ داویێ‌ حكومەتا هەرێمێ‌ بریار دا نابیت كەسەكێ‌ دو یان سێ‌ یان پتر ژ موچەیەكێ‌ هەبیت، ئەو كەس ئازادكرن موچەیەكێ‌ بخوە هەلبژێرن، لجا وان كەسان سزادەن خەلاتكرن ب ئازادی یا هەلبژارتنا مەزنترین مووچە، ئەڤ سیاسەتە یە بیاڤێ‌ گەندەلیێ‌ بەرفرەه دكەت و وێ‌ بوچوونێ‌ زالدكەت، كو د هەموو جڤاتان دا خەلك بێژیت هەمی تشت كلاواتن و چ حكومەت نینن، ئەڤە بخو سەردەمێن ونداكرنا متمانێ‌ نە.

ئەركێ‌ حكومەتا نوی یە ب ئیرادە و جەسارەتەكا مەزن بەرهنگاری دیاردا گەندەلیێ‌ بیت، گاڤێن دڤی واری دە دهێنە هاڤێتن فەرە یێن بەرچاڤبن ژبوی هەموو تەخ و توێژێن جڤاكێ‌، داكو د وێ‌ رێدە حكومەت بكاریت جارەكا دن متمانا گەل بو خوە ڤەگەرینیت. 

رەشبینی یان گەشبینی ژبوی ئایندە:

رەۆش چەند یێن ئالوز و موعەقەدبن، هەر دەرفەتێن چارەسەریا یا بو هەی، نها هەرێم دناڤا كریزێن دژوار دا دژیت، لێ‌ ئەو دویماهیكا دونیایێ‌ نینە، ئەگەر ئیرادە هەبیت، ئەز باوەرم هەمی پرسگرێك دێ‌ هێنە چارەسەركرن، حكومەت ئەگەر دڤی واری دا یا جدی بیت، دێ‌ شێت زالبیتە سەر هەمی گرفتان، ئو لازمە ئەڤ حكومەتە یا جدی بیت، ئەگەر نە پاشمایێن وێ‌ دێ‌ گەلەك یێن خراب و نیگەتیف بن، خراببوونا وێ‌ باوەرناكەم كەسەك تێدا یێ‌ سودمەند بیت، دوزا گەلێ‌ مە ب هەمی جقێن خوە ڤە دێ‌ كەڤیتە بەر هەرەشێن ناڤچوونێ‌.

ئەڤ حكومەتە لازمە حسابێ‌ بو هەر تشتی بكەت، ژبوی چارەكرنا رەۆشا ئابوری د هەموو بیاڤان دا گاڤان پاڤێژیت، بلا هەتا ل تشتێن بچوك دەستپێبكەت، گەلەك تشتێن بچوك كومكرنا وان تشتەكێ‌ مەزن لێچێدبیت، سەرۆكێ‌ حكومەتێ‌ كەسەكێ‌ بهێزە لسەر ئاستێ‌ حزبا خوە، دیسان لسەر ئاستێن دن ژی متمانە یا پێهەی، هەر چەندە هن ئالی ئەوێ‌ دانپێدانێ‌ زێدە بەرچاڤناكەن ب زەلالی، بەس د هندر دە متمانە یا پێ‌ هەی، ئەڤەژی دهێت وێ‌ رامانێ‌ كو دەرفەتا چارەسەركرنا رەۆشێ‌ ژ هەر تشتی نێزیكترە.

كاودانێن هەرێم تێدا دەرباس دبیت یێن ئالوزن، بەس یێن دەوروبەرێن مەژی گەلەك یێن ئالوزن، گرنگیا ئەنالیزەكرنێ‌ د فێرە دایە، دەوروبەر زێدە یێن مژویلی رەۆشا خوەنە، د گەلەك بواران دە پێتڤیاتیا وان ژی ب هەرێمێ‌ هەیە، ئەگەر ئەم ئەڤێ‌ چەندێ‌ ئیستیغلال كەین، ئیرادا مەژی یا بهێزبیت، دێ‌ گاڤێن چارەسەریێ‌ مەزن هێنە پێش، گەرەكە مرۆڤ یێ‌ گەشبین بیت نەك رەشبین ژبوی ئایندێ‌ هەرێمێ‌.

بەرپرسایەتیا ژیانا كێ‌ د ستویێ‌ حكومەتێ‌ دایە:

هەلبەت بەرپرسایەتا ژیانا تاكێن هەرێمێ‌ ب تەڤایی د ستویێ‌ حكومەتا هەرێما كوردستانێ‌ دایە، ب تایبەتی ئەو تاكێن دناڤا هەرێمی دا ژیانا خوە دەرباس دكەن، تاكێن ب سالانە ل دەرڤەی وەلاتی نیشتەجیبووی و ژیانا وان لوان وەلاتان دهێتە گرەنتیكرن، دەستەكداینا وان نە ئەركێ‌ حكومەتا هەرێما كوردستانێ‌ یە، ئەو دراڤێن لوان دهێتە مەزاختن و جورەكێ‌ هەدەردانا دراڤێن حكومەتێ‌ یە د بیاڤێن بەرتەسكیا ململانا حزبی دە، رێژەیەكا هەری مەزن ژوانە د فورمەكا حزبی دە یێن هاتیە خانەنشینكرن.

وەكە دهێتە زانین، ب هزاران ئەو كەسێن ل دەرڤەی وەلاتی بناڤێن جودا جودا هاتینە خانەنشینكرن، هەم ل هەرێمێ‌ مووچێن خوە وەردگرن هەم ل دەرڤەی وەلاتی، واتە ل دو بەهەشتان كەوالێن خوە د چەرینن، گیروكرنا مووچەیان بو وان هند نابیت گرفت و دبنەتاردا نە پرسگرێكە، ئەڤ مووچێن وان ئەگەر بو حكومەتێ‌ ڤەگەرن بێگومان دێ‌ بیتە كوژمەكێ‌ هەری باش د خەزینا حكومەتێ‌ دا، پرسا دابینكرنا مووچەیان ژی بو ناڤخویێن هەرێمێ‌ دێ‌ ئاسانكاریێن باش پەیدابن د پلانا نوی یا چارەسەریان دا.

ب هیڤیا هندێ‌ ئەڤ مووچە بو حكومەتێ‌ بمینن، فەرە حكومەت بریارەكێ‌ بدەت، ئێدی كەس نكاریت موچێ‌ خوە ب وەكالەت وەرگریت، ل هەموو سەرێن مەهان گەرەكە ئەو راستەوخو ژ مووچێ‌ خوە خوەدی دەركەڤیت، د چارەسەریەكا بڤی شێوازی دە، دێ‌ كەسێن پێتڤیاتیا وان ب هاریكاری و دەستەكداینا حكومەتا هەریمێ‌ ئاشكرا بن، ئەو هاوەلاتیێن دبن سایا هەریمێ‌ دا بەردەوامیێ‌ دەنە ژیانا خوە بتنێ‌ دكارن ئەڤێ‌ یەكێ‌ بدەنە جیبەجیكرن.

دڤێ‌ دەربارێ‌ دە حكومەتا هەرێمێ‌ گەركە باش بزانیت رازیكرنا تاكێن دناڤا باشور دا نێشتەجێ‌ ژ هەر تشی گرنگترە، ئەرگێ‌ حكومەتێ‌ یە لهەمبەری داخوازێن وان ببیتە بەرسڤا هەری راستەقینە، كەسێن ل هەندەران ژیانا خوە دەبرسادكەن ئەو یێن ب خودانن و چ پرسگرێن وان نینن و پێتڤیاتیا وان ب حكومەتا هەرێمێ‌ نینە.

  • 1