ئەمە بڵاوبكەوە
FaceBook  Twitter  

بەشی حەوتەم

 كاریگەریا رۆلێ‌ كەسی د ئیدارەكرنێ‌ دە:

پشتی ب پراكتیك كەسایەتیا بەرێز (مەسرور) كەتیە رۆژاڤا پێكئینانا نەهەمین كابینا حكومەتێ‌، درویشمێ‌ سەرەكیێ‌ پارتیا وی بخوە یێ‌ خرڤەكری بوویە د (هەرێمەكا بهێز .. حكومەتەكا بهێز) ئەو بخوە ژی دناڤا پارتیا خوە دا ژ كەسێن هەری (ب هێزو، ب باندور و كاریگەر) لجەم خەلكێ‌ دهێتە پێناسەكرن، واتە جورەكێ‌ باوەریبوونێ‌ ب شیانێن وی د پرانیا ئاستان دا دهێتە دیتن.

لڤێرە دخوازم بێژم ئەگەر پارتی دڤێ‌ كابینێ‌ دە نەكاری گاڤێن پری كریار بدەتە ئەنجامدان بو چارەسەریا پرسگرێكان و نەهێلانا كریزێن هەمە ئالی دناڤا جڤاكێ‌ دە، وی چاخی ئەز باوەرم كو د هەر واری دا متمانە و باوەریا خەلكێ‌ بهێتە ونداكرن، ئەو حسابا بو رۆلێ‌ كەسان دهاتە دیتن ئەو نامینیت، ئێدی دێ‌ گومان گەڤنە سەر سیاسەت و تراتیجیەتا پارتی یا وان د دەربارێ‌ هێلێن گشتی دا یێن هەتا ئیرۆ ددانە پەیرەوكرن د گورەپانا سیاسی یا كوردستانی دە.. 

لپی نرخاندنا من ب قووەترین وەرەقا د دەستێن پارتی دە، بكارئینانا شیانێن كەسایەتیا (مەسرور بارزانی) یە، ساخلەت وفاكتەرێن كەسایەتیا وی بهێز دئینە بەرچاڤ دڤان چەند خالان دان دە دهێنە خرڤەكرن: 

• كورێ‌ مەزن یێ‌ مەسعود بارزانی یە، كو نها وەكە مەرجەع و لێڤەگەر دناڤا هەرێمێ‌ دا دهێتە دیتن، هەر وەسا جهێ‌ ئیعتیمادا بارزانی یە و باوەریەكا زێدە ب كەسایەتیا وی هەیە.

• ب سالێن دویر و درێژە بەرپرسێ‌ هەستیارترین دەزگەهێ‌ ئەولەكاریێ‌ یە دناڤا هەرێمێ‌ و پارتی یا دیموكراتا كوردسستانێ‌ دە.

• كەسەكێ‌ ئەكادمیە و ماستەر د بوارێن دبلوماسیەتا نیڤ دەولەتی دە، د بیاڤێن زمانی داژی كەسەكێ‌ زمان زانە ب تایبەتی ژی زمانێ‌ ئنگلیزی ب رەنگەكێ‌ گەلەك باش دزانیت.

• وەكە كەسێن نێزیكی وی دبێژن یێ‌ جدی یە و موجاملێ‌ د سیاسەتا خوە دا بكارنائینیت، لهەمبەری كەسێن سوجدار ژی ب ساناهی لێنابوریت.

• د هەر واری دە ئاگەهیێن وی د پرانیا بواران دە لدور هەرێمێ‌ دبەرهەڤن، ئەو وەكە كەسەكێ‌ بێ‌ تەجروبە سەرۆكاتی یا حكومەتێ‌ ناكەت، كەرستێن پێتڤی هەمی لبەردەستن.

• دژواری یا بالا دەستیا وی د حوكمرانیێ‌ دە، باوەرناكەم كەسەك هەبیت بكاریت بو دەمەكێ‌ كورت ژی بریارێن وی ژ پرۆسەیا جیبەجیكرنێ‌ گیروكەت.

• ئاراستەیا سیاسەتا سەرۆكێ‌ نوی یێ‌ حكومەتێ‌ وەكە دهێتە پێشبینیكرن زێدە بەرف بەغدایە بو چارەسەریا پرسگرێكان نەك وەلاتێن هەرێمی مینا توركیا، ئەڤە بخوە ژی گرتنەبەرا رێكا هەری راستەقینە یە.

ئەڤ ساخلەت و فاكتەرێن لسەر هاتینە ئاماژەكرن، پرانیا وان تشتێن گرنگن و خالێن هاریكارن، كو ئەو سەركەفتنێ‌ دكارێن خوە دا بینیت، كەرستێن گەشبینیێ‌ پەیدادكەن د هەموو واران دە، ب بەرفرەهی خوەدی هەبوونن، هیچ ئاستەنگەك لپێش نینە گومانان پەیداكەت ژ نەبوونا شیانێن چارەسەركرنا پرسگرێكێن د هەرێمێ‌ دە دهێنە هەستپێكرن.

هەلویستێن پێشبینیكری ژ ئوپۆزسیوونێ‌ :

ئەگەر سەرۆكاتی یا حكومەتا نوی دەرەقەتی چارەسەریان نەهات، بێگومان وی دەمی دێ‌ رەۆشەكا نوی هێتە پێش، گەلەك باوەری دێ‌ هێنە بەرزەكرن ب هەرێمێ‌، هیڤی ب چارەسەریان دێ‌ هێنە هەرفاندن، ب بوچوونا من رەۆشەكا بڤی شێوەی خزمەتا كەسەكێ‌ ناكەت، لەوما فەرە هەر كەس هاریكار بیت، هەر ئێك ژ ئالیێ‌ خوە (پێشینیار، تێبینی، بیروكێن مودێرن) یێن گرێدایی چارەسەریێ‌ پێشكێشكەت، داكو ئەوا خەلك دخوازیت ب كریار (هەرێمەكا بێز، حكومەتەكا بهێز) بهێتە پێشكێشكرن، ئەڤ درویشمە نە تنێ‌ درویشمێ‌ حزبەكا دەستنیشانكری یە بەلكو درویشمێ‌ هەر وەلاتپارێز و نیشتیمان پەروەرەكێ‌ یە.

ئارمانجێن سەرەكی یێن هێزێن ئوپۆزسیوونێ‌ زێدە یێن گرێدایی وان خالانە، كو گومانێن وان د هن بیاڤان دا هەنە مینا (سیستەما حوكمرانیێ‌ .. سیاسەتا ئابوری .. تایبەتكرنا كەرتێن گشتی یێن خزمەتگوزاریان .. گڤاشتنا زێدەكرنا تەكسێ‌ لسەر هاوەلاتییان، نە دامەزراویكرنا دام و دەزگەهێن حكومەتێ‌، هەژموونا حزبی لسەر هەموو چەمكێن ژیانێ‌) ئەڤ چەند مانشێتە لگور نێرینا ئوپۆزسیوونێ‌ گەلەك یێن گرنگن و پێتڤیاتیا وان ب گوهرینان هەیە ..!

حكومەت ئەگەر د هەولێن هندێ‌ دە بیت، كو رەۆشەكا نورمال بهینیتە پێش، یەكسانیا جڤاكی و ئازادی یا رادەربرینێ‌ و نەهێلانا گەندەلیێ‌ بكەتە درویشمێن خوە یێن بنگەهین، لدویف نرخاندنێن من ئوپۆزسیوون دێ‌ د هەر واری دا یا هاریكاربیت، چونكە ئەڤ ئوپۆزسیوونا نها نە وەكە ئوپۆزسیوونا پێشانە، كو تنێ‌ خەونان بگەهشتنا دەسهەلاتێ‌ ڤە ببینیت، خەونا ئوپۆزسیوونا نها تنێ‌ خوشكرنا ژیانا خەلكێ‌ و پێشكێشكرنا خمەتگوزاریانە ژبوی تێكرایا تەخ و توێژێن كومەلگەهێ‌، هەلویستێن ئوپۆزسیوونێ‌ دێ‌ د بیاڤێن پێكئینانا ریفورمێن بنگەهین دە یێن پوزەتیفبن.

گەل كیژان حكومەت دخوازیت حكومەتەكا هەرێمی یان حكومەتەكا حزبی:

پارتیا سەركەفتی د پرۆسەیا هەلبژارتنان دە ئەگەر ب كارێن پێكئینانا حكومەتێ‌ رابیت، ناهێت وێ‌ واتی كو حكومەت یا وێ‌ پارتیێ‌ یە بەلكو حكومەتا یا گەلە یا تێكرایا پارت و تاكێن جڤاكێ‌ یە، نابیت پارتیا سەركەفتی خوە بزور ب سەپینیت د هەموو بیاڤان دە وە نابیت ئالیێن دن ژی وەكە نەیارێ‌ خوە مامەلێ‌ دگەل حكومەتێ‌ بكەن.

مرۆڤ هەتا ئەگەر د هندرێ‌ خوە دە ئوپوزسیون ژی بیت، خو ئارمانجا وی حكومەت و هەرێمەكا بهێزە، ئەگەر كەسەك یان ئالیەك هەبیت ئەوێ‌ خەونێ‌ بجهبینیت خوە كیبیت مرۆڤی گەرەكە كەیف پێ‌ بهێت و رەخنا مرۆڤی یا ئاڤاكەر بیت، چونكە مە دڤێت بگەهینە قووناغەكا هەری باش و بەختەوەر، میكانزما ئەوێ‌ گەهاندنێ‌ كی سەرپەرشتیێ‌ بكەت بو خەلكێ‌ گرنگ نینە، یا خەلك دخوازیت ژیانەكا خوەش و تەژی ڤیان و حەژێكرنە.

لسەر ئەوان پرەنسیب و بنگەهێن كو من باوەری پێ‌ هەی، ئەز وەكە تاكەك بلا ئەندامێ‌ پارتیەكێ‌ بم، لێ‌ بەری ئەندامێ‌ پارتیەكێ‌ بم ئەز ئەندام و تاكێ‌ گەل و جڤاكەكێ‌ مە، د فەلسەفا من دە پارت و گروپێن سیاسی دمرن لێ‌ گەل و جڤاك نامرن هەر تم زێندی دمینن، واتە بو مرۆڤی زێدە ئەندام بوونا گەل یا گرنگە.

ب بوچوونێن من بەرتەسكبوون د هەر وارەكێ‌ دە تشتەكێ‌ زیان بەخش و ناموویە، مرۆڤ نابیت لسەر چ پرسان یێ‌ بەرتەسك و توندرەوبیت، سیاسەتا نەرم یا گوهداریكرنێ‌ تاكە سیاسەتە مرۆڤی دگەهینیتە قووناغا داویێ‌ یا سەركەڤتنێ‌، حكومەتا نوی بێ‌ هەموو جیاوازیان فەرە گوهداریا خەلكێ‌ بكەت.

راستە سەرۆكێ‌ ئەڤێ‌ حكومەتێ‌ ئەندامێ‌ پارتیەكێ‌ یە، ئەوێ‌ پارتیێ‌ ئورگانێن خوە ل هەر درێ‌ هەنە، خەلكێ‌ وان د هەموو بیاڤێن هەستیار دە رێبەراتیێ‌ دكەن، لێ‌ مەرج نینە ئورگانێن وان دەما بوچوون و نرخاندنێن خوە دگەهینە حكومەتێ‌، لسەر بنگەهەكا راست و دروستبن، رەنگە ئورگانێن وان ژبەر بەرتەسكیا بەرژوەندێن كەسوكی جار جاران خوشخوشكا ب نرخاندنێن خوە وەركەن و بهارێ‌ بینە كوتكی.

بەلێ‌ خەلكەكێ‌ دن دێ‌ ب شێوازەكێ‌ دن نرخاندن هەبن، واتە گرنگە سەرۆكێ‌ حكومەتێ‌ تنێ‌ د زاویەكێ‌ دا رەۆشێ‌ مێزەنەكەت، بلا گەلەك چاڤ هەبن ئەو چاڤ ژی بلا خوەدیێن بوچوونێن جودا جودا بن، ئەڤ یەكە دێ‌ مەدەنیبوونا حكومەتێ‌ وەكە ساخلەتەكێ‌ مودێرن زێدەتر ئینیتە پێش، ئەركێ‌ حكومەتێ‌ یە وێ‌ هەستێ‌ لجەم خەلكێ‌ پەیداكەت، كو حكومەت حكومەتا تێكرایا تەخ و توێژێن گەل بیت بێ‌ بكارئینانا جیاوازیان.

...

  • 1