ئەمە بڵاوبكەوە
FaceBook  Twitter  

لە پێش هەمو شتێکى ترەوە ئەبێ ئەوە دوبارە بکەینەوە کە تا ئێستا هەرێمى کوردوستان بەشێکە لە کۆمارى عێراق و هەمو ڕوداو و گۆڕناریەکى سیاسى و ئیدارى و ئابورى لەم دەوڵەتەدا چاک بێ یان خراپ کاریگەرى ڕاستەوخۆى هەیە لەسەر بارودۆخى هەرێم..

جا ئەگەر لەم واقعەوە بڕوانینە ئەم ڕاپەڕینە جەماوەریەى کە خەریکە بۆ دو مانگ ئەچێ بەردەوام و خۆڕاگرە. سەرەڕاى ئەم هەمو کوژراو بریندار و کەم ئەندامەى لێ ى کەوتۆتەوە. سەرەڕاى پێ داگرتنى حکومەت لەسەر بەربەرەکانى کردنى بە جۆرەها شێوە. واتە ئەم ڕوداوە جەماوەریە کە داواى گۆرانکاریەکى بنەڕەتى ئەکات لە سیستمى حوکمڕانى عێراق دا. بمانەوێ و نەمانەوێ سەرکەوتنى ڕاپەڕینەکە ڕاستەوخۆ بارودۆخى سیاسى و ئیدارى هەرێم / یش ئەگرێتەوە..

بەڵام ئەوەى سەرنج ڕائەکێشێ. خەڵکى هەرێم / ى کوردوستان بە جۆرێکى سەر سوڕهێنەر و کەمتەرخەم ئاسا ئەڕواننە ڕاپەڕینەکە و هیچ حسابێک بۆ ئەنجامەکانى ناکەن. وەک ئەم ڕوداوە لە وڵاتێکى دور ڕوبدات!! وەک ئەبینین جەماوەرى هەرێم تەنانەت کەسایەتیە سیاسى و ڕوناکبیر و مرۆڤ دۆستەکانیش چرکە و نرکەیان لێوە نایەت و هەڵوێستیان نیە بەرانبەرى!!

خەڵکى هەرێم نابێ ئەوەیان لە بیر بچێ کە ئەم چین و توێژە و گروپە دەسەڵاتدارەى بەغداد/ ە کە لە ساڵى ٢٠٠٤ وە رێگەنادەن کە مادەى ١٤٠ ى دەستورى عێراق سەبارەت بە ناوچە کوردوستانیە کێشە لە سەرەکان, لەگەڵ ئەوەشدا کە بە زۆر سەپێندراوە ـ چارەسەر بکرێ !! هەر ئەو چین و توێژ و تایەفانەیە کە ئامادە نین کێشە هەڵپەسێردراوەکانى نێوان هەرێم و بەغداد چارەسەر بکرێ!! هەر ئەدو دەسەڵاتەیە کە ساڵى ٢٠١٤ موچەى فەرمانبەرانى بڕى بەو نیازەى کە دەسەڵاتى فیدراڵى هەرێم هەرس بهێنێ.. هەر ئەو حوکمڕانانەیە کە لە ئۆکتۆبەرى ٢٠١٧ دا هێرشى سەربازیان ئاڕاستەى چەند ناوچەیەکى هەرێم و کەرکوک و دوز و دەوروبەریان کرد. و بەهەزاران خێزانى کوردى ئەو ناوچانەیان ماڵ وێران و دەربەدەرکران و حکومەتى بەغداد دەسەڵاتى خۆى بەسەریاندا سەپاندەوە ... هتد !!

وەک بە ئاشکرا دەرکەوتوە ئەم ڕاپەڕینە ئەیەوێ ئەو دام دەسگا مل هوڕە سەپێنراوە دزو جەردەیە هەرس پێ بهێنێ. پێکهاتەکانى ئەو دەسەڵاتەى هێناوەتە لەرزین و خەریکە لەتاو خۆیان تێک ئەچن. بۆ پینەو پەڕۆى دەسەڵاتەکەیان هەوڵ ئەدەن!!

ئا لێرەوە خواستەکانى خەڵکى کوردوستان لەگەڵ داواکاریە سەرەکیەکانى خۆپیشاندەران دا یەک ئەگرێتەوە و پێمان ئەڵێن:" کوا هەڵوێستان". ئەگەر هەر قسەى ڕۆژیش بێ؟ سبەى ڕۆژ وەڵامتان چی ئەبێ ئەگەر لێیان پرسین ئێوە دوێنێ لەکوێ بوون؟!

گوایا ناکرێ تەنانەت گروپێکى تێکەڵى هەرێم بە چەند سەد هەزار ئیمزایەکەوە ئەگەر بۆ یەک ڕۆژیش بێ بچن هاوکارى ئەو خۆپیشاندەرانە بکەن وەکو ڕەمز ـ نمونە ؟ دەنگى پشتیوانى خەڵکى کوردوستانیان پێ بگەیەنن؟!

 

 

 

  • 1