ئەمە بڵاوبكەوە
FaceBook  Twitter  

 

هەر وەکو ژناڤى دیار، دناڤبەرا تەتەرو و تویتەریدا ب سەدان سال هەنە و هەر دووکان ژى باندوورا خوە یا ئێکسەر ل سەر جیهانێ هەبوویە و ئەگەر ژ تەتەرى دەست پێبکەین، کو دەستەواژە بۆ (تەتەر و مەغولان) دزڤریت، کو ب وى ناڤى د بەرنیاس بوون و شەر و هێرشێن وان گەلەک بلەز بلاڤ بوون و دەولەتا تەتەران ب سەرکردایەتییا (جەنگیزخان)ى دروست بوو و شییان دەستهەلاتا خوە گەلەک بەرفرەهـ بکەن، لێ جوداهییا تەتەران دگەل تویتەرى، هەردووکان دەستهەلاتا خوە ل جیهانێ دکر، لێ تەتەران تا جهەک داگیردکر و وەلاتەک ژناڤ دبر، رەنگە ب هەیڤان و سالان خاندبا، لێ د بەرامبەردا، تویتەر ب چەند چرکەییان دشێت هژاندنێ ل گەلەک وەلاتان دروست بکەت و سیاسەتا وەلاتان ئالوز بکەت و تویتێن (ترامپ)ى سەروکێ ئەمریکا باشترین بەلگەنە، چاوان تویتەکى د نڤیسیت و هەر د گاڤێدا، جیهانێ هەمى بخوە ڤە مژویل دکەت! تا ڤێرە، ئەڤە ئەو بوو یا من ژ سمینارەکا (مەلا بەحتیار) گوهێ خوە دایێ و دگوتى: دڤێت ئەم سیاسەتا ئەڤرو، لدویڤ تویتەرى بکەین نەک تەتەرى!

لێ تشتێ ئەز پالدایمە ڤێ نڤیسینێ، سوشیال میدیایە و عەقلیەتا مە و خواندنا مە بۆ بوویەران و چاوان ئەم تشتان لێکددەین، هەر چەندە ئەم د چەرخێ لەزێ و تەکنەلوژیایێ داینە، لێ ئەم هێشتا ب کەلتورێ باب و باپیران و ب کەلتورێ و ل سەر مە هاتیە سەپاندن هزرێ دکەین و پلانێن خوە ددانین، مەبەستا من ب کێشانا بابەتێ سوشیال میدیایێ ژى، کو جیهان هەمى ل بەر چاڤێن مەیە و بوویەرا ل هەر جهەکى رووبدەت زیندى ئەم تەماشا دکەین، لێ ئەم نەشییانە کێمترین مفا ژى ژڤێ سوشیال میدیایێ وەربگرین، لڤێرە پرسیار، ئایا ئەم شیاینە سوشیال میدیایێ و تورێن کومەلایەتى، بێخینە د خزمەتا خوەشکرنا ژیانا خوەدا؟ ئایا ئەم شیاینە سوشیال میدیایێ بکەینە چاڤدێر ل سەر دەستهەلاتێن عەشایرى، ئاینى و تا سیاسى ژى و گوشارێ پێ دروست بکەین و بەهایێن مرۆڤایەتیێ و ئاشتى و ئارامیێ پێ بلاڤ بکەین؟ پێنەڤێت ئەڤە هەمى پرسێن بێ بەرسڤن و مە نەڤێت ئەم دەستبەردارى بەهایێن خوە یێن کەلتورى، رەوشت و نەریتان ببین، هێشتا ئەم خوە ب داب و نەریتێن عەشیرێ ناس دکەین و دڤێ تەکنەلوژییا جیهان هندە بچویککرى، ئەم پەنایێ بۆ کەسەکى دبەین، ئەگەر کێشەک کەتە بەر سینگا مە و ئەگەر ب کورتى و کوردى بێژم، ئەم دڤى سەردەمیدا وەک گوندیەکی نە، ل کولانێن باژێرییا ب سەر دەلنگ و سەنتور و پەنتورێن نە ئوتى کرى پیاسا دکەین، گونەهـ ژى نە بتنێ یا مەیە، ژبەرکو سوشیال میدیایێ هەمى تشت یێ دانایە بەرسینگا مە و مە دڤێت ب عەقلیەتا رابردوى، ئەوێ ئەم شانازیێ پێدبەین، هەڤرکیێ دگەل جیهانا ئەڤرو بکەین و سیاسەتێ پێ بکەین!.

 

  • 1