ئەمە بڵاوبكەوە
FaceBook  Twitter  

بەشی دووەم و کۆتایی

کونفرانس ژبوى کۆمونیست و چەپێن کوردستانى گاڤەک گرنگە:

بیرۆکا بەستنا کونفرانسێ ژبوى کوردستانیان گاڤەکا گەلەک گرنگە، گەرەکە ئەڤ چالاکیە ببیتە چالاکیەکا سالانە و ب شێوازەکێ رێکخستى تر بەرهەڤى بو بهێنەکرن، جارا یەکەمینە کۆمونیست و چەپێن کوردستانى هەڤدۆ ناسدکەن و بیرى د کۆمسیونەکا هەڤبەش یا مایندە دکەن، خەباتەکا هەڤبەش دڤى وارى دا دێ زێدە یا بەرهەمداربیت، ژبەرکو هەلویستێن ژ ئەڤرۆ پێڤە دهێنە ئاڤاکرن دێ پتر یێن نێزیکى راستیا دورهێلى و ناڤەرۆکا بەرفرەها بویەران بن.

پرسگرێگا گەلێ کوردستانى گەنگەشا وێ ژ ئالیێ تێکرایا کۆمونیست و چەپێن کوردستانى ب مەبەستێن کومکرنا هەموو شیانان ژبوى پتر پێشدابرنا دوزا رەوایا گەلێ مە، پیرۆزیا ئەڤى کارى کەس نکاریت ئینکار کەتن، دوێ باوەرێ داینە هەبوونا شیانێن مە بتنێ پرسگرێک ناهێتە چارەسەرکرن، چونکە رژێمێن دەولەتێن داگیرکەرێن کوردستانێ رژێمێن دکتاتور و زوردارن، ب شێوازەکێ هەرى و هوڤ و دروندانە مامەلێ دگەل تەڤگەر و بزاڤێن کوردستانى دکەن، پێتڤیاتیا مە ب هاریکارى و پشتەڤانیا گەلەک ئالیان هەیە، ژوانە:

 کۆمونیست و چەپێن نەتەوێن سەردەست یێن وان وەلاتێن کوردستان لسەر هاتیە دابەشکرن، گەرەکە تێکەلیێن کۆمونیست و چەپێن کوردستانى دگەل وان گەلەک یێن بهێزبن و دایەلوکەکا بەردەوام دنیڤبەرا وان دە هەبیت، ئەگەر ئەو ب تەمامى پرسگرێکا مە ناسبکەن و رەواتیا وێ ب پەژرینن، د پراکتیک دا ئەو دێ شێن دەمارێن رحا راسستیێ دناڤا نەتەوا خوە دا لاوازکەن و تێگەها پرسگرێکا کوردستانى ژوانرە دەنە زەلالکرن، پاشان ئەو بخوە و بەشەکێ نەتەوا خوەڤە دێ بنە پشتەڤان و د هەر مەحفەلەکێ گرسەیى دا دێ پشتەڤانیا گەلێ مەکەن و دێ د بەرنامێن خوە دا پرسگرێکا مە پتر دەنە رونکرن ژ رایا گشتى رە.

 کۆمونیست و چەپێن دەرڤە یێن وەلاتێن (ئەورۆپى، رۆژهەلات، رۆژئاڤا) ئەڤێن کو خوەدى باندورن، کومیتا هەڤبەش ئەڤا کو بریارە کۆمونیست و چەپێن کوردستانى ئاڤاکان، ب ئاوایەکێ بەرنامەکرى دەست ب هەوەکا بەرفرەه یا چێکرنا تێکەلیان بکەن، دگەل چەپ و کۆمونیستێن وان وەلاتێن مە نها ئاماژەکرى، هەر ئێک ژ کۆمونیست و چەپێن ڤان وەلاتان دێ دناڤا جڤاکا نیڤنەتەوى دا مینا دوستەکێ گەلێ مە تێکوشانا خوە دەنە پارڤەکرن، دڤى وارى دا چەند ئەم خورتر کاربکەین ئەم زێدەتر دێ دەولەتێن داگیرکەرێن کوردستانێ د جڤاکا نیڤدەولەتى دە شەرمزارکەین.

 پارت و گروپێن کەسێن سەربەخوە یێن باوەریا وان ب پرەنسیبێن دیموکراسیەتێ هەى، هەبوونا پرەکێ دنیڤبەرا وان کۆمونیست و چەپێن کوردستانى دە گەلەک یا فەر و گرنگە، ئەو زولم و ستەما ل گەلێ مە دهێتەکرن ژ ئالیێ دەولەتێن داگیرکەرێن کوردستانێ ڤە، ئاشنابوونا وان لسەر ئەوان راستیان دێ پرسگرێکا گەلێ مە پتر هاندەت گاڤێن خورتر و براهاڤێژتر پێشدا ببەت، ئەڤە دێ بیتە هێزەک مورالى ژبوى کو کۆمونیست و چەپێن کوردستانى دەهان جار پتر گورەپانا تێکوشانا خوە بەرفرەهکەن.

 کونفرانسێ داهاتى لجها پانێلیستێن وان ب رەگەز کورد و چەپ و کومونیستێن کوردستانى بن، بلا کەسێن (تورک، عەرەب، فارس، ئەوروپى، رۆژهەلات، رۆژئاڤا، کوردستانى) بن، بلا ئەو د ڤەکولینێن خوە دا مژارێ بدەنە خوەیاکرن، ئەگەر ئەو لسەر پرسا گەلێ مە و پرسگرێکێن رۆژهەلاتا ناڤین بپەیڤن دێ کاریگەریا وان پتر ئارمانجان هنگێڤیت، ئەگەر ئەم دڤان هەموو بیاڤان دا کاربکەین دێ هەمى دەرگەهێن داگیرکەرێن کوردستانێ دائێخین و دێ گڤاشتنا لسەر سیاسەتا وان پتر دژوارکەین.

 کونفرانسا داهاتى یا کۆمونیست و چەپێن کوردستانى، گەرەکە ژ ئالیێ هونەرى و پرسگرێکێن زمانى و زاراڤى ڤە چارەسەربن و زێدەتر پێشدابچن، نەچارەسەرکرنا ئەڤان کێشان نرخێن کارێن کونفرانسێ لاوازدبن و بیرو بوچوونێن جیاواز جهێن خوە باش ناگرن، دیسان ژى فەرە جهەکێ گونجایى بهێتە دەستنیشانکرن، داکو هەموو کەرستێن پێتڤى یێن گرێدایى پرسەیا برێڤەبرنا بەرنامێن کارێن کونفرانسێ یێن بێ پروبلێم بن.

 تایبەتمەندى یا هەر بەشەکێ لبەرچاڤ بهێتە وەرگرتن، گوتارا چەپ و کۆمونیستێن کوردستانى خوە د کراسەکێ کلاسیک دە بچوک نەکەتن، لهەمبەرى هەموو بویەران هەلویستێن خوە پێکبینیت، گوتار بەردەوام د گوهرین و نوژەنکرنان دا بیت، زمانێ دایەلۆکێ نەهجێ وان بیت.

ئەم دەما لسەر پرسگرێکا کوردستانى د سەکنین، ئەو چەند ناهێت وێ واتێ، کو کۆمونیست و چەپێن کوردستانى د ناسنامەکا ناسیونالستى دە خوە دورپێچ کریە، چونکە گەلێ مە زمانێ وى هاتیە قەدەغەکرن .. سترانێن وى هاتنە دزین .. کلتورێ وى هاتیە ئاسمیلەکرن، شەرەکێ مەزن یێ نەژادپەرستیێ لسەر وى دهێتە مەشاندن، داکو ئەڤ گەلە ژ مرنێ و ناڤچوونێ رزگارببیت، ئەرکێ کۆمونیست و چەپێن کوردستانى یە خوە لڤێ پرسێ بکەنە خوەدى، درویشمێ کار و خەباتا وان ئازادى و سەرخوەبوونا کوردستانێ بیت، ئەم دوێ باوەرێ داینە کۆ چ گرێبەستێن نەتەوى ناهێنە پێکئینان ئەگەر هزرێن چەپ و کۆمونیستى لپشت نەهێنە بنەجهکرن، خەباتا لپێشەیا مە خەباتەک کوردستانى و چینایەتى یە.

هێز و ئالیێن چەپ و کۆمونیستێن کوردستانى ژوان دهێتە خواستن، ئەو بزانن کو کوردستان بزور هاتیە دابەشکرن و زولم و ستەمەک مەزن لسەر وان دهێتە برێڤەبرن، کارکرن ژبوى ئازادى و سەرخوەبوونا وان ئەرکێن هەنوکەیێن وانن دڤێ قوناغێ دە، لدور ئەڤان مژاران ئەم نها پێتڤى مانیڤیستەکا روهن و زەلالین، گەرەکە کودەنگیا مە دڤى وارى دا هەبیت، دەمێن ئەم بەرنامێن کارێن خوەژى دادرێژین، هەیەجان و دورهێل نابیت لهەڤ دو یێن ناکوکبن، گیان و شیان یێن بەلانسکرى بن، میکانزما کارێ هەڤبەش لسەر ئەڤان بنەمایان بهێتە ئاڤاکرن. 

هاڤێتنا گاڤێن لەزگین یێن چەپ و کۆمونیستێن کوردستانى:

کۆمونیست و چەپێن کوردستانى ب پراکتیک گاڤێن ئەرێنى هاڤێتن یێن لهەڤ جەمیانێ، جسارەتا ئەڤێ گاڤێ گەرەکە ب پیرۆزى بهێتە نرخاندن، لێ لهەڤجەمیان بتنێ تێرا هیڤى و خواستیکێن گەلێ مە ناکەت، چالاکیێن هێشت بەرچاڤتر لبەندا مەنە، هەتا ئەم پتر خوە ئیفادەکەین ئەڤ چەند خالێن خوارێ جیبەجیکرنا وان ئەرکێن مەبن:

1) کۆمسیوونەکا هەڤبەش یا هەرى بلند بهێتە ئاڤاکرن ژ چەپ و کۆمونیستان یێن هەر چوار بەشێن کوردستانێ، میکانزما رێڤەبرنا کارێن ئەڤێ کۆمسیوونێ ب رێکەڤتن بیت و هەر جار کەسەک ژوان سەرکێشیێ بکەت.

2) پەیجەکێ ئەلکترونى ب زاراڤ و زمانێن جودا جودا ژوان (سورانى، کرمانجى، تورکى، عەرەبى، فارسى، ئنگلیزى) بهێتە چێکرن، چەپ و کۆمونیستێن کوردستانى یێن ل ئەورۆپا دژین ئەرکێن رێڤەبرنا وێ بستویێ خوەڤە بگرن، لگور نێرینا من باشە بنگەها ئەڤى پەیچى ل ئەورۆپا بیت.

3) گوڤارەکا (سیاسى، هزرى) یا وەرزى بهێتە چاپکرن، پروبلێمێن زمانى و زاراڤان بیر د چارەسەریا وان دە بهێتەکرن، ئەڤ مژار پتر پێتڤیاتیا وێ ب گەنگەشە و راوەستیانێ یە.

4) هەر گاڤەکا بهێتە هاڤێتن فەرە هەبوونا ژنێ دناڤدا لبەرچاڤ بهێتە وەرگرتن.

5) رادیویەک بناڤێ چەپ و کۆمونیستێن کوردستانى بهێتە دامەزراندن، بنگەها ئەڤێ رادیویێ ل ئەورۆپا بیت، هاورێ هەڤالێن چەپ و کۆمونیست رێبەراتیا وێ بکەن. 

هەبوونا ئیرادێ گەلەک یا گرنگە ژبوى چەپ و کۆمونیستێن کوردستانى:

هەتا نها چەپ و کۆمونیست د پاشەکشێدابوون، ئەوژى ژبوى گەلەک هوکارو ئەگەران ڤەدگەرن، بوشایێن ژ ئەنجامێن پاشەکشاوان ژ ئالیێ (ئیسلاما سیاسى) هاتبوویە پرکرن، هاتنە پێشا ئیسلاما سیاسى نەژبوى ئازادى و یەکسانیا جڤاکى یە، ئەو هێزێن پاشڤەرۆنە نکارن ببنە ئەلترناتیف و بەرسسڤ ژبوى پرسێن چینایەتى و ئازادى یا مرۆڤان د بیاڤێن بیرکرنێ دا، واتە خەما ئازادیێ و یەکسانیێ خەما چەپ و کۆمونیستایە، هندێ ئەو ب شێوازەکى ئەکتیفانە نەهێنە دگورەپانێ دا هەر تشت وەکە خوە دمینە و چێبوونا گورانکاریان دێ کارەکێ مەحالبیت.

جڤاکێ گەلەک سوزدارى دگەل چەپ خوازان نینە، جورەکێ ڤەقەتیانێ هەیە، چەپەکێ کلاسیک شیانێن ئەکتیفبوونێ نابن هندێ ئەو بیرێ د گوهرینێن خوەدا نەکەن، راستە شیانێن چێکرنا کاودانان نینە لێ شیانێن خوە گونجاندنا کاودانان هەنە، مادەم مە هزر هەیە وەکە دەسپێک پاشان ئەم شیاینە ببینە پارت و گرۆپ .. ئیرۆژى ئەڤ خرڤەبوونا هوسا مەزن هاتیە پێکئینان، واتە ئیرادا مانێ ب باوەریەکا رەسەن لپێشیا مەیە، بەردەوامیا ئیرادێ ژبلى چانسێ سەرکەتنێ تشتەک دن ناهێتە چاڤەرێکرن.

چەپبوون یەکسانە ب دیالوکێ، رێکا دیالوکێ دگەل هەر ئالى گەرەکە یا ڤەکرى بیت، کۆمونیست و چەپێن کوردستانى پرسا ئازادى و سەرخوەبوونا کوردستانێ لپێشیا وانە، ئالیێ بەرامبەر کو داگیرکەرێن کوردستانێ نە هند یێن ئامادەنینە لسەر مێزا دانوستاندنان رەۆشێ شرۆڤەکەن، چونکە د بنەتاردا هەبوونا پرسا کوردستانى ئەو ناپەژرینن، دڤى ئەتموسفەرى دا هەم تێکۆشان ب شێوازێن هەمە جور یا گرنگە هەمژى پاراستنا دەرفەتێن دایەلوکێ.

کۆمونیست و چەپێن کوردستانى بەرى هەر تشتى د هندرێ خوە دا کێشە و گرتێن خوە یێن جیاوازیا هزرى بداوى بینن، ستراتیجیەتەکا هەڤبەش ئاڤاکەن و خوە بکەنە خودانێن پرسگرێکا کوردستانێ، ب بریار تێکوشانا خوە ئەنجامدەن، ژبوى هندێ خەونێن داگیرکەرێن کوردستانێ بن ئاخ ببن، چەپێن کوردستانى ب کریار خوە بکەنە هێڤێنێ پارستنا ئێکرێزیا نیشتیمانى، چونکە ب ئێکرێزیا مە دێ هەموو رێکێن سەرکەفتنێ نێزیک و ئاسان بن.

 

  • 1