ئەمە بڵاوبكەوە
FaceBook  Twitter  

... ماوەی دوو مانگە لە نێو گۆڕەپانی عێراق دەنگێكی گەورەی ناڕازەیەتی هەڵگیسراوە , كە لەچەندین چین و توێژ پێك هاتوون كە ئەم دەنگە ناڕازایەتیە چەندین ناوی بەدوای خۆی دا هێنا كە دیارترینیان ناسرابوو بە شۆڕشی دژی گەندەڵكاران, لە دەرئەنجامی ئەم دەنگە ناڕەزایەتیەدا بە چەندان هاوڵاتی عێراقی بوونەتە قوربانی دیارترینیان ئەوەی لە ناسریە ڕوویدا كە خوێن ڕشتنێكی گەورەی بەدوای خۆی دا هێنا چوونكە ئیتر تووڕەیی گەل لە ئاستێكی باڵادایە كە بەهیچ شێوەیەك دامركاندنەوەی ئەستەمە, هاوكاتیش لە بەردەوامی ئەم خۆپیشاندانەدا كە ماوەی دوومانگی تێپەڕاندوە كەچی لە دەرئەنجامدا وای كرد كە سەرۆك وەزیرانی عێراق عادل عەبدلمەهدی نامەی دەستلەكاركێشانەوەكەی خۆی پێش كەش بە پەرلەمان بكات وە پەرلەمانیش بە زۆرینەی دەنگ دەستلەكاركێشانەوەكەی قبول كرد, هاوكاتیش ئەم دەستلەكاركێشانەوەی بە یەكەم دەستلەكاركێشانەوە دانانرێت لە ماوەی كاری سیاسی دا كە لە ڕابردوودا لە چەندین پۆستی تردا دەستی خۆی لە پۆستكەی كێشاوەتەوە بەڵام ئەوەی ئەم جارەیان جیاوازە چوونكە پۆستی ئەم جارەی سەرۆك وەزیرانە كە ساڵێكیش تێنەپەڕیوە بەسەر دەسەڵاتەكەیدا كەچی وایان لێ كرد دەست بەرداری دەسەڵات ببێتەوە كە هەروەكو ئەوەمان پێ دەڵێت كە گوایە ئەم پیاوە سەرچاوەی هەموو گەندەڵیەكانی نێو عێراق بووبێت بەڵام لە ڕاستی دا گەندەڵیەكە هی سەرچاوەی ساڵانی ڕابردووی عێراقە كە زۆر بەئاسانی بۆ ئەو سەرۆك وەزیرانەكانی تر بەڕێوە چوو كە دەستی خۆیان لە پۆستەكانیان نەكێشایەوە,

بەڵام لە ئێستادا عێراق وەكو حكومەتێكی كار بەڕێكەڕی لێ هاتووە بۆ ماوەی یەك مانگ , بەڵام ئەوەی لێرەدا جێگای تێبینیە هیوادارام لە یەك مانگ زیاتر تێپەر نەكات چوونكە ئەم جۆرە ڕووداوانە لە نێو گۆڕەپانی سیاسی عێراق بە ئاسانی چارەسەر ناكرێن و بەهۆی بوونی ئەو ململانێ و ئاڵۆزیانەی نێوان لایەنەكاندا, خۆی لە ڕاستیدا بوونی دەست لەكاركێشانەوە لە نێو گۆڕەپانی سیاسەتدا بە سیمایەكی دیموكراسیانە دادەنرێت چوونكە بەهۆی ئەوەی ڕەنگە ئەو كەسە دەسەڵاتێكی ئەوتۆی نەبێت بۆ چارەسەری ڕووداوەكان كە لە دەرئەنجامدا بە دەست لە كاركێشانەوە ڕەنگە ببێتە دەرگایەك بۆ چارەسەری كێشە سیاسیەكانی نێو ئەو وڵاتەدا, بەڵام بۆ عێراق تۆزێك پێچەوانەیە چوونكە لە عێراق هەركەسێك بێت و بڕوات هیچ گۆڕانكاریەكی ئەوتۆ تێدا ڕوونادات , بەهۆی ئەوەی كەسێكی خاوەن ئیرادەی بەهێز نایەتە نێو گۆڕەپانی سیاسی عێراق كە بتوانێت بە شێوەیەكی ڕاستەقینە ڕووبەڕووی ئەم هەموو گەندڵكارانەی نێو عێراق ببێتەوە بە بێ ئەوەی گوێ بۆ هیچ بەرژەوەندیەكی خۆی بدات,ئەگەرنا عێراق هەر بەردەوام دەبێت لە بوونی گەندەڵی و خراپی ژیانی هاوڵاتیەكانی دا, وە هەرچەندە پاش عادل عەبدلمەهدی پێنج كەس كاندید كراوە بۆ پۆستی سەرۆك وەزیران بەڵام ئاخۆ ئەو كەسانە چ جیاوازیەكیان دەبێت لەگەڵ عادل عەبدلمەهدی واتە ئەو كەسانە كە كاندید كراون كەسانی خاوەن ئیرادەیەكی بەهێزن و دەتوانن تەواوی كێشەكانی نێو عێراق بە شێوەیەكی فراوان كۆتایی پێ بهێنن و ژیانی هاوڵاتیانی عێراق خۆشگوزەران بكەن, بێگومان هەموو كەس ئەوەی دەوێت كە عێراق بەرەو ئارامی بڕوات چیتر لەم فەزای گەندەڵیەدا ڕزگاری بێت كە ساڵانێكی زۆرە بەرۆكی گرتوە كە لە دەرئەنجامدا هاوڵاتی باجە قورسەكەی دەدات و بەتایبەتیش چینی گەنجانی خێر لە خۆ نەدیوی عێراق بوونەتە قوربانی دەستی گەندڵكارە قێزەونەكانی عێراق ,

بەڵام ئاخۆ چارەنووسی ئەم هەموو حزب و میلشیاو گرووپانەش چی لێ دێت كە دەستیان ناوەتە نێو ئەم حكومەتە بێ سەرو بەرەی عێراق هەر بۆیە دەبێت لەم حكومەتە نوێیەدا ئەمانە هەمووی كۆتاییان پێ بێت و عێراق لەسەر دەوڵەتێكی مەدەنی یەك دەنگیدا دابمەزرێنرێت بە بێ هیچ جیاوازیەكی ئاینی و مەزهەبیدا , ئەگەرنا هیچ جیاوازیەكی نابێت لەگەڵ حكومەتەكانی تردا وە دووبارە تووڕەیی شەقام بە دوای خۆی دەهێنێتەوە.

1|12|2019

  • 1