ئەمە بڵاوبكەوە
FaceBook  Twitter  

خەلەکا سیێ

عەرەبێن سونە مەزهەب دیسان دخوازن ڤەگەرن دەسهەلاتێ:

عەرەبێن سونە مەزهەب ج جاران خوە دورى دەسهەلاتێ و بێ ئینسیاتیف نە دیتییە، د دیروکا عیراقێ دە بریار بریارا وان بوویە، دەسهەلات لسەر ناڤێ وان هاتبوویە تاپوکرن، عنجهیەتا وان ژى وەسا دژوار دهاتە دیتن، پێکهاتێن دن ل عیراقێ چ جاران باوەرنەدکر ئەو ل دەسهەلاتێ بهێنە دورخستن، دەسهەلاتا وان نە تنێ گەفە بوویە لسەر پێکهاتێن دن یێن عیراقى بەلکو ئێدى ئەو ببوونە گەفە لسەر دەوروبەران ژى، جڤاکا نیڤ دەولەتى ئێدى بێدەنگى شکاند و کەلێن ئەوێ سیستەما دکتاتور و زوردار هەرفاندن، ل شونا وان سیستەمەکێ دیموکراسى بنەجهکر.

لەشکەر و دەزگەهێن ئەولەکاریێ و پارتیا بەعس هاتنە هەلوەشاندن و قەدەغەکرن، چ هێز نەما ئەو لپشت قەبێ پێکهاتێن دن بخوازن، لەورا هەر زوى توشى هەستریایێ بوون، رولەکێ تێکدەرانە دگێرا و شێتانە رەفتارکرن ژبوى هندێ دیسان ترسێ نیشانى خەلکێ بدەن، خواستن هەموو کارەکێ خرابکار ئەنجامدەن بەس جارەک دن بگەهنەف دەسهەلاتێ، ئەو هەولێن وان هەموو ڤالا دەرکەفتن و ئەو شاشیێن وان ژى بوونە سەردەمێن هندێ دەڤەرێن وان ژى هەمى بهێنەف تێکدان و پشتگوه ئێخسستن، هێزا وان جارەکا دن گەلێ عیراقێ باوەریێ پێنائینیت، باشترە ئەو بیرێ تنێ د رێبەراتیا هەرێما خوەدا بکەن، ئەڤ وەرەقە بتنێ د دەستێن وان دا مایە، ئەڤەژى بێگومان دێ تشتەکێ مەشروع و رەوابیت.

عەرەبێن شیعە مەزهەب دەستا ب ئاسانى ژ دەسهەلاتێ بەرنادەن:

چ جاران عەرەبێن شیعە مەزهەب نەشیانە ببنە خوەدى دەسهەلات ل عیراقێ، ب هەر ئاوایێ هەیى نها خوەدى دەسهەلاتن و هەموو جەمکێن حوکمرانیێ د دەستێن وان دانە، ئیرۆ ئەو شیانە ببنە خوەدى هێزەکا لەشکەرى و ئەولەکاریێ، هەر وەسا چەک و تەقەمەنیەکا زور ژى لبەر دەستێن وانە، ئەو دڤى وارى دە باش یێن هاتینە ئورگانیزەکرن، دڤێ قووناغێ دە هێزا وان ژى پتر جهێ متمانێ و باوەریێ یە، هەبوونا وان د گورەپانا عیراقى دە ب باندورترە ژ یا هەموو پێکهاتێن دن، ئەو کەسێ لهەمبەرى خوە نابینن کو ببیتە سەردەمێن پێکئینانا گەفان د لاوازکرنا دەسهەلاتا وان دە.

جڤاکێ نیڤنەتوى وان وەکە هێزەکا زوردار و دروندە نابینیت، گازندا هەرى بەرچاڤ یا جڤاکێ نیڤ دەولەتى ل ئەڤى پێکهاتى ئەوە کو وان ب روهنى رولێ پاشگویاتیێ پەیرەوکریە، عەتف و حەژێکرنا وان زێدە بو ئالیێ ئیرانێ یە، ئیران بخوە ژى دناڤا جڤاکا نیڤدەولەتى دە یا پشتکولە و سیاسەتا وێ یا دبن دەهان جورێن گومانان دا، ممکنە عەرەبێن شیعە مەزهەب دڤى وارى دا لخوەڤەگەرن و بعەقلانە سیاسەتا خوە بێخنە بەر گوهرینان، د رەفتارێن وان دە هەست بهندێ ناهێتەکرن ئەو د خوەدابچن و ل شاشیێن خوە یێن پاشگویاتیێ ڤەگەرن، وەسا یا بەرچاڤە ئەو تنێ هەبوونا خوە د مەزهەبگەرایێ دە دبینن، تێچوونا وان ژى هەر دێ لسەر ئەڤێ چەندێ بیت، هشێن تاکێن وان دڤى بیاڤى دە یێن هاتیە لوگکرن، گرفتا بنگەهین د ڤێرە دایە ..! 

د ئالیەکێ دن داژى گرفتا ژ هەموویان مەزنتر ئەوە دەسهەلاتا عەرەبێن شیعە مەزهەب لسەر ئاستێن تێکرایا تەخ و توێژێن کومەلگەهێ عیراقى ب دەسهەلاتەکێ دز و گەندەل دهێتە فورمولەکرن، د پێشیا هەموویان دا هاوەلاتیێن وان بخوە، چونکە نەرازیبوون و خوەپیشاندەرێن ڤێ داویێ ل باشورێ عیراقێ زێدەتر ژ هەر درەکا دن دژوارتر بوونە، مادەم رەۆش بڤى شێوەیە، ئەو بخوە لخوە نەدرازینە، پا عەرەبێن سونە مەزهەب و کورد هەر ب چ رەنگان یێن رازى نینە ژ سیاسەتا وان یا پاشڤەرۆ، کێماسیێن وان چەند یێن مەزن ژى بن ئەو ب ئاسانى هەر دەستا ژ دەسهەلاتێ بەرنادەن، یا باش ئەوە بێژنە وان دەسهەلاتا هەوە بلا بو هەرێما هەوەبیت و بەلا هەوە بسەرێ هەوە و دەسستا ژ هەرێمێن پێکهاتێن دن بەردەن..!

کفشبوونا روویێن هەرى راستەقینە د جڤینا پەرلەمانى دە:

داوى جڤینا پەرلەمەنتویا عیراقێ یا رێکەفتى (05/01/2020) ێ، بویەرێن گرنگ و واتەدار تێدا هاتنە خوەیاکرن، لهەمان دەمدا ژى راستیا پێکهاتێن عیراقێ ب زەلالى هاتە راگەهاندن، ئەڤ جڤینە زێدە جڤینەکا عەرەبێن شیعە مەزهەب بوویە، هەبوونا عەرەبێن سونە مەزهەب و یا کوردان نەهاتە پارڤەکرن، ئەڤان هەر دو پێکهاتان پێش وەخت د زانى رەۆش بەرف چ ئاقارەکێ ڤە دچیت، بریارا دەرئێخستنا هێزێن بیانى ل عیراقێ جهێ رازیبوونا کورد و عەرەبێن سونە نەبوویە، ئەو بریار زێدە دبن فشارا کومارا ئیسلامى یا ئیرانێ دە هاتە پێکئینان، د هندرێ خوە ئەڤ بریارە دوربەک مەزن بوویە ل ئایندێ عیراقێ، چونکە ب زورى خاکا عیراقێ کرە گورەپانا ململانا هێزێن نیڤ نەتەوى و هەرێمى.

ئەو دیمەنێن د پەرلەمەنتویا عیراقێ دا هاتیە دیتن لدەمێن وەرگرتنا بریارێ دا، ب تەمامى سەروسیمایێن پەرلەمانەکێ پاشگویێ ئیرانێ دهاتنە مێزەکرن، هەتا د هولا پەرلەمانى دە درویشمێن وان دژى ئەمریکا و ئیسرائیلى بوون، هەمان درویشم بوون یێن د پەرلەمەنتویا ئیرانێ دا هاتیە قیراندن، جیاوازى د ناڤبەرا وان دا تنێ ئەو بوویە، ل پەرلەمانێ ئیرانێ ب زمانێ فارسى بوون ل پەرلەمانێ عیراقێ ژى ب زمانێ عەرەبى، ئەڤە د ناڤەرۆکا خوە دا تشتەکێ گەلەک مەترسیدارە و ب ئاسانى لسەر عیراقیان دە دەرباس نابیت، بو قووناغا داهاتى ئەڤ پرسە گەرەکە ب ئێک جارى بهێتە ئێکلایکرن، هەر وەسا سنورەک ژ ئەڤێ سیاسەتا پاشگۆیاتیێ رە بهێتە دانان و عیراق ژ ئەڤان هشێن گەنى بهێتە رزگارکرن.

مەبەستا عەربێن شیعە د بریارا پەرلەمانى دا لادانا هەموو هێزێن بیانى و ئەمریکا یە ژبلى هێزێن ئیرانى یێن ڤەشارتى و ئەشکەرا، هەلویستێن عەرەبێن سونە مەزهەب و یێن کوردان ب تەمامى بەرۆڤاژى نێرینا وانە، دناڤبەرا عەرەبێن سونە و کوردان ژى جیاوازى هەیە، عەرەبێن سونە مەیلا وان ل هن دەولەتێن کەنداڤێ یە، یا کوردان بتنێ ل شێوازەکێ پاراستنێ یە، کو گرەنتییا هندێ تێدا بیت ئەو جارەکا دن نەبنە نێچیرا هێرەشێن هوڤانە یێن هێزێن تارى و شوڤینست.

لگور بوچوونا من قووناغەکا نوى دێ هێتە پێش، د وێ قووناغێ دە دێ دارێ عەرەبێن (سونە، شیعە) یێ شکەستیبیت، زمانێ وان یێ گەڤەکرنێ هەتا رادەکێ دێ هێتە سنوردارکرن، ئێدى رۆلێ کوردان ژبوى قووناغا داهاتى دێ خورتر هێتە پیشاندان، کورد زێدەترى پێکهاتێن دن راستگوترن د سیاسەتکرنێ دە، واتە وەسا دهێتە چاڤەرێکرن راگرتنا بەلانسا باوەریێ دناڤبەرا هەر دوو مەزهەبان دا کورد ئەوى رۆلى دشێن بگێرن، ئیدى یان عیراقەکا پێگیر ژ شریکاتیەکا راستەقینە کو تێدا کەس ل کەسێ زێدەتر نەبیت یان ژى بنئاخرکرنا ئەوى ناڤێ هەرى کرێت یێ تەژى تراجیدى و جینوساید. 

عیراقەکا سەنترال واتە عیراقەکا ڤالا ژ ئازادیان:

ب ئاوایەکێ ڤەگرى دویر ژ هەموو جورە تورەبوون و هەلچوونەکێ، دخوازم ب لوژیک و ریالیتە مژارا داخوازێن ڤەگەراندنا عیراقا سەنترال لگور نێرینێن خوە بدەم شرۆڤەکرن و نرخاندنێن خوە دڤان چوارچوفان دا بینم زمان، هەلبەت خوەیایە کو عیراق هەر ل رۆژا دامەزراندنێ هەتا سالا (2003) یێ ژ ئالیێ (ئێک نەتەوە .. ئێک مەزهەب) هاتیە برێڤەبرن، پرانیا چەمکێن سەرەکى یێن نیشتیمانى و ئەولەکارى دبن ئینسیاتیفا وان دە هاتبوونە دورپێچکرن، ئەوى (نەتەوە، مەزهەب) ێ سەردەست د تێکرایا قووناغان دا ب زهنیەتەکا شوڤینست و دەمارگیر سەرەدەرى دگەل (نەتەوە، مەزهەب، پێکهاتێن) دن دە ئەنجام دایە.

زورداریا ل ئیراقێ ب درێژاهیا سالان دهاتە پەیرەوکرن، گەلێ کورد زێدەتر ژ هەموو پێکهاتێن دن ئارمانجا ئەڤێ سیاسەتا قرێژ و تەژى گەمار بوویە، ب درندەترین شێوازێن سەرکوتکرنێ مامەلە دگەل جڤاکا کوردستانى کریە، ژبلى نەتەوا عەرەب هیچ نەتەوەیەکێ دن نەشیایە ببیتە خوەدى هەبوون د ملێن حوکمرانیێ و رێڤەبرنێ دا، تێکرایا پێکهاتێن پلە دوو ل عیر اقێ دبن درویشمێ (ڕمە عربیە واحدە .. ژات رسالە خالدە) هاتبوونە بێدەنگکرن، سەردەمێن دەسهەلاتا عەرەبێن سونە هەموو مانشێتێن گوتنێن وان یێن شوڤینى و گرێدایى عروبەتێ بوونە و هیج حسابەک بو نەتەوەێن دن نەکرییە.

لڤێ داویێ ژى دبن دەسهەلاتا عەرەبێن شیعە دا، درویشمێن وان پرانى یێن پاشڤەرۆ و ئولدارییا بەرتەسک بوونە، بەردەوام د یاد و بیرەوەریان دا هووسان دەنگێ وان یێ بلندە (لبیک یا مهدی .. لبیک یا حسین .. امریکا برە برە ایران تبقى حرە .....هتد) ئەگەر مرۆڤ تەماشەى شەقامێن عیراقێ بکەت ژبلى تێکستێن ئولى هیچ تشتەکێ دن ناهێتە دیتن، لجها وەلاتەکێ رەنگاو رەنگ بهێتە بەرهەمئینان، رەنگێ خەم و بەهیان ئانکو رەنگێ رەش کرە رەنگێ هەر چوار وەرزێن سالێ، بەردەوام کێلەک و ناڤملێن زنجیر وەشاندنێ و لبەندا مرنێ د سەکنین.

ئەو دەنگێن بهێز یێن کو دخوازن عیراقەکا سەنترال ڤەگەریت، دەنگێن نامونە یێن هەمان عەقلیەتا سەردەمێن پێشانە، دیسان حەزا وان هەیە هەما تراژیدى و کارەساتێن پێشان دوبارەکەنە ڤە، ئەڤ بیرکرنە ئارمانجا وان رێگریکرنا ئازادیانە، ئەو ناخوازن هەموو پێکهاتێن عیراقێ ب ئاوایەکێ ئازاد و یەکسان ببنە خوەدى هەبوون، هێشت ئەو کێم سەحدکەنە هن پێکهاتان ب تایبەت ژى ئاورێن وان زێدە لسەر کوردانە، گەرەکە باش رێک ل بیرۆکا عیراقا سەنترال بهێتە گرتن، چونکە مەبەستێن وێ یێن سەرەکى یێن خراب و پرى مەترسینە، لسەر ئایندە و پاشەرۆژا گشت پێکهاتێن گەلێ عیراقێ، ل هەمان دەم داژى ئاستەنگن د پێشیا وان گوهرینێن ئاراستەکرى یێن ژبوى ئاڤاکرنا جڤاکەکێ سڤیل و شارستانى د لڤین و حەرەکەتەکا بدوم دە.

 

  • 1