ئەمە بڵاوبكەوە
FaceBook  Twitter  

 (بەشی یەكەم)

دوای راپەڕینە مەزنەكەی گەلی كوردستان لە بەهاری 1991دا بارودۆخێكی لە باروگونجاو بۆ گەلەكەمان رەخسا و ، دەسەڵاتی دیكتاتۆر و رەگەزپەرستی بەعس لە كوردستان شار بەدەركرا ، خەڵكی كوردستان بە هەموو چین و توێژ و جیاوازی فیكری و سیاسی و نەتەوەیی و ئایینی ئازاد و شاد بوون ، حزبە كوردستانیەكان و تێكۆشەرانییان لەگەڵا رۆڵەكانی گەلەكەیان تێكەڵ بوون ، بەرەی كوردستانی بۆ ماوەی ساڵێك و دوو مانگ دەسەڵاتی گرتە دەست و تواندرا ئاسایشی جەماوەری كوردستان بپارێزرێت ، بەتایبەتی دوای ئەوەی رژێمی بەعسی دیكتاتۆر لە مانگی تشرینی یەكەمی ساڵی 1991 دام و دەزگاكانی فەرمانرەوایەتی لە كوردستان كێشایەوە و ، موچەی فەرمانبەرانی بڕی ، فەرمانی دەركرد ، بۆ موچە خۆرانی كوردستان كەروو لە شارەكانی ژێر دەسەڵاتی بەعس بكەن و كوردستان جێبێڵن بۆ ئەوەی لە كارەكانییان بەردەوام بن و ، موچەیان نەبڕێ‌ و بەردەوام بێت ، رۆڵە دڵسۆزەكانی گەلەكەمان لە مامۆستایان و فەرمانبەران و كارمەندان و خانەنشینان داواكەی رژێمیان رەتكردەوە و ، بەبێ‌ موچە لە سەركارەكانییان بەردەوام بوون ، بەرەی كوردستانیش توانی سەرپەرشتی دەسەڵات بكات و كاروباری حكومەت بەرێوەببات ، تاكو پێكهێنانی حكومەتی كوردستان لە دوای هەڵبژاردنی گشتی لە مانگی ئایاری ساڵی 1992 دا ، گەلی كوردستان لە رێگای هەڵبژاردنەوە بووە خاوەنی پەرلەمان و حكومەتی سەربەخۆی كوردستان (( لەگەڵا ئەوەی هەڵبژاردنەكە بێ‌ كەم و كوڕی نەبوو ، بەڵام لێرەدا جێگای باس نیە)) .

بەرپرسە باڵاكانی حكومەت و ئەندامانی پەرلەمانی كوردستان خەڵكی تێكۆشەر و نیشتمانپەروەر و دیار و ناسراو بوون ، خاكی و سادە بوون ، بەردەوام لەگەڵا جەماوەر تێكەڵا بوون و لە پەیوەندی دا بوون ، لە نزیكەوە ئاگاداری ئێش و ئازاری رۆڵەكانی گەلەكەیان بوون ، لەگەڵا زەحمەتكێشان و دانیشتوانی خانووە قوڕەكاندا دەژیان ، وەك ئەوەی نەمر (مام جەلال تاڵەبانی) زۆرجار باسی دەكرد ، هێشتاش دەستە و گروپی ماستاوچی و خۆپەرست و هەڵبەست و دەسەڵات پەرست و پلە و پایە پەرستی سەریان هەڵنەدابوو ، شوێن پێ‌ و جێگایان نەدەبۆوە و نەببۆوە ، هەروا سەركردە باڵاكانی حزبەكان پێشمەرگە ئاسا دەژیان و دەتواندرا دیدارییان لەگەڵدا بكرێ‌ ، خۆشییان رۆژانە لەگەڵا جەماوەری كوردستاندا بوون و هەڵگری ئێش و ئازار و مەینەتییەكانی گەلەكەیان بوون ، لەم بارودۆخەدا لە رۆژێكی مانگی ئەیلولی ساڵی 1993 ژوانمان لەگەڵا بەڕێز كاك كۆسرەت رسول علی – سەرۆكی حكومەتی كوردستان لە كاتژمێر (10)ی بەیانی هەبوو ، (بەندە و شەهید محمد حەلاق) زووتر لە كاتی دیاریكراو چووینە ئەنجومەنی وەزیران و ژووری پێشوازی و كاك (فرهاد) كەسكرتێری سەرۆكی حكومەت بوو ، پێشوازی لێكردین و دانیشتین ، كاك (فرهاد) ئاگاداری كردین كە سەرۆكی حكومەت میوانی هەیە ، كاكە حەمە و منیش وەكو ئەو بەڕێزانەی ژوانییان لەگەڵا سەرۆكی حكومەت هەبوو لە چاوەروانیدا بووین ، لە هیكرا ئەفەندییەكی پاك و خاوێن و شیك و پۆشتە بەسەروسیما دەبوو هێمن و لە سەرخۆ بێت ، بەڵام وانەبوو ، لە مێزەكەی كاك فرهاد چوو پێشەوە و ، بە دەنگێكی بەرز ووتی كاكە من كارم هەیە و ، مەوعیدم لەگەڵا بەڕێز كاك كۆسرەت هەیە ، چۆن من رادەگری ، دەبێ‌ بچمە ژوورەوە ، كاك فرهاد لەسەرخۆ و بەڕێزەوە ووتی ، مامۆستا كاك كۆسرەت میوان هەیە كە میوانەكە رۆیشت ، جەنابت دەنێرمە ژوورەوە ، ئەو خەڵكەی كە لە ژوورەكە بوون هەموویان سەرەنجییان بۆ لای ئەفەندییەكە چوو ، بێ‌ دەنگی باڵی بەسەر ژووری پێشوازیدا كێشاو ، كابراش بێ‌ شەرمانە لە شوێنەكەی دانیشت و ، لنگی خستە سەر یەك و خۆی مروموچ نیشاندەدا ، ئەو هاوڵاتییانەی لە ژووری پێشوازیدا بوون ، سەیری ئەفەندییان دەكرد ، لەوانەیە هەر یەكە و بیری بۆ شتێك چووبێت و لێكدانەوەی بۆ رەفتارەكەی زڕتە زەلامەكە كردبێت و ، بە بەرپرسێكی مەزن و گرنگییان لە قەڵەمدا بێت ، منیش لای خۆم وای بۆ چووم كە لەوانەیە ئەفەندی نوێنەری سەرۆكی حكومەت بێت لە دەڤەری سلێمانی یان بەرپرسێكی باڵایە لە یەكێتی و هاوسەنگەر و برادەری بەڕێز سەرۆكی حكومەتە .. جارێ‌ دانیشتووانەكان نووقمی بیركردنەوە بوون ، كاكی ئەفەندی راستبۆوە و بەرە و مێزەكەی فرهادی سكرتێر چوو ، بەدەنگێكی لەجاری پێشوو گڕتر و بەرزتر هەمان ووتەكانی پێشووی دوبارە كردەوە ... !! كاكە (فرهاد)یش بە هێمنی و لەسەرخۆ ووتی بەڕێزم كاك كۆسرەت میوانی هەیە و فەرموو دانیشە و ، میوانەكەی بروات بۆ ژوورەوە دەچیت ، ئەو بەڕێزانەش هەموویان مەوعیدیان بۆ چوونەلای كاك كۆسرەت هەیە ، كابرا بەبێ‌ ئەوەی بایەخ بە خەڵكەكە و قسەكانی سكرتێری سەرۆكی حكومەت بدات ، لوت بەرزانە تەسحێبەكەی بادەداو لە شوێنەكەی دانیشتەوە ، ئەوەندەی پێنەچوو كاك فەرهاد بە ئەفەندی ووت ، فەرموو مامۆستا بچۆ ژوورەوە ، بە ئێمەشی ووت فەرموون هاوڕێ‌ ئێوەش بچنە ژوورەوە ، ئەم رێگا پێدانەم گەلێك پێخۆش بوو ، لەبەر ئەوەی بوار دەبێ‌ ئەفەندی بناسین و بزانین ئەرك و بەرپرسیارێتی چی یە و داواكارییەكانی چی یە ، ئێمەش بەدوای كابرادا چووینە ژوورەوە ، بەڕێز سەرۆكی حكومەت لە تەنیشت مێزەكەی وەستابوو بۆ پێشوازی لە ئەفەندی لە شوێنی خۆی نەچوو لایەوە ، ئەفەندی چووە پێشەوە و بەگەرمی تۆقەی لەگەڵا سەرۆكی حكومەت كرد و خۆپێناسندن ، شتێكی سەیر و سەمەرە بوو ، لەدەرەوە هەڵس و كەوتی چۆن بوو ، هەموومانی بێ‌ دەنگ كرد ، خۆی وانیشاندا كە هاوڕێ‌ و هاوسەنگەری گیانی بەگیانیە لەگەڵا بەڕێز سەرۆكی حكومەت كە چی ئێستا بەدیار كەوت سەرۆكی حكومەت ناناسێ‌ ، كاك (كۆسرەت) بەڕێزەوە یەك دوو هەنگاو لە ئێمە هاتە پێشەوە و بە گەرمی پێشوازی و بەخێرهاتنی لێكردین ، لەلای چەپی و نزیك لە سەرۆكی حكومەت دانیشتین ،كاك (كۆسرەت) هەواڵی هاوڕێیانی پرسی ، هیچ قسەیەكی لەگەڵا ئەفەندیدا نەكرد ، ئێمەش چاوەروانی ئەوەمان دەكرد ، كە بەڕێز سەرۆكی حكومەت لەسەر بنچینەی رێزبەندی چوونە ژوورەوە جاری یەكەم لەگەڵا ئەفەندی قسە بكات ، بەڵام كاك (كۆسرەت) رووی قسەی هەر لە ئێمە بوو ، ووتی هاوڕێ‌ رەوەند بارودۆخەكە چۆنە و دەنگ و باستان چیە ، بەندەش تەواو دڵتەنگ و بێزار بووم لە هەڵس و كەوتی ئەفەندی ، بەر لەوەی وەڵامی سەرۆكی حكومەت بدەمەوە ، ووتم كاك كۆسرەت وەك خۆم قسە بكەم ، یان وەكو خەڵكی تر ، رووشم بۆلای ئەفەندی وەرگێرا ، سەرۆكی حكومەت ووتی ، نا ، نا هاوڕێ‌ (رەوەند) وەكو خۆت قسە بكە ... ! ئەو پرسیارەم بۆیە ئاراستەی سەرۆكی حكومەت كرد ، بۆ ئەوەی ئەفەندی تێبگات كە لە حزرروی سەرۆكی حكومەت دەبێت بەڕێزەوە قسە بكات ، جا نازانم ئەفەندی چەند لەمەسەلەكە تێگەیشت ، بەڵام بەردەوام لە پێشەخۆی دەی ووت خوابتپارێزی كاك كۆسرەت تەمەنت درێژبێت و خوا بۆ ئێمەت بێڵێ‌ ... زۆر سوپاس بۆ ئەم دیدارە و چاوم رۆنبۆوە ، ماوەیەكە ئارەزووم دەكرد بێمە خزمەت جەنابت .

  • 1