ئەمە بڵاوبكەوە
FaceBook  Twitter  

لە ساڵانی 2014 وە تا ساڵی 2017 گەف و هێرشە بەربەریەكانی داعش شپرزەی و خەمناكیەكی زۆری خستە نێو خەڵك و ناچاری بەرخودانی كردن، لەم سەروبەندەدا دژ وەستان و بەرهەڵستی كردنی ئەو پەتایە ئەركێكی نیشتمانی بوو لەسەر هەموومان، بەتایبەت ئێمەی خانەنشینانی شارستانی كە بە پارەی خۆمان توانیمان بەشداری بكەین و خۆمان بەبرسیەتی بهێڵینەوە تا ئەو پەتایە كۆتایی دێت، حكومەت ئەو پارەی موچەیەی كە مافی خۆمان بوو بۆی گلداینەوە واتە بۆی پاشەكەوت كردین و هەتا ئێستاش لە نێو خەزێنەی حكومەتدایە.

ئێستا 16 مانگی خانە نشینان قەرزارە، بارودۆخی ئابووری حكومەتیش بەرەو ئاسایی بەوونەوە دەچێت و لە دووڕ دووەمین سەد رۆژەی حكومەتی نوێمان دەسووڕێینەوە و هەواڵەكان هەمیشە باسی چاكسازی دەكەن و بەهاریان هێناوەتە چۆكان، ئەمن دەڵێم دەبا لەو چاكسازییە پروشكەكیش ئەمەی بگرێتەوە خۆ گەلەك زەحمەتمان كێشاوە و ئێمەی خانە نشینان نەبازرگانین و نە مۆڵ و مەزرەعەمان هەیەو نە تەمەنی ئەوەشمان ماوە ئیشێكی دی بكەین، ئێستا مەسەلەیەكی كوردی هەیە دەڵێ‌ كە جولەكە مایەپوچ دەبوو لە دەفتەرە كۆنەكانی دەپێچاوە، بۆیە ئەلعان پێشنیارم بۆ حكومەت ئەوەیە هەردوولامان بە فكری فیفتی بە فیفتی رێكەوین و ئەو 16 مانگەی لەسەر حكومەتە بە 32 مانگ بمانداتەوە لەم كاتەدا نەشیش دەسووتێ‌و نەكەباب، ئەركی قورسیش ناكەوێتە سەر حكومەت و ئێمەی خانەنشینانیش دەبووژێینەوە.

ئێستاش منی خانەنشینی تەنیا داوای مافی خۆم دەكەم و بەس، چ داوای موڵكو ماڵم نەكردووە دەمهەوێ‌ هەتا لەژیان ماوم ئەو مافەی حكومەت لەمنی بێدەسەڵاتی زەوت كردووە بمداتەوە، خۆتان دەزانن خانەنشینان پیر بوون و هەچی دەردوبەڵایە لە دەورمان كۆبۆتەوە نەخۆشی تەنگی پێهەڵچنیوین و نەخۆشخانەش بەم حاڵەیەوە ئەگەر چارەسەری نەكەن هەموومان بەو دەردەوە سەردەنێینەوە.

  • 1