ئەمە بڵاوبكەوە
FaceBook  Twitter  

سەلام عەبدوڵڵا/ دەسەڵات و ڤایرۆسی كرۆنا

حزبە دەسەڵاتدارەكان لەلایەكەوە بە هوشیارییەوە و بە نەخشەی بەرنامەیەكی دیاریكراو خەڵك بێكاردەكەن، موچە دوادەخەن و خزمەتگوزارییەكان(تەندرووستی, پەروەردە، كارەبا، ئینترنێت و تەلەفۆن و ئاو...هتد)گران دەكەن و كرێی كار هەرزان و كاتی كاركردنیش زۆر دەكەن و لەولاوە بەناوی رێكخراوی خێرخوازی(بارزانی)و(مام) هەڵدەستن بە"خێركردن" بە خەڵك. ئەو"خێركردن"ە هاوشێوەی قەواڵەی بەهەشتە(صكوك الغفران)ەكەی مەسیحییەكانە. بەرپرسانی ئەو حزبانە لەناو تەلارە شاهانەكانیانەوە، بۆ هەڵخەڵەتاندی رای گشتی، دەیانەوێت بە سامانی گشتی خەڵكی كاركەر، بەو پەڕی ریاكارییەوە، پەیامێكی گاڵتەجاڕانە پێرابگەیەنن: ئێمە فریادرەسی ئێوەین!

لەم نێوەندە، رۆشنبیر، نووسەرو رۆژنامەنووسەكانی(Die schreibtischtaete) ی ئەو حزبانە بەبێ ئەوەی پێمان بڵێن توانا داراییەكانی بەرپرسەكانیان لە كوێوە دەستیان كەوتووە بە مەبەستی سەرخۆشكردنی رای گشتی و پەردەپۆشكرنی(دزینی گیرفان و رەنجی خەڵك بە رێگای كۆنتڕۆڵكردنی كڕین و فرۆشتن و سەروەتی گشتی)، بە شێوەیەكی جاهیلانە، ناوی نەتەوە و ئاین و مەزهەب و سەركردە نەمرەكانیانەوە بیانووی سەیروسەمەر دەهێننەوە بۆ ئەم بارودۆخە كارەساتئامێزە كە نەخشەی ئابووری حزبەكانیانە و بەسەر خەڵكیان هێناوە. 

پەتای كرۆنا حەقیقەتێكی گەورەی بۆ هەموو مرۆڤایەتی روونكردەوە: 

دەسەڵاتی سەرمایەداری و بازاڕە ئازادەكەی مرۆڤایەتی بەرەو فەوتان دەبات، دوا گیانی مرۆڤدۆستی تێكدەشكێنێت و تاقە رێگامان لەبەردەم مرۆڤایەتی بۆ نەهێشتنی ستەمكاری و جەنگ و هەژاری بریتیە لە سیستێمی كاری هەرەوەزی ئازاد: كاركردنی بێبەرامبەر لەپێناو چاكەی گشتی كۆمەڵگە بە بێ چاوەڕوانكردنی هەر پاداشتێك!

كەواتە: با هەر تاكێك لە ئێمە، بەخۆی و بە گوێرەی توانای بە بەشداریكردن لە هاوكاری 

قوربانیانی ئەم سیستێم و حكومەت و حزبە تاوانیارانە، بەكردەوە پەڕە بە هەڵویست و كار و رەوشت و هونەر و ئەدەبی هەرەوەزی بدا.

"بەڕێز"ئەمە خەیاڵ نیە و كەی هوشیاری خەڵك گەیشتە ئاستی هەڵبژاردەی كەمالی عەقڵ لە ژیانی هەرەوەزی، ئەوا دەبێ ئێوە و سیستێمە نائینسانیەكەتان خانەنشین بكرێن و دەست بە دامەزراندنی سیستێمی(مرۆڤ برای مرۆڤە) بكەین!

Comments

  • 1