ئەمە بڵاوبكەوە
FaceBook  Twitter  

حزبی شیوعی لە عێراق و باشووری کوردستاندا،لە کاروانی دەیان ساڵەی کاروخەباتیدا،سەرەڕای هەڵەکانی،شکستەکانی،لە دەستدانی دەرفەتە مێژوییەکانی..خاوەن دەیان و سەدان لاپەڕەی گەشە لە تێکوشانی نیشتمانی و چینایەتی وپێشمەرگایەتیدا..خاوەن سەدان و هەزاران شەهیدە لە رێگای ئازادی وداکۆکیکردن لە مافەکانی کرێکاران و جوتیاران و یەکسانی کومەڵایەتی و مافی نەتەوەیی و وەستان لە دژی رژێمە دیکتاتۆری و شۆڤینییەکاندا..

نەبەردییەکەی هەندرێن لە ۱۲-٥-۱۹٦٦ دا، یەکێکە لە سەروەریەکانی پێشمەرگە قارەمانەکانی حزبی شیوعی بە پلاندانانی لێژنەی ئازادی حزب و سەرکردایەتی راستەوخۆی دوو فەرماندەی ناوداری شیوعی : رەئیس کەمال و فاخر مێرگەسوری،لەگەل پێشمەرگە ئازاکانی گوندی دەرگەڵە بە سەرکردایەتی عزەت سلێمان بەگ، ئەوانیش هەروەکو مام زرار دەرگەڵەیی دەڵێت:"زۆربەیان خەڵکی شیوعی بوون و من یەکێک بووم لەوانە کە شیوعی بووم، لەگەل براکەم بووم"...بڕوانە: رێگای کوردستان، ژمارە(٥۰۳) لە ۲۰-٥-۲۰۰۲.

بێگومان پێشمەرگەکانی دەرگەڵەو دەوروبەری جگە لە ئامانجی نیشتمانی و نەتەوەیی بەرگریان لە گوندو ناوچەکەشیان دەکرد، کە مان و ژیان و کەرامەتیان بوو..تەواوی پێشمەرگەکانی حزبی شیوعیش هەمیشە هاوشان و هاوئامانج بوون،لە بەرگری کردن لە هەمو ناوچە رزگارکراوەکانی کوردستانداودژی رژێمی شۆڤینی بەغدا بوون و لەهەمان کاتدا لەگەل چارەسەری ئاشتیانەی مەسەلەی کورد بوون.

ئەم داستانە گەورەیەش بە خوێنی ئاڵی سێ پێشمەرگەی قارەمان تۆمارکرا: شەهید عەریف یونس عەزیز(هەولێر)، شەهید خدر عەوڵابەگ دەرگەڵەیی، شەهید ساڵح مام ئەلیاس رواندزی .

هەزاران سڵاو بۆ روحی پاکیان، مایەی شانازی و سەروەرین بۆ کەس وکارو گەلەکەیان.

بێگومان ئەوکات سەرکەوتن لە شەڕی هەندرێن،سەرکەوتنیش بوو بۆ بزووتنەوەی رزگاریخوازی کورد بە ڕابەرایەتی مەلا مستەفا بارزانی،سەرکەوتنیش بوو بۆ حزبی شیوعی.. هەروەها هێزی هەندرێن نموونەیەکی گەش بوو لە خەباتی برایانەی هاوبەشی نێوان پێشمەرگەکانی کوردو عەرەب و تورکمان و موسوڵمان و دیان..

تاکو ئێستا زۆر لەسەر شەڕوداستانی هەندرێن نووسراوە، بە وتارێک و چەندین وتارو دیمانەو گێڕانەوەی بیرەوەریەکان، مافی تەواو بەم رووداوە مێژووییە نەدراوە،بەڵکو ئەمە پێویستی بە توێژینەوەی زانستی مێژوویی هەیە، هیوادارم بتوانم لە ئایندە ئەم کارە ئەنجام بدەم.

ئەوەی جێگای داخە یان مایەی سەرنجە، نەیارانی حزبی شیوعی ، ئەوانەی چاویان بە نەبەردیەکانی پێشمەرگە شیوعیەکان هەڵنایەت،ئەوانەی لەسەرەوە باسی برایەتی دەکەن بەڵام لە ناخەوە وا نین..هەمیشە هەوڵیان داوە رۆڵی حزبی شیوعی وەکو خۆی لەم داستانەو زۆر شەڕو داستانی دیکەی پێشمەرگەدا چ لە شۆڕشی ئەیلول یان لە شۆڕشی نوێی هەشتایەکاندا و تاکو ڕاپەڕین و دوای ڕاپەڕینیش، نەخەنە روو، یان بشێوێنن ..سەبارەت بە داستانی هەندرێنیش دڵیان بەوە خۆش نابێت باس لە رۆڵی سەرەکی شیوعییەکان بکرێت لە داستانەکەدا،کە لە هەمان کاتدا سەرکەوتن بووە بۆ شۆڕشی ئەیلول.. حکومەتی بەغدا کە لە هێرشەکانی بۆ سەر هەردو شاخی هەندرێن و زۆزک شکستی هێنا و پلانی (توكلت علی الله ) لە گۆڕنرا، کە بەتەمابوون دوای گرتنی هەردو شاخی هەندرێن و زۆزک بە مەرامە گڵاوەکانیان بگەن، ناچار بوو داوای گفتو گۆو شەڕ راگرتن لە سەرکردایەتی شۆڕشی کورد بکات، ئەوەبو بەیاننامەی ۲۹ی حوزەیران بڵاوکریەوە، کە بە بەیاننامەی بەزاز ناسراوە، کە داننان بوو بە بەشێک لە داواکارییەڕەواکانی شۆڕشی کورد.کە دواییش جێبەجێیان نەکرد..

تێبینی: لەگەل ئەم بابەتەمدا وێنەی هەرسێ شەهیدە قارەمانەکەی هەندرێن بڵاو دەکەوەوە.سوپاسی کاک سوپەر جەلال بەگ دەکەم کە شەوی رابردو وێنەی شەهید خدر عەوڵابەگی بۆ ناردم. مامۆستا سالمیش لە سۆران چەن وێنەیەکی شەهید عەریف یونسی بۆ ناردوم کە خاڵییەتی.

  • 1