ئەمە بڵاوبكەوە
FaceBook  Twitter  

حوکمڕانییە هاوبەشەکەی (پارتی، یەکێتی،گۆڕان) بەشێوەی کردەیی شکستهێنانیان سەلمێنراوە،بەهۆی :

١٭ بەجێ نەهێنانی ئەو بەرنامەیەی کەلە هەڵبژاردندا، بانگەشەیان بۆ دەکرد ودەنگی لایەنگرانی خۆیان پێ وەرگرت،و ئەو بەرنامە هاوبەشەی کە زۆرینەی پەرلەمان کە لەو 3 لایەنە پێکهاتووە پەسەندکرا.

٢٭ سیاسەتێکی ئابوری شکستخواردوویان پێڕەوکرد کە پشت بەستوو بوو بەیەک سەرچاوەی داهات،کە لە فرۆشتنی نەوتەوە بەدەست دەهات.

٣٭لە پێوەندی لەگەڵ بەغدا کە،پشت ئەستووربوون بە دەستوور ،نەیانتوانی پێوەندییەکە لە ئاستێکدا بهێڵنەوە کە دامەزراوە دەستووری ویاساییەکان داکۆکیمان لێ بکەن.

٤ ٭ لەدابینکردنی مووچەو خزمەتگوزارییەکان، کەموکوڕییەکی گەورەیان لێ دەرکەوت ،ولە کۆی 6 مانگ لەساڵی2020 دا،تەنها یەک موچەیان پێدابینکراوە،و پەنایان بردە بەر بڕینی لەسەدا 21 ی مووچەی موچەخۆران بە بێ گەڕانەوە بۆ دەسەڵاتەکانی دادوەری و پەرلەمانی کوردستان،ونەدۆزینەوەی میکانیزمێکی گونجاو بۆ  پێدانەوەی مووچە بەزۆر پاشەکەوتکراوەکان.

٥٭ فشار هێنان بۆ ئازادییەکان، وگرتن و هەڕەشەو پاکانە وەرگرتن لە چالاکوانانی سیاسی ومەدەنی لەکاتی دەربڕینی ناڕەزایەتییەکاندا.

٦٭ بێدەنگی وهەندێک جاریش هاریکاری هێزە هەرێمایەتییەکان بۆ دەستدرێژی بۆ سەر خاکی هەرێم ،و شەهید کردنی هاووڵاتی مەدەنی ،وسوتاندنی ڕەزو باخەکانیان.

٧٭بەدەمەوە نەچوونی کوردستانیانی ناوچە جێ ناکۆکەکان و بەجێ هێشتنیان لەبەردەم هێرشەکانی داعش ،و شۆڤێنیە داخ لەدڵەکان و تەعریبچی و تەشەیوعگەراکان،و سووتاندنی بەرهەمی ساڵیان لە گەنم و جۆو گەڕاندنەوەی عەرەبە هاوردەکانی سەردەمی بەعس.

ئەمانە و گەلێک نمونەی تر، دەربڕی ڕاستن بۆ بێ توانایی ئەم دەسەڵاتە،و پێداویستی بزووتنەوەیەکی جەماوەری بەرفراوان بۆ گۆڕانکاری ڕیشەیی و دامەزراندنەوەی ، حوکمڕانییەتیەک لە هەرێم کە لەئاستی پێویست،و وەڵام دەرەوەی داخوازییەکانی گەل بێت.

بۆ ڕووبەڕووبونەوەی ئەم نادادی و بێسەرەوبەرەییەی حوکمڕانێتی هەرێم،لەنێو چین و توێژەکانی گەلدا دەیان شێوازی دەنگ هەڵبڕین وبێزاری پەرەی سەندووە، ئەگەرچی لەڕابردوودا   بەئێستاشەوە هەوڵدراوە،دەنگە ناڕازییەکان بەهێز وکوشتن وتۆقاندن بێدەنگ بکەن،بەڵام ڕەوایەتی داخوازیە جەماوەریەکان،وێرای کپ بوونی کاتی وەک ژیلەمۆ دوای هەر شنەبایەک گەشاوەتەوە.

ناڕەزاییەکان جۆرێک لە هەڕەمەکی و بێ پلانیان پێوە دیارە(لەگەڵ دانانی ڕێز بۆ هەر جوڵەیەکی ڕاستەقینەو دڵسۆزانە،ئەگەر تاکەکەسیش بوبێت). هەلومەرج و قۆناغە نوێیەکە پێویستی بە ێداچوونەوەو خۆڕێکخستنی زیاتر هەیە،تا لە شێوازی (خۆپیشاندان بۆ خۆپیشاندان)ەوە،بگوازرێتەوە،بۆ (خۆپیشاندان بۆ بەدەستهێنانی ئامانج) بێت.

دیاریکردنی پلانی کارکردن و دیاریکردنی ئامانج، پێویستی بە گفتوگۆو بەشداری کەس و گروپە ناڕازیەکان هەیە، تا هەموو ئەوانەی دێنە مەیدانی تێکۆشانە جەماوەرییەکەوە لایان ڕوون بێت،بۆچی تێدەکۆشن.

کە پلان و ئامانج دیاریکرا، ئەوکات ،بۆ ئەوەی کارەکە لە بێسەرەو بەرەیی و ڕەمەکیەت دەرچێت،پێویستی بە دەستەیەکی سەرپەرشتی هەیە،لەناو ئەو چالاکوانانەی کە لەلایەن زۆرینەی تاکە ناڕازیەکانەوە پەسەند بکرێن،و پێشڕەوایەتی و ڕێنوێنی و ڕێکخستنی کارو کات و دروشم و گفتوگۆکانیان پێ بسپێررێت.

نابێت بزووتنەوەکە لە شارو زۆنێکدا بمێنێتەوە،و دەبێت بگاتە هەموو شارو شارۆچکەکانی هەرێم وپایتەخت لەپێشەوەی هەموو شارەکانەوە بێت.

بۆ ئەوەی بزووتنەوەی ناڕەزایەتی سەرانسەری بێت،پێویستە هەموو دەستە ناوچەیی و گروپە جیاجیان ڕێک بخرێن،ولە یەک ناوەندەوە ڕێنمایی و کات وکاریان بۆ دیاری بکرێت.

پێویستە بزووتنەوە سەرانسەرییەکە،بزووتنەوەیەکی مەدەنی بێت وپەنا نەباتە بەر توندو تیژی وهەموو کارمەند ودامەزراوەو شوێنەکان بە موڵکی گەل بزانێت وپارێزراوبن.

 

  • 1