ئەمە بڵاوبكەوە
FaceBook  Twitter  

لەمێژووی نوێ وهاوچەرخی باشووری کوردستاندا،لە میانی بەرخودان وڕاپەڕین وشۆڕشەکاندا،لە پێناوی داکۆکی کردن لە خاکی نیشتمان وئازادی وسەرفرازیدا،هەمیشە ڕێژەیەکی زۆری خەڵکی کوردستان بە هەمو پێکهاتەکانییەوە،دڵسۆزی و ئازایەتی وگیانفیداییان سەلماندووە،لە پێناوی ئامانجە پیرۆزەکاندا،دەریایەک خوێنییان بەخشیوە،چەندین داستانی پڕ لە قارەمانێتی تۆمارکراوە.. بەڵام بەداخەوە زۆر جار ئەگەر نەڵێم هەمو جار،سەرکردەو فەرمانڕەواکان، لە کۆن؛میرو شێخ و بەگە دەرەبەگەکان..لە سەدەی بیستەمینیش تاکو ئێستا ؛فەرماندەوکاربەدەست وبەرپرسە باڵاکانی هێزە دەسەڵاتدارەکان، کە بەداخەوە هەمان خواست وئارەزووی میرەکان دەیانبزوێنێ، هەمیشە لە سەرکردایەتی و دبلۆماسییەت ودانوستانەکان وئیدارەداندا زیاتر شکستخواردوبوون،دووربین نەبوون،بەرژەوەندی میللەت و پاراستنی سەروەریان نەخستۆتە سەرووی هەموو بەرژەوەندییەکانەوە، خاوەن ئیرادەی سەربەخۆ نەبوون،زیاتر ئیرادەی خۆیان خستۆتە بن دەستی دەوڵەتە زلهێزە باڵا دەستەکان،لە پێشدا بەریتانیا و لەم سەردەمەش وڵاتە یەکگرتووەکانی ئەمریکا، سەرباری دەوڵەتە هەرێمایەتییەکانی دژ بە مەسەلەی ڕەوای کورد، بە تایبەتی هەردو ڕژێمی تورکیاو ئێران..

باڵادەست و فەرمانڕەواکانی بزووتنەوەی کوردلە سەدەی بیستەم و کاربەدەستانی ئەم سەدەیەی هەرێمی کوردستان،لە جیاتی ئەوەی یەکێتی ڕیزەکانی گەل بپارێزن،هێزی پێشمەرگەی کوردستان یەکبخەن و بە هێزی بکەن،بوونەتە پاڵەوانی شەڕو ململانێی ناڕەوای ناوخۆ، هێزەکانی ناوخۆیان وەکو ئامرازێک لە پێناوی مانەوەی خۆیان بەکار هێناوەو بەکاردەهێنن،سەودایان بە خەباتی پێشمەرگەو خوێنی شەهیدان کردووە، هیچ ‌پلانێکیان نەبووە بۆ ئابووری کوردستان،لە رێگای گەندەڵی وبەهەدەردان وکۆنترۆڵکردنی سامانی گشتی توێژێک بوونەتە سەرمایەدارو ملیاردێرو زۆرینەی خەڵکیش هەژارو بێ کاروکاسبی وبێ دامەزراندن وبێ مووچەن،ئەوانەی خاوەنی مووچەی یاسایی خۆشیانن دەستدرێژی دەکرێتە سەر مووچەکانیان..

ئەم فەرمانڕەواوکاربەدەستانەی باشوری کوردستان بۆ چەواشەکردنی خەڵک و ڕای گشتی وبەردەوام مانەوەیان لە دەسەڵاتدا، چەندین تۆڕی راگەیاندنی پێشکەوتوویان خستۆتە گەڕ،کە هەمووی بە پارەو داهاتی ئەم هەرێمە دامەزراون و بەڕێوە دەچن..هەروەها بۆ کۆیلەکردن و کوشتنی ئیرادەی سەربەخۆی خەڵک ودەرچوون لە هەڵبژاردنەکاندا بەدەیان و سەدان هەزار بندیواریان دامەزراندووە، کە لە ئەنجامدا بوودجە خۆی لەبەریان ناگرێت و مووچەخۆرانی شایستە باجەکەی دەدەن..ئەم بارودۆخە بۆتە هۆی ئەوەی کە خەڵکێکی زۆر بە تایبەتی گەنجە بێکارو دانەمەزراوەکان و بە دەیان هەزار لە خوێندکارانی زانکۆکان بە هەژاری و هیوابڕاوی درێژە بە خوێندن بدەن..هەموو ئەو خەڵکە داماوە ژیانی سیاسی و حزبەکانیان لەبەرچاو سووک و بێ بەها بووە، تەنانەت ڕێژەیەکی زۆریان وایان لێهاتووە قەنەعەتیان بە گۆڕانکاری و کۆشش و خەبات نەمینێت. بێگومان هیچ شتێکیش لەوە ناخۆشترو مەترسیدارتر نییە،ئیرادەو هیوا لای خەڵک تیرۆر بکرێت و خەڵک بێ هیوا بژیت..

بەر لە کۆتاییدا دەڵێم؛ گۆڕانکاری وتێپەڕاندنی ئەم بارودۆخە نالەبارە،ئەم قۆناغە، پێویستی بە هەوڵ وکۆششی بەردەوامی تاکەکەسی و دەستە جەمعی دڵسۆزان هەیە، پێویستی بە بەرنامەی کاروکردەوەی هاوبەشی شۆڕشگێرانە هەیە، لە لایەن هێزەکانی ئۆپۆزسیۆن، بە هاوکاری کەسە دڵسۆزەکانی ناو هێزە دەسەڵاتدارەکان،بە پاڵپشتی هێزی پێشمەرگەی کوردستان،بە هەموان بتوانن بەرەیەکی سیاسی و جەماوەری بەهێز پێکبهێنن وئەم قۆناغە نالەبارە بەرەو ئایندەیەکی باش تێپەڕێنن..ئەگەر ئەمەش ئەنجام نەدرێت ، مێژوو سەلماندوویەتی میللەتان تا سەر ستەم قبووڵناکەن،رۆژێک دێت خەڵکی ستەمدیدەی باشووری کوردستان بە ڕووی نادادی و ستەمکاری و بێکاری و بێ مووچەیی وژیانی تاڵیان ڕادەپەڕن ولە پێناوی ژیان و کەرامەت ونیشتمان وسەرفرازیدا هەمو جۆرە قوربانییەک پێشکەش دەکەن، لە ناو جەرگەی ڕاپەڕین و تێکۆشان و بەرخودانیشدا هێزی پێشڕەوی دڵسۆزی خەڵک و وڵات سەرهەڵدەدات و ئەوەی چاوەڕوان نەدەکرا روودەدات..

مەغدید حەجی

رواندز ۲٥-٦-۲۰۲۰

  • 1