ئەمە بڵاوبكەوە
FaceBook  Twitter  

گەر ویستت کەسێک هەڵسەنگێنی، 

جگە لە ڕابردووی دەبێ ئاگاداری ئێستاشی بی ..!

ڕابردوو کافی نیە بۆ هەڵسەنگاندنی کادرێک یان قیادەیەک ، چونکە کەسانێک لە ڕابردوو پێشمەرگە یان زیندانی بووە کەچی ئێستا بازرگانەو ڕابردووی گۆڕیوەتەوە بە پارەو پۆست ...!

یان کەسێکی چەپ و شۆڕشگێڕ بووە کەچی ئێستا برجوازیەکی مشەخۆرە لەسەر خەڵک و حزب ..!

تاکوو ئێمە ،

ئەو کەسانە بە ڕابردوویانەوە پیرۆز بکەین ، دوور لە ناسین و هەڵسەنگاندنی ئەمڕۆیان لە ڕووی بەدەستهێنانی ئیمتیازات و تەوزیفکردنی حزب بۆ بەرژەوەندی خۆیان و کەسوکاریان و پەیداکردنی پارەو دابینکردنی ژیانی ڕاقی بۆخۆیان ،

لە بازنەی کۆیلایەتیدا دەخولێینەوەو دەبینە مایەی گەشە نەکردنی حزب و کۆمەڵگاش ...!

کۆیلەکان تا فامیان نەکردوو عەقڵ و هۆشیان بەکارنەهێنا ، وابیریان دەکردەوە کە خاوەنەکانیان پیرۆز و گەورەو بێ وێنەن و دەبێ ئیتاعە بکرێن و قسە کردن لە قسەو بڕیارەکانیان قسە کردنە لە قەدەرو چارەنووس و ئەمە دەچێتە خانەی کوفر و بێ ڕێزییەوە بە خواوەندەکان..!

تەنانەت کۆیلە بوونی خۆیان بەقەدەروو چارەنووسی ئیلاهی دەزانی و درێژەیان بە ژیانی بندەستی خۆیان دەدا ...!

کاتێک (سپارتاکۆس ) ی کۆیلەی ڕەش پێست شۆڕشی هەڵگیرساندوو وتی نەخێر کەس پیرۆز نیە و مرۆڤ بەگشتی و بۆ نەهێشتنی چەوسانەوەو دابینکردنی ماف و وەک یەکی پیرۆزە ،

لەوێوە ململانێکان دەستی پێکردو فۆڕمی ژیان و تێکۆشان گۆڕا...!

مەبەستی ئەم دووسێ دێڕەم ئەوەیە ، 

کاتێ 

(مرۆڤ بەنرخترین سەرمایە ) بێ و لەهەموو بونەوەرەکانی دی زیرەکترو بەئاگاتر بێ ،

نەنگیە ئێستاو لەم سەردەمی پێشکەوتنەدا ، خۆی پاساو بۆ کۆیلەبوونی خۆی بێنێتەوەو کەسانێک بە پیرۆز تەماشا بکات ،لەبەر ئەوەی لە ڕابردوو خەباتی کردوە ..!

هەڵبەتە ڕێزو حورمەتی بێپایانم بۆ تێکۆشەرانی ڕاستەقینە هەیە کە بەبێ ڕەچاوکردنی هیچ بەرژەوەندیەکی شەخسی و تەنها بۆ ڕزگاری خاک و نەتەوە ململانێی چینایەتی تێکوشاون و ئێستاش بۆ حزب و گەل ئامادەی قوربانیدانن، مەبەستی نووسینەکەم دیارە و ڕووی قسەم ئاڕاستەی ئەوانەیە کە ڕابردوو ئێستایان عاسمان و ڕێسمانە .

زۆرن لەمێژوودا ئەوانەی دیموکرات و خۆنەویست بوون و ئێستاش پێچەوانەن و هەندێکیشیان بە ڕێگای شۆڕش و پاڵپشتی خەڵک گەیشتنە دەسەڵات و دواتر هەر خەڵک شاربەدەری کردن ...!

هەرکاتێ کادرو قیادە لە ناو حزب پیرۆز کرا بزانن خەلەلێکی قوڵی ئیدارەو غیابێکی ترسناکی فکر هەیە ...!

هەر حزبێکیش بە ماوەیەکی دوور و درێژ بەرهەمی خەبات و تێکۆشانی بەدیار نەکەوت ، 

بزانن کێشەیەک هەیە جا ئیتر لە فکرە یان مکانیزمی تێکۆشانە یانیش بوونی کەسانی ناشایستەیە لە قیادە کە توانای خوێندنەوەو داڕشتنی بەرنامەو میکانیزمی گونجاوو سەردەمیانەیان نیە بۆ قۆناغەکە و چارەسەری ...!

سەردەم سەردەمی پێشکەوتنی تەکنەلۆجیاو داهێنانە ، کادری ئێستا دەبێ ڕۆشنبیریەکی فرە ڕەهەندی هەبێ نەک هەر لە ڕابردوودا بژێ و وەک مردوو تەڵقین دان شتەکان بۆ ئەندامان بگێڕێتەوەو کۆبوونەوە بکات ...!

بەکوردی و بەکورتی گەر لەسەر ڕابردوو بژین و کەمووکوڕیەکانی ئەمڕۆی کادران و بەشێک لە قیادە بکەینە پاساو بۆ خەباتی ڕابردوویان و نەیانخەینە بەر مەحەکی لێپێچینەوە و چەمکی ڕەخنەو ڕەخنە لەخۆگرتن ، 

کەواتە دەبێ هەزار ڕەحمەت بۆ ( هیتلەر و مۆسۆلۆنی و پۆلپۆت و ستالین و .....تاد ) بنێرین ....!

(ماندێلا و گیڤارا و غاندی و هۆشیمنە .....تاد ) بۆچی بە گەورەیی مانەوەو ناویان چوە مێژوەوە چونکە قبوڵیان نەکرد کەسانی دەورووبەریان پیرۆزیان بکەن و درێژەشیان بە تێکۆشان دا و شەقیان لە دەسکەوت و بەرژەوەندی شەخسی هەڵدا ، تا کۆتایی تەمەنیان بە شکۆمەندی مانەوە ...!

بەختیار کریم حەساری

27/6/2020

  • 1