ئەمە بڵاوبكەوە
FaceBook  Twitter  

ئیسپاتتان کرد کە ئێوە حکومەتێکن تەنها ئازان بۆ گیان فەقیر و هەژاران و باج وەرگرتن لێیان و تەخوین کردنیان و تۆمەتبار کردنیان بە بیانوی جیا جیا و ناڕەوا...!

هەر حکومەت و دەسەڵاتێک پشت بکاتە هەژاران و فەرامۆشیان بکات عاقیبەت خێر نابێ ..!

پرسیار ئەوەیە :

چەند مانگە ژیانی ئەم خەڵکە ڕاگیراوەو خەڵک لە کاروو کاسبی بوەو لەماڵەوە ئاخێنراوە بە بیانوی بوونی نەخۆشی و ڤایرۆسی کۆڤید نۆزدە ،

خەڵکانێکی زۆر لە مووچەخۆرو دوکاندار و دەسگێڕو کرێکاری ڕۆژانەکارو جووتیاران و تەواوی چین توێژەکان بەم هۆیەوە زەرەرمەند بوونە ، 

بەبێ ئەوەی هیچ ئەرک و ئیلتیزاماتێکی سەرشانتان بەرانبەر بەهاوڵاتیان و مافەکانیان جێ بەجێ بکەن و یەک فلس قەرەبووی بکەنەوە و بەردەوام لە ڕێگای کاربەدەستانتانەوەش ڕاگەیاندراوو ڕێنمایی بڵاو دەکەنەوەو جاروبار هەڕەشەش لەوانە دەکەن کە کردبوونەوە دەکەن و ڕێنمایی تەندروستی دەشکێنن،

یاخود لێرەو لەوێ یان لە تۆڕە کۆمەڵایەتیەکان بڵێن ئەم ڤایرۆس و نەخۆشیە درۆیە ،

ئەوا سزای یاسایی قورسی دەدەن گوایە ئامانجتان پارێزگاری کردنە لە ڕۆح و ژیانی هاونیشتیمانیان ، 

تا ئێرە سەرباری کۆمەڵێ سەرنج و تێبینم لەسەر ڕێنمایی و هەڵنەستان بە جێ بەجێکردنی ئەرکی سەرشانتان وەکو حکومەتێکی خەمخۆر و پڕۆفیشناڵ ، 

هەموویم پێ قبوڵە ...!

بڵام ئەم حەشاماتە چیە ؟ 

چی لێ دەخوێنرێتەوە ؟

تۆ بڵێی ڤایرۆسەکە لەمانە بترسێ و نەوێرێ توخنیان کەوێ ؟؟

من بڵێم کرۆنا درۆیە سزام دەدەی چونکە بێ پشت و پەنام ، ناشڵێم نیە چونکە نامەوێ ببمە هۆی کێشە بۆ هاوڵاتیان ...!

بەڵام حەز ئەکەم بزانی ئەی حکومەت ، ئەم دەروێشانە و بەم ئاپۆڕایەوەو بەم بێ منەتیەوە هاتن و چی ڕیستان هەبوو هەموویان کردنەوە بەخوری و ئەوەی حساب بێ بۆی نەکردن ...!

فەرموو ، فەرموو دەی کێ دەستی گرتون ، دوو شەقیش لەمانە هەڵدەن وەک لە مامۆستای داماوی بێ نازی هەناسەساردتان هەڵداو کەرامەتیتان شکاند ...!؟

کێ دەستی گرتوون ...؟!

دە پێیان بڵێن ئێوە هی وڵاتێکی ترن بەچ حەقێک هاتوون و سەروەریمان پێشێل دەکەن و چەند مانگە هاوڵاتی خۆمانمان لەماڵەوە بەند کردووە کەچی ئێوە بێ گوێ دانە یاسا و سەروەریەکانی حکومەت ، وا بێڕیزیمان پێ دەکەن ...!؟

خۆ لە یاسای جەنگەڵیش شەق تێهەڵدان و سزادان بۆ ئەوانەیە کە ملهووڕن و یاسا دەشکێنن و تێکدەرن و ....تاد ،

ئەگەر شەق تێ هەڵدان شەرعیەتیشی هەبێ کە نیەتی..!دەبێ لەمانە هەڵ بدرێ نەک لە مامۆستا...!؟

لەکۆتاییدا دەڵێین ئێمە دڵسۆزی ئەم گەل و خاکەین جەرگمان بۆی دێشێ ، هانی خەڵکی نادەین بۆ یاسا شکێنی و کاری ناڕەوا و ناڵێین پەتای کرۆنا نیە ، نەک لە ترسی سزا بەڵکو بۆ پاراستنی شکۆی هاوڵاتیان ...!

بڵام ئەم دەروێشە ڕیشن و پرچ درێژ و تەور بەدەستانە هەیبەتتانیان شکاندو بە فعل و پراکتیک و لەسەر شەقامەکان پێیان وتن ،

بەڵێ کرۆنا نیە و پەتا نیە و ئەوەی ئێوە بەخەڵکی دەڵێن هەمووی سیناریۆو ناڕاستەو خەڵک چەواشه دەکەن بۆ هەندێ ئامانجی خۆتان ...!

ئێوەش تەنهاو تنها ڕۆڵی متفرج و تەماشاکەرتان پێ بڕا ، وەسەلام ....!!

بەختیار کریم حەساری

11/7/2020

  • 1