ئەمە بڵاوبكەوە
FaceBook  Twitter  

شەهید ئەحمەد خدر پیرداود لە ساڵی 1938 لەشاری هەولێر لەخێزانێكی زەحمەتكێش و نیشتمانپەروەر لەدایك بووە، هەرزوو برایەكانی و شەهید خۆیشی لەبەر هەژاری و نەداری كەوتونەرتە كاركردن لەپێناوی پەیداكردن و دابین كردنی بژێوی ژیانی رۆژانەیان، شەهید ئەحمەد خدر خوێندنی سەرەتایی و ناوەندی لەشاری هەولێر تەواو دەكات و، دەچێتە ریزی سوپاوەو پلەی جێگری ئەفسەر(نائب الچابگ)ی پێدەدرێت و، لەشاری بەغدا لەتەك ئەركی سەربازی درێژە بە خوێندنی شەوانە دەدات و قۆناغی دواناوەندی تەواو دەكات.

شەهید ئەحمەد هەر لەسەرەتای لاوێتیەوە كاریگەری بیروباوەڕی حزبی شیوعی عێراقی بەسەرەوە دەبێت و ، لەدوای شۆرشی 14ی تەمووزی 1958 دەپاڵێورێت بۆ ئەندامێتی حزب و دوای تەواوكردنی ماوەی پاڵاوتنی بۆ ئەندامێتی حزب و شەرەفی ئەندامێتی حزب بەدەستدەهێنێ و وەكو ئەندام و كادیرێكی لێهاتووی حزب دەكەوێتە كۆڕی خەبات و تێكۆشانەوە لەپێناوی ئازادی و سەرفرازی گەلەكەی و دوارۆژێكی بەختەوەری بۆ رەنجدەرانی گەلەكەی.

شەهید ئەحمەد لەریزی سوپای عێراق بەبڕوای پۆڵاینەوە لەراپەڕاندنی ئەركی حزبی بەردەوام دەبێت و، دەبێتە جێگای متمانەی هاوڕێیانی، كاتێك لەساڵی 1963بەعسیە رەفتار فاشیەكان لەرێگای كودەتایەكی گوماناوییەوە جلەوی فەرمانڕەوایەتیان لەعێراق وەرگرت، عێراق و كوردستانیان وێرانكرد و، بەهەزاران شیوعی دیموكراتخوازو نیشتمانپەروەریان خستە بەندیخانەكانەوەو بەهەزارانیش دەربەدەری هەندەران بوون، ژمارەیەكی زۆریش لەتێكۆشەران لەرۆڵەكانی عێراق و كوردستان شەهید و بێسەروشوێن كران.

لەكوردستانیش شەرێكی شێتانەو خوێناوی لەدژی رۆڵەكانی گەلەكەمان و شۆڕشی ئەیلول هەڵگیرسێندراو شارو گوندی كوردستان وێران دەكران و جوتیارانی ووڵاتەكەم دەربەدەری شاران دەبوون و، نەبوونی و بێكاری و نەخۆشی و برسیەتی بەرۆكی رۆڵەكانی گەلەكەمانی گرتبۆوە.

لەم بارو دۆخە خوێناوی و كوشت و بڕو راوەدونانی تێكۆشەران بەتایبەتی ئەندام و كادیرو سەركردەكانی حزبی شیوعی عێراق لەبەر رۆشنایی بەیاننامەی ژمارە 13 ی حاكمی عەسكەری عێراق بەبێ دادگایی و لێپێچینەوە زیندەبەچاڵ دەكران.

لەم بارو دۆخە پڕ ئێش و ئازارو نەگونجاوو نالەبارە بەتایبەتی بۆ تێكۆشەران و ئەندام و كادیرو لاینگرانی حزبی شیوعی عێراق كە پێیدا رەتدەبوون، ژماریەك لەتێكۆشەرانی حزب لەریزی سوپای عێراق بەسەركردایەتی شەهید (حسن سریع) پلانی راپەڕینی سەربازی لەسەربازگەی الرشید دادەڕێژن و ئەرك دابەش دەكەن، سەركردەكان رۆژی 3ی تەمووزی 1963 دیاریدەكەن وەكو رۆژی راپەڕین و لەعێراق و وەرگرتنی، حەرەسی قەومی و حزبی بەعسی و دامودەزگاكانی سەراوژێر بكەن و، گەلی عێراق و كوردستان رزگار بكەن.

یەكێك لەسەركردەكانی راپەڕینی 3ی تەمووزی 1963 شەهید (ئەحمەد خدر) بووە، ئەركی گرنگی لەئەستۆبووە، ئازایانە لەگەڵ هاوڕێكانی لەكات و شوێنی دیاریكراو لەسەربازگەی الرشید ئامادەدەبن، راپەڕین رادەگەیەندرێ و هەندێ شوێنی سەربازگەی الرشید هەندێ دەستی بەسەردا دەگیرێ و توانیان حازم جەواد كە وەزیری دەوڵەت بوو بۆ كاروباری سەرۆكایەتی كۆمارو (تالیب شەبیب) وەزیری دەرەوەی عێراق بوو دەستگیر بكەن، تێكۆشەران نەیان كوشتبوون بۆ ئەوەی دوای سەركەوتنی راپەڕین دادگایان بكەن، بەڵام بەداخەوە راپەڕین سەرنەكەوت و شۆڕشگێڕان ژمارەیەكی زۆریان دەسگیركران و ژمارەیەكیش شەهیدو بێ سەروشوێن كران.

(حازم جەواد و تالیب شەبیب) كە تێكۆشەران لەكاتی دەستگیركردنیان نەیان كوشتبوون، لەدادگایەكی سەربازی و سەرپێی بوونە شاهێد لەدژی تێكۆشەران و، ئەوان شەهید(مۆزان عبدالسادە) كە قوتابیەكی تەمەن 16 ساڵان بوو دەستنیشانیان كردو، گەواهیان لەدژی دابوو، كە شەهید (مۆزان عبدالسادە) لەگرتنی ئەوان بەشداری كردووە، تەمەنی شەهید مۆزان عبدالسادە لە 16 ساڵیەوە كرایە 18 ساڵ و لەرۆژی 31/7/1963 لەسێدارە درا.

شەهید ئەحمەد خدر لەرۆژی 3ی تەمووزی 1963لەسەربازگەی الرشید دەستگیر دەكرێت و ، دوای ئەشكەنجەو ئازارێكی زۆر رەوانەی دادگایەكی سەرپێی سەربازی دەكرێت و دادگایی دەكرێت و شەهید لە وەسیەتنامەك بۆ براكانی و هاوسەرەكەی نوسیویەو بەدەستی هاوڕێ (ئیسماعیل) ی برای دەگات و تێدا هاتووە ( لەكاتی دادگاییكردندا زانیان من كوردم، پاش ئەوەی زۆر دەنگم هەڵبڕی و بەناوی حزبەوە دورشمم دەگووت، نارەزاییم دەردەبڕی، سەرۆكی دادگا زۆر لێم توورەبوو، وە گوتی حوكمدرا بە ئیعدام منیش گوتم مردن نامتیرسێنێ، چونكە من لەپێناوی نیشتمان و گەل و بەختەوەری ژیانیاندا گیانم بەخت كردووە، ئەگەر ئەم جارە راپەڕین سەری نەگرت، بەبوونی هاوڕێیانی ترم رۆژێك دێت سەربگرێ مەحاڵە.

ئەم شەهیدە نەمرە چوار برای هەبووە بەناوەكانی ( شێخ جەبار) چێشتخانەو كەبابخانەیەكی گەورەی لەشاری موسڵ هەبووە، پیرداود كاسبكار بوو، هاوڕێ ئیسماعیل كادیرێكی ناسراو بوو لەشاری موسڵ و كاری كەبابچی بوو، چەند جارلە لەلایەن دامودەزگای ئەمنی موسڵ دەستگیركراوەو ئێستاكە لە ئەڵمانیا دەژی، هاوڕێ كەمال ئەویش كەبابچی بوو لە موسڵ گەلێك ئازارو ئەشكەنجەو بەندیخانەی دیوەو لەژیانەو لەشاری هەولێردەژیت. لەرۆژی 11/11/1963 بەر لە روخانی رژێمی بەعس بە 7 رۆژ هاوڕێ ئەحمەد خدر لەسێدارە دراوە، هاوڕێ (ئیسماعیل) ی برای تەرمەكەی لە بەغداوە بۆ شاری هەولێر هێنایەوە و لە(گۆڕستانی شێخ ئۆمەر) بە خاكی كوردستانی سپارد.

لەدوای ئەوەی ( ئەحمەد خدر پیرداود) لەرۆژی 11/11/1963 شەهید كرا، (فەهد) ی كوڕی لەدایك بوو،ئێستاكە كاكە فەهد لەشاری هەولێر دەژی و جێگای رێزو خۆشەویستی هاوڕێیانە...

نەمری و سەربەرزی بۆ شەهیدانی راپەڕینی 3ی تەمووزی 1963ی سەربازگەی الرشید .

تێبینی: ناوەڕۆكی وەسیەتنامەكەم لە هاوڕێ ئیسماعیل وەرگرتووە. 

  • 1