ئەمە بڵاوبكەوە
FaceBook  Twitter  

 

پشكا (1 – 2)

ئیسال زێدەتر هەر سالەكێ‌ توركیا هەرێما كوردستانێ‌ كریە گۆرەپانا هێرەشێن خوە یێن لەشكەری، لڤێ‌ داویێ‌ مودێرنترین تەكنەلۆژیا جەنگی د شەرێ‌ خوە دە بكارتینیت، رۆژ ب رۆژ كریارێن وێ‌ یێن میلیتاری پتر نێزی دەڤەر و جهێن سڤیل دبن، سرۆشتێ‌ چالاكیێن وێ‌ یێن لەشكەری خوەدیێن سیمایەكێ‌ سیخوڕی و هەوالگیرینە، هەر جار ئوتومبێلەكا سڤیل دكەنە ئارمانج و د ئەنجام داژی گەلەك كەسێن بێسوچ دبنە قوربانی، بەردەوامیا ئەڤان هێرەشان ترسەك مەزن لپاش خوە هێلایە، خەلك ئێدی بهیچ رەنگەكێ‌ هەست ب هندێ‌ ناكەت، كو گیانێ‌ وان لڤێ‌ هەرێمێ‌ یێ‌ پاراستی بیت، د بەرامبەردا رایەدارێن حكومەتا هەرێمێ‌ دڤی واری دە دبێدەنگن و نە خوەدیێن چ هەلویستێن ب واتەنە ..! 

پڕانیا دەڤەرێن هەرێما كوردستانێ‌ د سەری دە دەڤەرا بەهدینان، هەژمارەك مەزن یا هەڤوەلاتیان لسەر گوند و دێهاتێن خوە بوونە نێچیرا بالەفرێن توركیا داگیركەر، د ئەنجام دە دەهان شەهید و بریندار ب ئاوایەك فەرمی ژ ئالیێ‌ دەزگەهێن حكومەتێ‌ ڤە هاتینە توماركرن، دیسان د هن هێلێن ئابوری و ئەولەهیێ‌ دە زیانێن هەری كاریگەر ب خەلكێ‌ دەڤەرێ‌ كەفتینە، لجها ئیدانەكرن و شەرمزاركرنا ئەوان زێدەگاڤیێن دروندانە یێن توركێن تورانی، حكومەتا هەرێمێ‌ ب رەنگەكێ‌ شەرمنوكانە هێجەت و پاساۆ رێزكرینە و بویەر ب ئاوایەكێ‌ نورمال د میدیایێن خوە دە دانە پاڕڤەكرن، بەردەوامیا ئەڤێ‌ رەۆشێ‌ نرخێن هەبوونا هەرێمێ‌ گەلەك كرێت ددەنە نیشادان.

سەرەرای ئەڤا هەژی دیاردا مەزن نمایشكرنا دامەزراوێن حزبی و بچویك نمایشكرنا دامەزراوێن حكومی ب رەنگەكێ‌ موبەرمەج یا د حالەتێن گەشەكرنێ‌ دە، گەلەك جاران دەنگێ‌ نەرحەتی و نەرازیبوونێن تەخ و توێژێن جڤاكێ‌ ل شەقامان ب ئاوایەك (دیموكراتی، مەدەنی، ئاشتیخوازانە) بلند دبیت، ڕایەدارێن حكومەتێ‌ دویری بۆیەرانە و نەشێن رۆلێ‌ خوە بگێرن و ببنە موخاتب، د گورەپانێ‌ دە تنێ‌ بەهلەوانێن حزبێن سیاسی هەنە، بەرپڕسێن حزبی وەكە خوە بویەران ئەنالیزەدكەن و سیاسەتا ترس و گەفخوازیێ‌ پەیرەۆدكەن، ئەڤا هەژی نە لوژیكا گرتنەبەرا رێكا چارەسەریا پرسگرێكانە د كومەلگەهێ‌ دە، بەردەوامیا ئەڤی جورێ‌ سەرەدەریێ‌ دێ‌ دەستكەفتێن گەلێ‌ مە ئێخیتە بن مەترسیێن هەری مەزن ..! 

توركیا وەكە (فوبیا) گەفەیە لسەر دەڤەرێ‌:

هۆڤایەتیا توركیا گەهشتیە ئاستێن هەری بلند، شێوێن كریارێن وێ‌ یێن دروندانە هەموو سنورێن دەرباسكرین، ئێدی نە تەنێ‌ گەفەیە لسەر هن (گەل، دەڤەر، وەلاتێن) دەستنیشانكری بەلكو لگور گەلەك نرخاندنان گەفەیە لسەر هەموو مرۆڤایەتیێ‌، هەلبەت پشتی ئنسیاتیفا زهنیەتا راسیستا ئیخوانچی یا ئەردوغانی رەنگڤەدانا خوە لسەر هەموو بوارێن كومەلگەهێ‌ پێكئینای، ب پراكتیك گوهارتن چێكرن د سیستەمێ‌ رێڤەبرنێ‌ دە، ئێدی رێكا وی هەتا رادەكێ‌ هاتە ڤەكرن تشتێ‌ بخوازیت د زوربەیا مژاران دە دەرفەت هەیە ئەنجامدەتن.

توركیا نها زێدە وەكە وەلاتەكێ‌ زوردار و ستەمكار دهێتە ناسكرن، باوەریا وێ‌ یا ڕەها تنێ‌ ب بكارئینانا (هێزێ‌، توندوتیژیێ‌، فوبیایێ‌) هەیە، د هندرێ‌ وێدە دەهان پرسگرێكێن ناڤخوەیی هەنە، چ جاران هەولێن چارەسەركرنا وان ب رێكێن دایەلۆك و دانوستاندنێن ئاشتیانە نەداینە پراكتیزەكرن، دنیڤبەرا وان و ستراتیژیەتا دایەلۆكێ‌ بیاڤەكێ‌ بەرفرەه دهێتە دیتن، ئەگەر جارەكێ‌ لژێر هن فشاران ژی دەرگەهێ‌ دانوستاندنان ڤەكری دابیتە نیشادان، ب زەلالی ئنیەتێن وێ‌ یێن دویر بوونە ژ چارەسەریێن راستەقینە، هەر تم خواستیە سیاسەتا خاپاندنێ‌ بدەتە پەیڕەوكرن، لەوما ژی هەموو كارێن وێ‌ دبن چاڤدێریا دامەزراوێن وێ‌ یێن هەوالگیری (میت) ێ‌ دهێنە برێڤەبرن.

هەر توركەك مینا ئەردوغان خەونان ب ڤەگەراندنا هەیبەتا ئمبراتوریەتا ئوسمانیڤە دبینیت، سیاسەتا خوە بەرفرەهكرنێ‌ (التوسعیە) سیاسەتەكا پەژراندی یە لجەم تاكێن كومەلگەها توركیا، دەسهەلاتا ئەكەپێ‌ دەما ستراتیژیەتا خوەبەرفرەهكرنێ‌ (التوسعیە) دكەتە كوكا تێكوشانا خوە یا سیاسی، گەلێ‌ تورك ب هەموو تەخ و توێژێن خوەڤە هەست بهندێ‌ دكەن كو یا د دلێ‌ وان دە یا دهێتە گوتن و ب كریار كار یێل سەر دهێتەكرن.

سیاسەتەكا مەترسیدار دهێتە مەشاندن، لڤێ‌ داویێ‌ لڤینێن توركیا لهەر درێ‌ كەڤتنە وارێن پراكتیكێ‌، ئێدی هەر جه ئێخستیە بەر گەفان، ل هن جهان ژی تراژیدی پێكئینان، رایەدارێن توركیا هەر جار دبێژن مە (اكتفا‌و ژاتی) هەیە ب چەك و تەقەمەنیا لەشكەری، واتە لهەر درێ‌ ئەو دكارن ب دژواری بومبە بارانكەن و گرفتێن وان دڤێ‌ دەربارێ‌ دە نینە، توركیا لهەر جهەكێ‌ شیا ببیتە خوەدی هەبوون، مەبەستێن وێ‌ یێن سەرەكی تنێ‌ داگیكرن و خوە سەپاندنە ..! ئەڤە ناڤەرۆك و جەوهەرێ‌ سیاسەتا دەسهەلادارێن توركیا یە، بلا هەر كەس و ئالی بزانن دۆستایەتیا دگەل ئەڤی جورێ‌ سیاسەتێ‌ داویا وێ‌ ڤەچڕین و پەشێمانیە.

د نێرینا پەكەكێ‌ دە تایبەتمەندی یا بەشان لەیستۆكەك ڤالایە:

تایبەتمەندی یا بەشان هەبوونا وێ‌ ناهێتە ئینكاركرن، هەر چەندە ئەڤە نە لگور حەزا كوردستانیانە، لێ‌ دورهێلەكە د درێژاهیا سالێن دابەشبوونێ‌ دا هاتیە سەپاندن، ل هەر بەشەكێ‌ كوردستانێ‌ تەڤگەرێن وێ‌ یێن رزگاریخواز لبەر رۆشنایا ئەوێ‌ تایبەتمەندیێ‌ خوە دناڤا جڤاكێ‌ دە دایە ناسكرن، هیچ تاكەكێ‌ كورد نینە خەونان ب دەولەتبوونێ‌ ڤە نەبینیت، مەبەست ل دەولەتبوونێ‌ ستاتویا كوردستانا مەزنە، تەڤگەرێن كوردستانی ژی هەلگرێن هەمان خەونێن ڤەشارتینە، ژبەركو رەۆش ژبوی ئەوان خەونان نەیا گونجایە، دەما هەلویست ژوان دهێتە خواستن، هەر هەموو ب نەچاری دبێژن: ئەم دگەل یەكپارچەیا وەینە و ئەم نە جوداخوازین ..!

هند تشت هەنە نە لگور حەزا مرۆڤینە، لێ‌ ریالیتەنە مرۆڤ نكاریت بێژیت ئەز ناخوازم ئەوان راستیان ببینم، نێرینا پەكەكێ‌ د ڤالا دەرخستنا تایبەتمەندی یا بەشان دا نێرینەك شاش و دویرە ژ لوژیكێ‌، بینینا تایبەتمەندیێ‌ ناهێت واتەیا دانپێدانا ئەوان سنورێن دەستكرد ئەڤێن داگیركەرێن كوردستانێ‌ د پرۆسەیا دابەشكرنێ‌ دە دایە سەپاندن، گرنگە ئەڤ راستیە بهێتە پەژراندن و وەكە پرەنسیب رێز ل تایبەتمەندی یا هەر بەشەكێ‌ بهێتەگرن.

هەبوونا پەكەكێ‌ ل چیایێن كوردستانێ‌ هەبوونەكا نورمالە، لێ‌ نێزیكبوونا بنگەهێن وان یێن لەشكەری ولڤینێن گرۆپێن گەریلایان ل دەڤەرێن سڤیلنشین پرۆسەیەكا زیان بەخشە، ئارمانجگرتنا هن ئوتومبێلێن گومان لسەر ل دەڤەرێن سڤیل ژ ئالیێ‌ هێزێن ئەسمانی یێن دەولەتا داگیركەرا تورك ڤە، ئەڤ بویەرە بوونە مانشێن میدیایی یێن هەری مەزن و خوەدی باندۆر، د هەر واری دە ئەڤ چەندە بوونە مژارێن گەنگەشێ‌ و لسەر راوەستیانێ‌، بەردەوامیا ئەڤان جورە بۆیەران دێ‌ بەلانسا هاوكێشێ‌ ل دەڤەرێ‌ گوهریت و دێ‌ هەرێمێ‌ راكێشیتە دبن رەۆشەكا مەترسیدار دە، رەنگە ئێدی پڕس زێدە قەبارێ‌ وێ‌ بەرفرەه ببیت و گەلەك كارێكتەرێن دن تێكەلی ئەڤێ‌ پڕسگرێكێ‌ ببن، پاشان هەم هەرێما كوردستانێ‌ هەم ژی پەكەكە بخوە د ئەنجامێن داویێ‌ دە دێ‌ راستی گەفێن لێدان و ژناڤچوونێ‌ بن، ئەڤەژی د بەرژوەندا چ كەس و چ ئالیەكێ‌ دە نابیت.

پەكەكە وەكە تەڤگەرەكا مەزن یا كوردستانی، گەرەكە گەلەك ب هویری ئەڤان مژاران ئەنالیزەكەت، ئەوێ‌ راستیێ‌ باش بزانیت، كو هەبوونا بنگەه و بارەگایێن وێ‌ و لڤینێن گرۆپێن گەریلایان ب رێكێن (پیادە و ئوتومبێلان) ل نیڤا رۆژێ‌ و ب رەنگەكێ‌ ئاشكرا و بەرچاڤ ل دەڤەر و جهێن سڤیلنشین، پڕسەكا زێدە مەترسیدارە، نەخواندنا وێ‌ دڤێ‌ دەربارێ‌ دە، ئەڤ چەند خالە دهێنە دیتن:

◦ خوینا گەریلان نە ئەو قاس ئەرزانە، پەكەكە باش دزانیت هەتا گەریلایەكێ‌ د هێلا لەشكەری و سیاسی دە ئامادەدكەت دەمێن گەلەك درێژ ژێرا دڤێن، لداویێ‌ ژی ب ئاسانی بكەتە ئارمانجا بالەفرێن دەولەتا تورك، نە لخوەزڤرینا وان دڤێ‌ دەربارێ‌ دە تشتەكێ‌ سەیرە و مرۆڤی دئێخیتە بەرفكار و گومانان ..!

◦ رەۆشا ئەولەهیا دەڤەرێ‌ لبەر زێدەبوونا بۆیەرێن چالاكیێن بالەفرێن توركیا دهێتە تێكدان و ترس و لەرز دكەڤیتە ناڤ رێزێن خەلكێ‌ دەڤەرێ‌، دویر نینە هێشت بەرفرەهتر دەڤەر بهێتە چولكرن، چەند زێدەتر دەڤەر بهێتە چولكرن ژی هند دەرفەتێن داگیركرنێ‌ بو توركیا زێدەتر لێدهێن.

◦ زێدەبوونا ڤان جورە بۆیەران هەیبەتا هەرێمێ‌ دهێتە شكاندن و هەرێم بچویك دهێتە نیشاندان، وی چاخی ژ نەچاری هەرێم پێتڤی هندێ‌ دبیت پەنایێ‌ ببەتە بەر هن ئالیان مینا حكومەتا ناوەندی یا ئیراقێ‌ ب مەبەستێن دانا دەستەكێ‌، ئەگەر ئەو ئالی ژی دلەوازبن دێ‌ پەنایێ‌ بەنە بەر جیهانا عروبەتێ‌ و بڤێ‌ چەندێ‌ دێ‌ بویەر مەزن بن و دێ‌ لژێر سیادەتا ئیراقێ‌ شەرت و مەرجێن گرێدایی زهنیەتا شوڤینی لسەر گەلێ‌ مە هێنە سەپاندن.

◦ باشە گەلەك یا بزەحمەتە ئەگەر ب نەپەنی پەكەكە و هەرێم لهەڤهاتنەكا نهینی پێكبینن و بەرژوەندا دەستكەفتێن هەرێمێ‌ دانە سەر هەموو بەرژوەندەكێ‌، ئێدی كارەكێ‌ وەسا ئەنجامدەن، كو هەر ئالیەك هەست بهندێ‌ بكەت دەڤەر ببیتە بنگەها ئابوری و خوەدی ئەولەكاریەكا هەری باش، وی دەمی نە دەرفەت بو داگیركەرێن تورك دمینیت نەژی بو زهنیەتا شوڤینی یا خوەسەپینەر.

◦ دەم یێ‌ هاتی تایبەتمەندییا هەرێمێ‌ لبەرچاڤ بهێتە وەرگرتن، لهەڤهاتن ببنە ئاسانترین گاڤ د نیڤبەرا ئالیێن پەیوەندیدار دە، بلا ئێدی ئەڤ رەۆشە بەرف ئاقارەكێ‌ مەترسیدار نەچیت، ئالیێن دناڤ دەڤەرێ‌ دە خوەدی هەبوونن، خالێن هەڤبەش دناڤبەرا وان دە ناهێنە هەژمارێ‌، بێ‌ دودلی دكارن هەموو پرسگرێكان چارەسەركەن و ببنە بەرسڤا داخوازێن خەلكێ‌ دەڤەرێ‌ و هەرێمێ‌.

سرۆشتێ‌ حكمرانیا هەرێمێ‌ ستایلێ‌ ململانا حزبایەتیەكا بەرتەسكە:

پڕەنسیبێن بنگەهین یێن چاوانیا پێكئینانا حكومەتا هەرێما كوردستانێ‌ د چوارجوفێن ستایلێ‌ حزبایەتیەكا بەرتەسك دە هاتنە برێڤەبرن، دو پارتێن ناسیونالیستێن سەرەكی یێن خوە ب خوەدیێ‌ پرسگرێكا نەتەوی یا گەلێ‌ كورد دایە ناسكرن، هەر تم د ململانا هندێ‌ دە بوونە ئەو تەكڕەوانە سەركێشیا ئەڤێ‌ دوزێ‌ بكەن و خوە وەكە رێبەر و سەركێشێ‌ ڕەها یێ‌ هەرێما كوردستانێ‌ ب هەر رەنگێ‌ هەیی بدەنە قەبولكرن، ژبوی هندێ‌ ئەڤ خواستیكا وان بكەڤیتە وارێن جیبەجیكرن و پراكتیكێ‌، تێكرایا رێك و رێبازان تاقیكرن و هەر گاڤەك ژی دڤی بواری دە ب ڕەوا دایە حەسباندن. 

زهنیەتا پاوانكرنا دەسهەلاتێ‌ و كونترولكرنا هەموو جەمكێن حوكمرانیێ‌، گەلەك جاران ئەو گەهاندینە ئەوێ‌ باوەرێ‌ ل دەمێن بەرتەنگیێ‌ دە پەنایێ‌ بو نەیارێن گەلێ‌ گورد و داگیركەرێن كوردستانێ‌ ببەن، داكو هەبوون و بەردەوامیا دەسهەلاتا خوە بكارن گرەنتیكەن، لجەم وان بەرژوەندێن حزبی لسەر هەموو جورە بەرژوەندێن دنە، د ماوێن ڤان بیست و نەه سالێن حوكمرانیێ‌ دە، پازادرێن ئیران .. سەربازێن صەدام .. جەندرمێن توركیا ب فیتا ئەڤان پارتێن ناسیونالیست سەروەریا هەرێمێ‌ هاتیە هنگافتن و نرخێن نەتەوی و نیشتمانی دبن پستالێن داگیركەران دە هاتینە هەتكاندن.

دامەزراوێن نیشتمانی هەمی دبن فشارێن حزبایەتیا بەرتەسك دا یێن هاتیە تەشویهكرن، ئێدی هەر كەس دزانیت ل هەرێما كوردستانێ‌ دو هێزێن پێشمەرگە هەنە .. دوو دەزگەهێن هەوالگیریێ‌ هەنە .. دوو ئاسایش هەنە .. دوو دەزگەهێن پولیسان هەنە .. دوو هێزێن دژە تیرورێ‌ هەنە ...هتد، هەر ئێك ژڤان هێزان دبن ئینسیاتیفا پارتەكێ‌ نە و وەلائا وان وەلائەكا حزبی یە نەك یا نیشتمانی، لسەر ئەڤی بنگەهێ‌ هەرێم یا هاتیە دابەشكرن، ئایندە و پاشەرۆژا هەرێمێ‌ هەر تم یا دبن گەف و مەترسیان دە، هندی ئەڤ شێوازێ‌ حوكمرانیێ‌ یێ‌ بەردەوام بیت نە ممكنە پرۆسا دیموكراسیێ‌ و مەدەنیبوونا كومەلگەهێ‌ گاڤەكێ‌ پێشدا بچیت.

  • 1