ئەمە بڵاوبكەوە
FaceBook  Twitter  

لە ساڵی 1968- 1969 یەكێتی لاوانی دیموكراتی عێراق لقی هەولێر و یەكێتی گشتی قوتابییان لە پارێزگای هەولێر رێكخستن و چالاكی و پەیوەندی فراوانیان لەگەڵ لاوانی شارو شارۆچەكانی كوردستان دروست كرد، لە هەندێ گوندی نزیك شارە گەورەكان دۆست و لایەنگریان هەبوو، سكرتارییەتی لاوان و قوتابیان پێكهێنران و، پەیوەندییان بە ناوەندەوە ساز دابوو، لەسەر ئاستی پارێزگای هەولێر لێژنەیەكی باڵا لەنێوان یەكێتی لاوان و قوتابیان بۆ هاوكاری و چالاكی هاوبەش هەبوو، كە لە هاوڕێیان( محسین نەجار سكرتێری یەكێتی لاوان لە پارێزگای هەولێر و منعم ئەلعگار سكرتێری یەكێتی لاوان و مامۆستا قاید ئەحمەد ئەندامی سكرتارییەتی لاوان و بەندە وەكو بەرپرسی لێژنەكە پێكهاتبوو، هەفتانە لە ماڵی هاوڕێ –قاید ئەحمەد- كۆبوونەوەمان گرێدەداو، پرسی لاوان و قوتابیان دەخرایە بەر باس و ووت و وێژو لێكۆڵینەوە، رێنمایی گونجاو و پێویست ئاراستەی رێكخراوەكان دەكرا.. لە كۆبوونەوەی لێژنەی هاوبەش و هاوكاری بابەتی وەرزش خرایە بەرباس و لێكۆڵینەوە، لە ئەنجامدا لێژنە بڕیاریدا، كە پێویستە ئەندامانی یەكێتی لاوان بچنە ریزی تیپە میلییەكانی گەرەكەكان و ببنە ئەندام و بەشداری لەتیپەوە وەرزشییەكان بكەن، هەروا داوا كرا لاوان لە گەرەكەكان تیپی وەرزشی پێكبێنن و چایخانەی گەڕەك بۆ بارەگای تیپەكەیان بەكاربێنن و، لاوان لە دەوری خۆیان كۆبوونەوە، لە لیژنەكەش دەسنیشانی یانەی وەرزشی هێراش كرا كە پێویستە هاوڕێیان و ئەندامانی یەكێتی لاوان بچنە یانەكە و ببنە ئەندام، ئەو كاتە واتە لە ساڵی 1970 دوویانەی وەرزشی لە هەولێر هەبوو، یانەی بروسك و یانەی هێرش، یانەی بروسك، یانەیەكی دێرینی هەولێر بوو، ئەندام و یاریزان و لایەنگری زۆر بوو، بەڵام یانەی هێرش چالاكی و تیپەكانی یارییەكانی وەرزشی كەم بوو، هەروا چالاكی و كاریگەری لەسەر وەرزشوانان نەبوو، یان سنوورداربوو، وەكو ئەو یانە هێرشەی ئێستاكە هەیە وابوو، هەروا تیپی وەرزشی سیروان كە راهێنەرەكەی(مامۆستا محسین خەلیل) بوو، شیوعیش بوو، تیپەكە بارەگایەكی هەبوو لە گەڕەكی تەیراوە نزیك قوتابخانەی ئەیوبییەی كچان، بارەگایەكە بریتی بوو لە خانووێك لە لایەن ئەندامان و وەرزشوانەكان بەكرێ گیرابوو، هەروا چایخانەی شیرین لە جادەی باتا یان (شەقانی سەلام) خاوەنەكە كاكە عیدان بوو، دیاركران بۆ ئەوەی لاوان بیكەنە شوێنی خۆیان، لەبەر رۆشنایی ئەم بڕیارا لاوان بەژمارەیەكی زۆر روویان لە یانەی –هێرشی- وەرزشی كرد، ئەوكاتە بارەگای یانەكە لە جێگای پارێزگای هەولێر بەرامبەر قەڵات، لە خانووێك بوون، هەتاكو كۆتایی ساڵی 1971 لاوان بارەگای یانەكەیان ئاوەدانكردەوەو، تیپەكانی تۆپی پێ و باسكەو تیپی تۆپی دەستی و، هەروا یاری شەترەنج و تۆپی سەرمێز بووژانەوە و بەشدارییان لە یارییەكاندا هەبوو، هەر لە هەمان كاتدا ژمارەیەك مامۆستای بواری وەرزشی كە ئەندام و دۆستی حزب بۆ یانەكە چوونە... وەكو مامۆستایان- ناسیح ئەلبنا و مامۆستا ئەسعدو مامۆستا نەوزاد و شێرزاد و قائد ئەحمەد و د. هاشم بیلال و مامۆستا عصام عەلی كسرە و ... زۆرانی تر هەر لە هەمان كاتدا ژماریەك قوتابی كچ و كوڕی شیوعی لە یانەكە بوونە ئەندام و بەشدارییان لە چالاكییە هونەرییەكاندا دەكردو رۆڵی بەرچاوییان هەبوو، هەندێ لەم قوتابییە كچانە رۆڵی كاریگەرییان لە یەكێتی گشتی قوتابیاندا هەبوو، دیارترینییان ئاشتی كەریم رۆوف و رێواس ئەحمەد باننیخێلانی و عامرە كسرە و پەخشان بوون، هەر لەناو یانەكە تیپێكی بچوكی مۆسیقاش دروستكرا، هەموو چالاكییەكانی یانەكە لاوانی یەكێتی دیموكراتی عێراق لقی هەولێر و یەكێتی گشتی قوتابیان رێكیان دەخست و دەوروی سەرەكییان هەبوو، دەستەی بەڕێوەبردنی یانەكە سەر بە پارتی دیموكراتی كوردستانەوە بوون، ئەوكاتە رێكخراوەكانی پارتی و چالاكییەكانیان بەشێوەیەكی ئاشكرا ئەنجامدەدراو، پارتی لەبەر رۆشنیایی بەیاننامەی 11 ئاداری 1970 دەسەڵاتداربوو، هاوڕێیان و ئەندامانی یەكێتی لاوان ئامادەكارییان بۆ هەڵبژاردنی دەستەی بەڕێوەبردنی یانەكەیان دەكردو لیستێك دروستكرا كە ئەم بەڕێزانەی تێدابوو( مامۆستا ئەسعەد، مامۆستا قائید ئەحمەد، مامۆستا نەوزاد حیدر، ئیدریس شێخۆ، مامۆستا شێرازد سعید...) كاتێك بڕیاری هەڵبژاردن دراو كارەكە بەرێوەچوو، لەئەنجامدا تەواوی دەستەی بەڕێوەبردنی یانەكە هاوڕێیان و دۆستانی حزب و ئەندامانی یەكێتی لاوان دەرچوون و یانەكە كەوتە دەست یەكێتی لاوانی دیموكراتی عێراق لقی هەولێر، بارەگای یانەكە گوازرایەوە بۆ خاووێك لە خانوەكانی ریزی سینەمای –صلاح الدین- خانووێكی گەورە بوو، حەوشەكەی فراوان بوو، ئێواران بەسەدان لاوی كوڕ و كچ روویان لە بارەگای یانەكە دەكردو، یاری شەترەنج و تۆپی سەرمێزو چالاكی هونەری لەبابەتی مۆسیقاو گۆرانی و نواندن دەكرا... یانەكە بۆ بارەگای یەكێتی لاوان و چالاكییەكانییان كراوە بوو، چایخانەی –شیرین- یش بەردەوام لەبەیانییانەوە تاكو شەو ئاوەدان بوو، هاوڕێیان و لاوان ئامادەبوونییان هەبوو بەجۆرێك چایخانەكە لەلایەن خەڵكەوە ناونرابوو چایخانەی شیوعییەكان، تاكو ئێستاكەش گەلێك كەس ناوی چایخانەكە هەر بەناوی –چایخانەی شیوعییەكان- دەبات، لەسەرەتای مانگی تەموزی ساڵی 1972، سكرتاییەتی یەكێتی لاوان بڕیاریدا كە ئاهەنگێكی هۆنەری بە بۆنەی شۆڕشی 14/ تەموزی/1958 لەناو بارەگای یانەی هێرشی وەرزشی ئەنجامبدات و، ئامادەكاری بۆ ئەم بابەتە بكرێت و، وتارێك بەناوی دەستەی هەڵسوراوانی یانەكە پێشكەش بكرێت، هەروا پێشنیاركرا بوو، كە بەباشی دەزانن نوێنەرەكی حزبی شیوعییمان بەشداری بكات، بڕیارەكەی سكرتارییەتی لاوان لە لێژنەی هاوبەشی و هاوكاری پەسەندكراو، داوا لە لێژنەی مەحەلی هەولێری حزب كرا كە نوێنەرێك بۆ ئاهەنگەكە رەوانە بكەن، بەندەش وتارەكەی یانەی هێرش-م نووسی و بەڕێز سەرۆكی یانە پێشكەشی كرد، شەوی 14/ تەموزی 1972 ئاهەنگەكە سازدارو ژمارەیەكی زۆر و بەرچاو لە لاوانی كوڕ و كچ و نوێنەری حزب هاوڕێ محمد خەلیل ئامادەبوون، تاكو درەنگانی شەو ئاهەنگەكە درێژەی هەبوو، دەنگی موسیقا و گۆرانی بەرز دەبۆوەو، شایی رەشبەلەكێش بارودۆخەكەی خۆشتر كردبوو، مامۆستای سەرۆكی یانەی هێرشی وەرزشی بە هاوڕێ –قائد ئەحمەد-ی ووتبوو وتارەكەم بۆنی حزبی شیوعی لێدەهات، بۆیە پێش ئەوەی بێمە ئاهەنگەكە چووم دووپێك ئارەقم خواردەوە، بۆ ئەوەی بەباشی وتارەكەم پێشكەش بكەم..

روحی مامۆستایان و هاوڕێیان( قائد ئەحمەد و مامۆستا نەوزاد و مامۆستا ئەسعدو ناصیح ئەلبناو محسین نەجار و منعم ئەلعگار و محمد خەلیل و مامۆستان رزگارو مامۆستای وەرزشی ئەنوەر شكرچی كە بەردەوام یارمەتی یانەی هێرشی دەدا، هەروا مامۆستا (نەجات عوزێری كە رۆڵی لە تیپی مۆسیقا هەبوو، مامۆستا فەرهاد شەریف-ی هونەر مەندی شارەزواو ناودار لە بواری شانۆو نواندن شادبێت.

  • 1