ئەمە بڵاوبكەوە
FaceBook  Twitter  

بەشی سێ یەم

ئێوە لەگەڵ هاوڕێیان بچنە گوندی عەلیاوە، هاوڕێ سالار شارەزایە و دەزانێ بۆ چ ماڵێك دەچن، دوای نوێژی شێوان لێكدابڕاین و، ئێمەش بەرەو گوندی عەلیاوە بەرێكەوتین و چووینە ئەو ماڵەی بۆمان دەسنیشان كرابوو، بەخۆشییەوە پێشوازیان لێكردین و خواردنییان پێشكەش كردین، درەنگانی شەو بەرلەوەی بخەوین هاوڕێ سالار ووتی، بەیانی دەبێت زوو لە ماڵەوە دەربچین، ئەو جا نازانم بۆچ لایەك بڕۆین، ووتم هاوڕێ سالار، ئەگەر هەندێ ئاوی زیاد لەگەڵ خۆمان ببیەین و بەرەو زوورگەزراو بڕۆین و، هەر جێگایەك تۆزێك گونجاو بوو خۆمان حەشار دەدەین و، تاكو ئێوارە هەوڵدەدین بەرگەی گەرما بگرین، بەیانی لەگەڵ مەلا بانگدان لەخەو رابووین و لە ماڵ دەرچووین، كە لە گوند دووركەوتینەوە، هاوڕێ سالار راوەستاو ووتی رەوەند ئەو شیناییە، خاوەنەكەی سنجاوی یە و خەڵكی گوندی عەلیاوەیە، تۆش سنجاوی بابچینە سەرشیناییەكە ئیمڕۆ لەلای ئەوان بین تۆ چی دەڵێت؟ ووتم زۆر باشە بەڵام من ئەو سنجاوییانە ناناسم، لەوانەیە ئەوان ئێمە بناسن، هاوڕێ سالار ووتی زۆر باشە، بابچینە سەر شیناییەكەو تۆ حەقت نەبێت و من چارەی دەكەم و قسە لەگەڵ خاوەنەكەی دەكەم، بەرەو شیناییەكە رۆیشتین و چووینە لای كەپرەكە و بیرەكەیان كەس لەوێ نەبوو، هاوڕێ سالار ووتی، ئێوە بخەون من نانوم و چاوەڕێی خاوەنی شیناییەكە دەكەم... دوای رۆژهەڵات، دوو كەس بەرەو شیانییەكە هاتن و ئێمەش لەناو كەپرەكە بووین، تەنیا هاوڕێ سالار لەدەرەوەی كەپرەكە دانیشتوو، دوو برادەركە گەیشتن و، سڵاویان لە هاوڕێ سالار كرد و، كەوتنە گفتوگۆ و لە هاوڕێ سالاریان پرسی ئەوە چی دەكەی بەتەنیا لێرە؟ هاوڕێ سالار ووتی من بەتەنیا نیم و چەند هاوڕێیەكی ترم لەگەڵدایە و، ئێمە پێشمەرگەی حزبی شیوعین و جێگامان نەبوو بۆیە هاتینە لای ئێوە، ئێوە سنجاوی نین؟ ووتیان بەڵێ‌ ئێمە سنجاوین، بۆچی دەپرسی؟ ووتی هاوڕێ رەوەند مان لەگەڵدایەو ئەویش سنجاوی یە و خزمی خۆتانە..!! هەر دووكیان بەیەكەوە ووتیان سنجاوی لەوانەیە برازاكەی مام محی الدین و مام محمد بێ، هاوڕێ سالار بەبێ ئەوەی بزانێ ئەو دووناوە كێنە، ووتی ئا، ئا خۆیەتی...! نەم گۆت خزمی خۆتانە، بەم شێوەیە هاتنەلامان و یەكتریمان ماچ كردو رێزی زۆرییان لێگرتین، ووتیان جوولەی كەم بكەن، چونكە پێشمەرگەی یەكێتی هەندێ جار دێنە ناو گوندی، ئیتر وەكو دەڵێن پاروومان كەوتە روونی لێمان پاڵدایەوە، ئەوانیش ئاگاداریان نەكردین كە برایەكیان پێشمەرگەی یەكێتی یە.. دەوروبەری كاتژمێر دەی بەیانی كوڕێكی لاوی رەنگ سوروسپی و جوان و رێك و پێك تەمەنی نزیك بیست ساڵ دەبوو، لێمان پەیدابوو، گرژی و تووڕەیی بەسەروسیمایەوە دیار بوو، بەبێ هیچ پێشەكییەك ووتی ئێوە چنە؟ هاوڕێ سالار لەسەرخۆ ووتی كاكە بەخێربێت و دەوەرە دانیشەو سڵاوێكمان لێبكەو پاشان پرسیاریشمان لێبكە..! ووتی دەباشە هات و دانیشت و پێكەنی و ووتی بەخێربێن، ئێوە شیوعین؟ هاوڕێ سالار ووتی ئێمە پێشمەرگەی حزبی شیوعین و ئەو هاوڕێیەش سنجاوی یە و خزمی خۆتانە.. بۆخۆتان بەیەكەوە قسەبكەن، ئیتر خۆم بەكاكەی خزمەتووڕەكەم ناساندو، ئەویش ووتی من ناوم ئیسماعیلە و بە (هاوار) ناسراوم و پێشمەرگەی یەكێتی نیشتمانیم، ئیتر لەگەڵ ئیسماعیل كەوتینە گفتوگۆی سیاسی و گیروگرفت و شەڕی ناوخۆمان و رێكەوتنی یەكێتی لەگەڵ حكومەتی عێراق... كاكە (ئیسماعیل)م زۆر ماندووكردو خۆشم بێزاربووم، بۆیە داوام لە هاوڕێ سالار كرد بەردەوامی بە مناقەشەكە بدات، هەتاكو كاتی نانخواردنی نیوەڕۆ كاكە ئیسماعیل بەتەواوەتی پەكی كەوت و تەسلیم بوو، هاتەلام و ووتی لەئێستاكەوە من بوومە شیوعی و واز لەیەكێتی دێنم و، دەمەوێت پەیوەندیم لەگەڵ ئێوەبێت، منیش پیرۆزبایم لێكردو لەگەڵ هاوڕێیان بریارماندا هاوڕێ ئیسماعیل (هاوار) ببێتە شیوعی و كاری حزبی لە ناوچەكە ئەنجامبدات و، ئێمەش لەرێگای هاوڕێ دەشتی یەوە پەیوەندی لەگەڵ دەبەستین، هاوڕێ ئیسماعیل بووە شیوعی و پاشان لەسەر حزب گیرو ئەشكەنجەی زۆر دراو خرایە بەندیخانەوە، كە ئازاد كرا، بووە پێشمەرگەی حزب و هەتاكو ئێستاش هەر پێشمەرگەیە و لە بارەگای حزبە لە مخمور، پاشان براكەی هاوڕێ ئیسماعیل هات و سەیری كرد ئیسماعیل لەگەڵ ئێمە نان دەخوات و پێدەكەنێ..! ووتی ئیسماعیل ئەوە نانییان لەگەڵ دەخۆیت و پێدەكەنی، ئەدی هەرتۆ نەبووی كە هاتی و كلاشینكۆفت بەدەستەوەبوو، دەت ووت، دایكی ئەو شیوعییانە ... هەر دەیانكوژم، بەزۆر چەكمان كردوی تانەیان كوژی...! هاوڕێ سالار پێكەنی و ووتی، هاوڕێ ئیسماعیل ئەوەشت كردووە؟ هەروا رووی لە براكەی ئیسماعیل كرد و ووتی كاكە گیان (ئیسماعیل) ئێستاكە شیوعی یە و هاوڕێی ئێمە و بەرپرسی حزبە..! براكەی هاوڕێ (ئیسماعیل)یش ووتی دەباشە كاكە ئێستاكە ئێمە پیاوی خراپین و (ئیسماعیل) یش پیاوی باشە... بەم شێوەیە لەدەستی هاوڕێ (ئیسماعیل) رزگارمان بوو. هاوڕێ ئیسماعیل ئێستاكەش پێشمەرگەی حزبەو لە شارۆچكەی مەخمور لە بارەگای حزبە و بەبێ دواكەوتن ئەركەكانی جێبەجێ دەكات، هاوڕێ ئیسماعیل كاتێك تیرۆرستانی داعش شاروچكەی مەخمورییان داگیركرد، لە بارەگای كۆمیتەی پارێزگای هەولێر لەناو شاری هەولێر پێشمەرگەبوو، داوای كرد بچێتە ناوچەی مەخمورو بەشداری شەڕی دژی داعش بكات، كە ماڵی هاوڕێ ئیسماعیل لە گەڕەكی سەركارێزە و باشترە ئەگەر لەبارەگای هەولێربێت، بەڵام هاوڕێ ئیسماعیل ئارەزوی زۆری هەبوو كە لەسەنگەری پێشەوەی بەرگری و پێشمەرگایەتی بێت.

شەو لەگەڵ هاوڕێیان م. گۆران و دەشتی و كاروان كادیر یەكترمان گرتەوەو، ئاگادارییان كردینەوە، كە بەیانی بۆ شوێنی كورەكانی سەر رێگای مەخمور دەچین، كە ئێستا كورەكان تێكچوونەو كەلاوەكانییان ماون، لەوێ خۆمان حەشار دەدەین و چاوەڕوانی ئۆتۆمبیل دەكەین، بۆ ئەوەی بۆ ناوچەی رەزگەی دوین بچین، شەو سەردانی شێخ- عومەری عەلیاوەمان كرد و، ماوەیەك لایان بووین و، لەگەڵ هاوڕێ دەشتی باسی گەڵێك بابەت و دەنگ و باسیان كرد، بەیانی بۆ كورەكان بەڕێكەوتین و كاك بێكەس و كاك حاجی كوڕی شێخ عومەر هاتن، كە كادیرو پێشمەرگەی سۆسیالیست بوون، ئەوانیش بۆ بارزان دەگەڕانەوە، هەموومان بووینە دە پێشمەرگە و هەتاكو كادژمێریەكی دوای نیوەڕۆ لەناو كەلاوەكانی كورەكان چاوەڕێمان كرد، تاكو لۆرییەكی گواستنەوەی مەڕو بزن هات و بەخێرای لەبەشی خوارەوەی بوودی لۆرییەكە سواربووین و، بەرەو شارۆچكەی خەبات بەڕێكەوتین، هەموومان چەكداربووین و رێكەوتبووین ئەگەر لەبازگەی موسڵ ئاشكرابووین شەڕ دەكەین و بازگەكە داگیر دەكەین و، هەوڵی دەربازبوون دەدەین، لەبازگەكە بەبێ گیروگرفت رەتبووین و، لە شارۆچكەی خەبات بەو رێگایەدا رۆیشتین كە لەگەڵ زێی گەورە بەرەو بەستۆرە دەچێت و پاشان بەرێگای شێخ توراب گەیشتینە ناوچەیەكی شاخاوی و، دابەزین و بەپیادە و پێشمەرگەنە بەرو ناوچەی گوندی رزگە بەرێكەوین.

  • 1