ئەمە بڵاوبكەوە
FaceBook  Twitter  

لەڕوانگەی چینایەتیەوە 

سەرۆکی پەرلەمان لەسەر بنەمای( ۸۱ دەنگی)( زەرد وسەوز ونیللی )ووتی پرساندنی حکومەت کۆتایی هات لەکاتێکدا حکومەت غائب بوو بەبێ هۆی شەرعی ،

بەڵام باسەرۆکی پارلمان وجێگرو سکرتێرەکە وسەرۆکی حکومەت وجێگرەکەی و وەزیری داراییە کەی بزانن. پرسی پرساندن و وەرگرتنەوەی متمانە بەحکومەت ودەسەڵاتەکەتان هەرماوە، لای جەماوەرو لەشەقام پرساندن هەموو ڕۆژێکە و بوەتە ووێردی سەر زمانمان متمانە نەبوون پێتان پێش ئەوەی پرسێکی یاسایی بێت پرسێکی گرنگی ناوژیانی سیاسی ڕۆژگارە پرسی ناخی دایک وباوکی شەهیدانە، پرساندن و بێ متمانەی بەئێوە لەوویژدانی سەدان هەزارمووچە خۆر خانەنشینکراوی مافخوراودایە، بڕوانەبوون پێتان لەناوناخی هەزاران خاوەن پێداوویستی تایبەتدایەکە مووچەیەکی زۆر کەمتان دەدانێ و ئێستا لێتان بڕیوون، لێپرسینەوەلێتان پێش ئەوەی لەناو هۆڵی پەرلەمان بێت لە ناودڵی هەزاران پێشمەرگەی دێرین وزیندانی سیاسی و کەسوکاری ئەنفالکراوەکاندایە، پرساندن لەناو بیرکردنەوەی هەزاران دەرچوی زانکۆ وپەیمانگاکان و لاوانی دانەمەزراو بێکاردایە ،قوڕ بەسەرتان بەدەیان هەزار کرێکاری ڕەنج دزراو هەرڕۆژێ بێت یەکجارو بۆ دواجار پرساندنتان لەگەڵ دەکات ئەویش ـبەهێنانە دەرەوەتان لەناو تەلاری بەغەدر و درۆ هەڵچنراوی دەسەڵاتان وئاڵوگۆڕ پێ کردنتان، ئێوە نازانن ئاڵوگۆڕی پرۆسەی سیاسی تەنها کارێکی ناکردەی ناوهۆڵێکی (۹۲کەسی) نیە هەمیشە زۆردارەکان لەناوسەنگەری خەباتی ڕۆژانەی خەڵک ولەناو شەپۆلی ناڕەزایەتی وخۆپیشاندان دەست وپێوەند کراون ولەسەر عەرشی زاڵمانە هێنراونەتە خوارەوە ، کەمێ لەمێژوو ڕامێنن ، تەماشای پەیکەری داڕووخاوی دیکتاتۆرەکانی دەوروبەرتان بکەن . سەیری تابلۆی بەخوێن نەخشێنراوی ئەو هەموو قوربانیەی گەل بکەن لەکاتی شۆڕش و ڕاپەرین لەکاتی خۆڕاگری ناوزیندان لەئاوارەیی لە قبوڵ کردنی هەژاری ونەهامەتی وبەرەنگاری تیرۆریستان و بەشداری کردن لەپرۆسەی سیاسی . یەک تۆز بیر لەبەڵێنەکانی کاتی هەڵبژاردن و قسە باق وبریقەدارەکانی (سەرۆک و هاوسەرۆک و ڕێکخەری گشتی) تان بکەنەوە هێشتا ئێوە بێ منەتنن و ئازادیەکان پێشێل دەکەن٫ فەزای گشتی بەرتەسک دەکەنەوە لەململانی دیموکراتیدا، سەرباری ئەوەش نانی خەڵک دەبڕن و مووچەنادەن بەخەڵک پاشان دێن رسومات وباج بەدەقات لەسەرکاسبکار زیاد دەکەن و خزمەتگوزاری( ئاو کارەباو خوێندن وتەندرووستی) کەم دەکەنەوە تا ئاستی نەمان وهەڕاجی دەکەن بۆ کۆمپانیاکانتان و بارگرانی دەخەنە سەرشانی خەڵک ئەم سیاسەتی بەسەرمایەداری کردنەی ژیان و حکومڕانی جگە( لەکەڵەکەکردنی زەحمەت لەسەرشانی هەژاران ومووچەخۆران هیچی تری لێ بەرهەم نایەت )ئەم بڕیارو سیاسەتانە چەوسانەوەیەکی بێ ڕەحمانەی چینایەتیە و لەڕوانگەی ململانێی چینایەتیەوە (هەمووکەڵکەکردنێکی زۆرداریش دەبێتە ووزەو تینی شۆڕشگێڕانەو گۆڕانکاری جۆری (نەوعی)بەدوای خۆیدا دێنیت ئەمە تیۆری سەلمێنراوی مێژووی سیاسی و خەباتگێڕی کۆمەڵگای مرۆڤایەتیە )

ئێوە ناتوانن بەدەنگدانتان لەناوهۆڵی پەرلەماندا .

پرۆسەی (پرساندن و متمانە نەکردن پێتان ) لەنا و (وویژدان وبیرکردنەوە و هەڵوێستماندا )بسڕنەوە دڵنیا بن کەتاکو سەر نایبەنەوە . جیا لەمەش سەرنجێکی تری گرنگ بابزانینن ئەم پەرلەمانە چۆن درووست بووە ؟هەمووان باش دەزانین جگە لە دەنگدەری ڕاستەقینە، دەسەڵاتداران بەدەیان هەزار دەنگی تەزوویریان خستە ناوصندوقەکانە وە و ڕێژەی دەنگدان نەگیشتە زیاتر لە ٥۰٪ و زیاترکرا و زۆرتر خرایەڕوو ،هاوکات زۆرێک لەلایەنەسیاسیەکان ڕازی نەبوون بەدەرئەنجامەکان ،ئێتر ئەم زۆرینەو کەمینەیە دەبێت چ شەرعیەتێکی هەبیت ،سەرەڕای ئەوەی کە (مافی ژیان و بژێوی و مووچە لەڕووی فکری ویاسایی وئینسانیەوە مافێکی بێ ئەملاو ئەولای مرۆڤە) وهیچ کەس و لایەنێکی سیاسی بۆی نیە لەژێر ناوی زۆرینەو کەمینەو دەنگداندا بیبڕێت جگە لەڕووە یاساییەکەی کەپشتی بەهیچ بنەمایەک نەبەستووە،بۆیە تاجەورو چەوسانەوە مابێت ململانێ لەگەڵتان بەردەوام دەبێت. ناتوانن پرساندن لەوویژدانمان بسڕنەوە .

عوسمان زیندانی .

۲۰۲۰-۱۰-۲۸

  • 1