ئەمە بڵاوبكەوە
FaceBook  Twitter  

ژینگەی كار، ئەو شوێنەیە زۆربەمان ئەزمونمانكردووە و دەیكەین، ئەو شوێنەی دووئایدیای تەواو جیاواز لە بارەیەوە قسەیان هەیە. ئەگەر گەڕانێك بكەیت لە گۆگڵ و زانكۆ و ئەو جۆرە زانیارییەی ئەمرۆ بازاری هەیە و باڵا دەستە، چەندین پێناسە و ڕەچەتە و توێژینەوە، بە فۆرمی جیاواز بەڵام بەیەك ناوەرۆك، بەناوی چۆنیەتی باشكردنی (ژینگەی كار) بەرچاومان دەكەوێت.

لە فۆرمدا هەموو ئەو زانیارانە لە ژێر تایتڵی (ژینگەی كار) دەیانخوێنینەوە و بەرچاو دەكەوێت بەڵام ئەو معریفەو زانیاری ئەمرۆ لەو بارەیەوە بەردەستە و تەرویجی بۆ دەكرێت ، تەواو جیاوازە لەگەڵ ئەوەی هەندێكمان بیری لێ‌ دەكەینەوە.

ئەوان باسی باشكردنی ژینگەی كار دەكەن لە ڕوانگەی زێدەبایی زیاتر و كەڵەكەكردنی زیاتری پارەو سامان، بۆ ئەوەی ببێتە ژینگەیەكی باشتر بۆ پارە نەك بۆ باشكردنی ژینگەی كاری مرۆیی كرێكاران، لێرەدا ژینگەی كار مانایەكی تەواو جیاواز وەردەگرێت. لەمرۆدا بە گشتی چەمكەكان تەواو لە ڕەهەندی مرۆیی بەتاڵكراونەتەوە و بۆنەتە بەشێك لە شوناسی سیستەمی سەرمایەداری تازە.

هاورێی ئازیز ئەگەر گەرەكتە تێبگەیت و بەدوای مانای جەوهەری چەمك و تێرمەكان بگەڕێت چاوەری مەكە لە بازاری (زانكۆ و معریفە)ی نیولیبرالیزم هیچت چەنگ بكەوێت، برۆ تەواو دوور برۆ لە شوێنێكی تر بەدوای مانا مرۆیی و ڕەهەندە جەوهەرییەكەیدا بگەڕێ .

بیرلەوەش مەكەرەوە لە شاشەی تیڤی و ڕاگەیاندنی ئەمرۆ و بازنەی گفتوگۆكانی هۆڵەكانی پەرلەمان و حكومەتی هێزە لیبرالەكان و خاڵی ناكۆكی پارتەسیاسیەكان، (سیاسەت) بەم فۆرمەی ئێستا شتێكت دەست بكەوێت.

ناكۆكی ئەوان لەسەر چۆنیەتی رەخساندنی ژینگەیەكە بۆ كەڵەكە كردنی زیاتری پارە نەك بۆ باشكردنی ژینگەی كاری كرێكاران، ئەو كرێكارانەی ئەمرۆ لەسایەی ئابوری بازار و نەبوونی هیچ پرنسیپ و سانسۆر و پێوەرێكی مرۆیی، جارێكی تر رووبەرووی دۆخی سەدەكانی پێشوو دەبنەوە، ئەوان سەڕەڕای ئەوەی ناچاركراون هێزی بازوویان بە پارەیەكی هەرزان بفرۆشن، بێ‌ بەشیشن لە ژینگەیەكی كار كە لایەنی كەمی ئارامی ، دڵنایی ، ئیستقرار و شكۆی مرۆیی تیابێت.

ئەمرۆ ئەگەر لەسەر تاسەری دوونیا كرێكاران رووبەرووی نادڵنیایی زیاترببنەوە لە ساییەی نیولیبرالیزم و بەرەڵلاكردنی زیاتری فەزای گشتی بۆ كۆمپانیاكان و هێزی سەرمایە، ئەوا بۆ كرێكارانی رۆژ هەڵاتی ناوەراست و عێراق و هەرێمی كوردستان قورەكە زۆر خستترە.

بە پێی داتاكان سەڕەڕای ئەوەی زۆربەیان بێ‌ بەشكراون لە سەرەتایترین مافی خۆ زەمانكردن و كارێكی شەرفەمەندانە، كرێكارانی كەرتی تایبەت، ئەو كەرتەی زۆربەی لەلایەن دەسەڵاتەوە قۆرغكراوە و یاسا لە ئەرزی واقع هیچ رۆڵێكی تیانابینێت و نایان پارێزێت، دواجار لە كەرتێكی رێكخراو و دیسپلینكراو بە لایەنی كەمی بەها مرۆییەكان، ئەمرۆ بۆتە كەرتێكی تەواو كەسی و بەرەڵلا لەژێر هەوەسی سەرمایەدارە مشەخۆرەكان دایە، بەشێوەیەك سەڕەرای ناچاركردنیان بەكاری هەرزان و زیاتر لە دەكاتژمێر كاركردن، بێ‌ بەشیشن لە هەموو بیمەیەكی كۆمەڵایەتی و ئارامییەك .

چیرۆكەكە بۆ كرێكارانی مێینەو هێنراو كەپێیان دەڵێن (بیانی) جیاوازترە، رەگەزی مێ لەو كەرتە رووبەرووی ئەو پەڕی دەستدرێژی سێكسی و بێرێزی و ئیهانەكردن دەبێتەوە، تەنانەت هەندێك لە راپۆرتەكان ئاماژە بەوە دەكەن ئەو كرێكارانەی لە دەرەوە هێنراون سەرەرای نەبوونی مافێكی زەمانكردن، بازرگانیان پێوە دەكرێت و رووبەرووی دۆخی هاوشێوەی كۆیلایەتی دەكرێنەوە .

هاوڕێكەم، ئەگەر دەمانەوێت سیاسەت مانایەكی هەبێت و ببێتە پێویستی ژیانی هەنوكەیی، دەبێت دەربازی بكەین لە حسركردنی لە هۆڵەكانی پەرلەمان و كۆبونەوە و خاڵی كۆكی و ناكۆكی ئەو پارتانە. دەبێت جارێكی تر سیاسەت بگەرێنینەوە بۆ ئەو شوێنانە، شوێنی ژینگەی كار وچالاكی و كەسابەتی رۆژانەی كرێكاروخەڵك بە گشتی، بزانین چی لەوێ‌ دەگوزەرێت، لەوێ‌ بەیەكەوە تەكبیری ئەوە بكەین چۆن لایەنی كەمی ژیانێكی شەرەفمەندانە و ژینگەیەكی باشی كار بۆ كرێكاران و قەرمانبەران هتد .. دابین بكەین.

هەرلەوێش دەتوانین جارێكی تر خەڵك بەو هێزانە گرێبدەینەوە كە دەمێكە بەهۆی غیابی خۆ رێكخستن و ئاگایی سیاسی و ئەم تایپە لە سیاسەتكردن، ئەوان رووبەرووی ئەوەی ئێستا دەبنەوە، ئێمەش لە دۆخی پەراوێزخراویدا ماوینەتەوە .

  • 1