ئەمە بڵاوبكەوە
FaceBook  Twitter  

دەنگێن دخوازن (هەرێم ئاسیملەبیت .. دەسهەلاتا ناوەند ڤەگەریت)گرێدایی ئەجیندایێن داگیركەرانە..!

خەلەكا چوارێ‌

سیاسەت وەكە زانست لسەر بنگەها حقدێ‌ ناهێتەكرن:

دەستپێكێن سالێن نوتان دەرفەتێن خوەسەریێ‌ ل باشورێ‌ كوردستانێ‌ هاتنە ڕەخساندن، واتە دەڤەر لژێر چاڤدێریەكا دەولی دە دهاتە پاراستن، ئێدی گەلێ‌ مە ب بریار پرۆسا هەلبژارتنان دایە پێشیا خوە، هەلبەت ب كێموكاسیێن هەری خوەیاڤە بەردەوامی ب ئەڤێ‌ پرۆسێ‌ هاتەداین، د ئەنجام دا دەسهەلاتا دوو حزبی ل سەرتاسەری باشورێ‌ كوردستانێ‌ هاتە بجهكرن، ئەڤ دەسهەلاتا دوو حزبی ژبەر ململانێ‌ و شەرەنیخا بەرتەسكا حزبی زێدە ئاگەهیێن وان لسەر ئێش و ئازارێن جڤاكێ‌ نەمان، بەرژوەندێن حزبی بوونە هەر تشتـ، ئێدی لجها مودێلا ئینتما‌و بو نیشتمانی بوویە ئینتما‌و بو حزبان، دناڤ هەر حزبەكێ‌ دا ململانێن توند یێن موزایدەكرنا ناڤخوەیی پەیدابوون، هەر ئێكێ‌ دڤیا خوە پتر شرینكەت دناڤ حزبا خوەدا هەر وەسا ببیتە ماستاوجیەكێ‌ عەیار بیست و چوار، ژبەركو ب وێ‌ چەندێ‌ چوونە پێشا وی ئاساندبیت و بەرژوەندێن وی یێن كەسوكی گرەنتیدبین، كەسێن ئامادەنە د گێرانا ئەڤی رۆلی دە ب هن ئاوایان دهاتنە پشتگوه ئێخستن، هەڤالەكێ‌ هێژا جارەكێ‌ بومن ڤەگێرا گوت: سالێن نوتان جارەكێ‌ نێچیرڤان بارزانی هاتە دهۆكێ‌ خواست بیست كادرەكێن كەڤن یێن شورەشێ‌ كومڤەكەت و لسەر رەۆشێ‌ نرخاندنێ‌ بكەن، هەلبەت ل هوتێلا ژیان چالاكی هاتە پێكئینان، نوزدە كەسان ژوان ب ئاوایەكێ‌ پۆزەتیف یێ‌ تەژی پەسن و مەدح رەۆش هەلسەنگاند، كەسێ‌ بیستێ‌ بەرۆڤاژی ئەوان ئالیێ‌ پوزەتیف گرانیا خوە دایە سەر و گەلەك راستی كرنە سەر بەركێ‌ و ب ڕاشكاوی ڕەخنێن خوە ئانین زمان، د ئەنجام دا نوزدە كەسێن یەكەمین شیان سەركەڤن و سودمەندبن، كەسێ‌ بیستێ‌ ژی هاتە دویر ئێخستن و چارەنڤیسێ‌ وی لمال سافیبوو، چەند سال پێچوون جارەكا دن نێچیرڤان بارزانی ب سەرەدانەكێ‌ هاتە دهۆك، پرسیارا كەسێ‌ بیستێ‌ كر و خواست دیسان ببینیت، پشتی دیدار دناڤبەرا وان دا هاتیە پێكئینان، نێچیرڤان بارزانی گوتێ‌ باشە نوكە تو چاوا رەۆشێ‌ دبینی..؟ ئەوی گوتێ‌ نوكە چ تشتەكێ‌ نابینم، تنێ‌ تشتێ‌ ژ رەۆشێ‌ مێزەدكەم .. ئەز لاو یێ‌ موعیزبووی .. من باش خوە ب بستكێ‌ ڤە دیت .. من دەرسەكا باش وەرگرت، هەما ژ كەرەما خوە ئەگەر ب دەستەكەكا مادی دەرفەتا ژیانێ‌ لبەر مە ئاسانكەی دێ‌ رەۆش فیدبیت، ب ڕاستی ئەڤ سەرهاتیە گەلەك یا واتەدارە، لگور نێرینا من هەتا ب تەمامی رەۆش بەروڤاژی نەبیت گورەپانا سیاسی نورمال نابیت، دەم یێ‌ هاتی بێژنە وان نوزدە كەسان دورا وە خلاس .. هەوە ب وان مەتح و پەسنان سیاسەت خەتماند .. ئەڤجا كەرەمكەن هەرنە مالێن خوە و بو هەتا هەتا هوون خانەنشین، د بەرامبەردا بێژنە كەسێ‌ بیستێ‌ وەرە مەیدانێ‌ و گەشێ‌ بدە بیاڤێن خوە یێن ڕەخنەیی چونكە تنێ‌ ب ڕەخنێ‌ رەۆش ژ شاشیان دهێتە بژارتن ..!

رۆژ ب رۆژ نەرحەتیێن گەل لسەر شاشیێن هەر دوو حزبان پتر خالێن نیگەتیف توماركرن، د ڤان سالێن داویێ‌ دا نەرازیبوون بوونە مژارێن سەرتاسەری، رەنگڤەدانێن نەرازیبوونان لسەر ئەنجامێن هەلبژارتنان تنێ‌ د بیاڤێن زێدەبوونا ئەندامێن بەرێ‌ نەرازی د پەرلەمەنتویێ‌ دە هەژمار بلندكرن، ئەڤان كەسان شێوازێن هەمە جور د پەرلەمەنتویێ‌ دە بكارئینان، هن جاران بناڤێ‌ خەلكێ‌ نەرازی داخویانیدان، وەسا دایە زەلالكرن هەر وەكو ئەو نوینەرێن هەری راستەقینە یێن دەنگێن نەرازی د پەرلەمەنتویێ‌ دە، گەلەك یێن گەرمبوون قورسایا خوە نەدزانی ب چ ئاوایەكێ‌ یە، ئەوان هەر ل دەستپێكێ‌ ئاستێ‌ نەرازیبوونێن خەلكێ‌ ب زانبوون نەخواندن، ب كویراتی تەڤلی گۆڕەپانا سیاسەتێ‌ نەبوون، سیاسەتا وان ب سیاسەتەكا سەرپێ‌ دهاتە نیشادان، ل نیڤا رێكێ‌ هن ژوانە ب ئەرزانی متایێ‌ خوە كێشا بەر بازارێن فروتنێ‌، سایكولوژیەتا وان تەڤلیهەڤی بخوەڤەگرت، ئەو ژی مینا شێوازێن نەرازیبوونان د بلندبوونا پلێن گەرمێ‌ دا دئازریان و د هاتنە خوارا پلێن گەرمێ‌ داژی راستی گوهرینان دهاتن، ستراتیژیەتا ئەڤان جورێن ئوپوزسیوون و نەرازیبوونان نە یێن دوربینن، پتریا جاران د نیڤا رێكێ‌ دە دەستبەرداری هەموو پڕەنسیبان دبن.

دیارە ژی ئەو هند هەست بهندێ‌ ناكەن، كو ئەو د بنگەها خوە دە تەڤگەرەكا پوپولستینە نەك تەڤگەرەكا سیاسی، ب هیچ رەنگەكێ‌ ئەو نەشیانە لسەر ئورگانیزەكرنا جڤاكێ‌ بسەكنن، هەتاكو ب كویراتی بچنە دناڤا دلێ‌ گەل دا و ئەلترناتیێن وان یێن سیاسی هەبن، راستیا وان زێدە د هندێ‌ دایە، كو ژ نشكەكێڤە دەركەفتن و ب دانەپێشا گوتارەكا پوپولستی سواری هەستێن جڤاكێ‌ بوون، مەزنبوونا وان مینا راوەستیانا ئێشانا نەخوشەكێ‌ یە ب تەبلێتێن موسەكەن، ئەو هێشت ئەڤێ‌ مژارێ‌ فامناكەن، دەما دخوازن دەنگێن نەرازی دابەزنە سەرشەقامان و گەل لگور بانگا وان حەرەكەتێ‌ نەكەت، د هەر واری دە ئەو توشی هێستریایێ‌ دبن، هەولدەن بێ‌ دیراسە هەموو رێكەكێ‌ تاقیكەن، نها ئەو یێت قوناغا شەپرزەیا سیاسی دە، سەرێ‌ رێكان یێلبەر بەرزەبووی...!

ئەڤە دەمەكە ئوپوزسیوونا پوپولستی ژ نەچاری ڤە لسەر بنگەها حقدێ‌ سیاسەتێ‌ دكەن، دبێژن مە ئەڤ دەسهەلاتە نەڤێت، مادەم ئەم نەشێن كورسیا دەسهەلاتێ‌ ژ دەستێن وان دەربینین، ئەمێ‌ هەولدەین ژ دەسهەلاتا ناڤەندا ئیراقێ‌ ڕە بخوازین مە دەسهەلاتا هەرێمێ‌ نەڤێت ژ كەرەما خوە وەرن مە ب رێڤەببەن، ئەڤەهە داوی قوناغێن ئوپوزسیونا پوپولستی یە ..! چ كارێن خوە نابەنە سەری، هەموو لڤینێن وان ب نیڤبەرونە .. لجەم وان ئاسەیە ژی سەنگەرێن خوە بگوهرن و ببنە دوستێن دەسهەلاتێ‌.

شوڤینیەت نە خوەدیێن دلەكێ‌ نەرمن هەتا مرۆڤ ئێش و ئازارێن خوە ژێرا پارڤەكەت:

وەلاتێن كوردستان د سەر دە هاتیە دابەشكرن، هەر ژ دەستپێن دامەزراندنا خوە دە، خوەدیێن زهنیەتەكا شوڤینی و پاشڤەر بوون، چ جاران وان نەخواستی یە ژبلی نەتەوا سەردەست نەتەوە و پێكهاتێن دن ببنە هێز و هەبوونا وان بهێتە پەژراندن، لەورا ژی ب هەموو ئاوایان ئەوان دژایەتیا تەڤگەرێن سیاسی یێن نەتەوە و پێكهاتێن دن كریە، ئەو هەموو دەردەسەریێن ب سەرێ‌ گەلێ‌ مەهاتی، جارەكێ‌ بتنێ‌ ژی تاكەكێ‌ نەتەوا سەردەست هەلویست وەكە كەس ژی نەوەرگرتیە، ئەڤە بخوە ژی گەلەك یا گرنگە، چونكە دڤێ‌ یەكێ‌ ڕە راستیا ئەڤان وەلاتان دهێتە خوەیاكرن، نەتەوێن سەردەست ب ڕەنگەكێ‌ بەرنامە بو دارێشتی خوە وەكە خوداوەند ب زوری یێ‌ دایە قەبولكرن، د هەمان دەم داژی هەولا دای نەتەوە و پێكهاتێن دن بشكێنن داكو شانازیێ‌ بخوە نەبەن و چ جاران متمانێ‌ بخوە نەئینن، دڤێ‌ قوناغێ‌ دە ئەگەر ئالیێن سیاسی یێن نەتەوە و پێكهاتێن سیاسەتا شكاندنێ‌ لسەر هاتیە پەیرەوكرن متمانێ‌ ب سوزێن هێزێن نەتەوا سەردەست بینن، گونەهەكا مەزنە ئەو د گورەپانا سیاسی دا بمینن، واتە ئەگەر ئەو ب نەزانیبوون ژی یان ب دلەكێ‌ ساخ ئەڤێ‌ ڕەفتارێ‌ بكەن، بێكو ئەو هەست بهندێ‌ بكەن د ئەنجام دا باشترین خزمەت یێ‌ پێشكێشی پلانێن داگیركەر و نەیارێن كوردستانیان دكەن، بەردەوامیا ئەڤێ‌ شێوازێ‌ تێكوشانێ‌ هەتا هەتا دیروك دێ‌ نەرەتان لێكەت.

شوڤینیەت د سرشتێ‌ خوە دە هەلگرێ‌ (كەرب .. كین .. نەڤیان .. ژ خوە حەزكرن و بەس .. شدەت .. ستەم ..گەفێن بێ‌ سنور) واتە نە خوەدیێن دلەكێ‌ نازك و نەرمن، لگور نێرینا وان هەر تشت گوری (وەلات، نەتەوە، ئالا) یێ‌ وان، مرۆڤ چەند خوە دبەرا بشكێن چ سود و مفایان نابینیت، ئەو دخوازن خەلكێ‌ دن بەرامبەری وان خوە ب بچویك ببینیت و یێ‌ دل خوەش و سوپاسدار بیت ب بچویكاتی و شكەستیایتا خوە، تنێ‌ ئەو ئەڤێ‌ هەبوونێ‌ قەبولدكەن، دەرڤەی ئەڤاهە (چاڤێن وان دسورن .. دەڤێن وان بخوینن .. یێن دژ و دڕن .. گەف ژ هەموو كێلەكێن وان دبارن) ئەڤەنە ساخلەتێن وان یێن نەگوهر، تشتەكێ‌ سەیرە كورد هەبن د گورەپانا سیاسی دا هێشت ئەڤێ‌ چەندێ‌ نەزانن و بخوەشكاندنێ‌ سەربلندبن ..!

باوەرناكەم هیچ ملەتەك زێدەتری كوردان ببیتە قوربانیێ‌ زهنیەتا شوڤینست و ڕەگەزپەرست یا نەتەوێن سەردەست یێن وان وەلاتێن كوردستان د سەردا هاتیە دابەشكرن، نەتەوێن سەردەست یێن وان وەلاتان بەردەوام كارێن هەڤبەش داینە مەشاندن ب ئارمانجێن هندێ‌ پێكهاتێن دن ب تەمامی تەپەسەركەن و ئاسیملەكەن، ئەڤ سیاسەتا وان هەتا ئیرۆ ژی یا بەردەوامە، ل هەر چوار ئالیێن كوردستانێ‌ ئەڤ شەڕە دهێتە بڕێڤەبرن.

 

  • 1